Hesekiel 38 - KYERƐW KRONKRON

Gog ba Israel asase so

¹ Na AWURADE asɛm baa me nkyɛn sɛ:

² Onipa ba, yi w’ani hyɛ Gog, Magog asase so, Ros, Mesek ne Tubal abirempɔn no, na hyɛ nkɔm tia no,

³ na ka sɛ: Sɛ AWURADE Nyankopɔn se ni: Hwɛ, me ne wo anya, Gog, Ros, Mesek ne Tubal birɛmpɔn!

⁴ Na mɛdannan wo, na mede akɔtɔkoro mawurawura w’afono mu, na mayi wo ne wo dɔm nyinaa, apɔnkɔ ne apɔnkɔfo a wɔn nyinaa hyehyɛ ntade afɛfɛ, asafo bebree, akyɛm akɛse ne nkumaa a wɔn nyinaa kurakura nkrante no aba,

⁵ Persia, Etiopia ne Put ka wɔn ho, wɔn nyinaa wowɔ akyɛm ne dade kyɛw;

⁶ Gomer ne n’asafotow nyinaa, Togarma fi a ɛwɔ benkum fam tɔnn ne n’asafotow nyinaa; aman pii ka wo ho.

⁷ Mia na siesie wo ho, wo ne w’asafo horow a wɔaboaboa wɔn ho ano aba wo nkyɛn nyinaa, na yɛ wɔn, ɔhwɛfo.

⁸ Nna pii akyi no wɔbɛba abɛhwɛ wo; mfe a edi akyiri no mu, wobɛba asase a wɔadan ɛsofo afi nkrante ano de wɔn abesi hɔ na wɔaboa wɔn ano afi aman bebree mu no so, Israel mmepɔw a ɛdedaa mpan daa no so: Na afei wɔayi ɔman no afi aman no mu, na wɔn nyinaa te hɔ dwoodwoo;

⁹ na wobɛba sɛ ahum, wobɛba sɛ omununkum abɛkata asase no so, wo ne w’asafotow no nyinaa ne aman pii a ɛkeka wo ho.

¹⁰ Sɛ AWURADE Nyankopɔn se ni: Na ɛda no, nsɛm bi bɛsɔre wo komam na woadwen adwemmɔne,

¹¹ na woaka sɛ: Mɛforo makɔ asase a ano da hɔ no so makotua wɔn a wɔwɔ hɔ komm a wɔte hɔ dwoodwoo no, wɔn nyinaa tete hɔ a wonni ɔfasu, na wonni aponkɛse ne akyiri adaban,

¹² sɛ worekɔfa asade na woafow afow ade, na woadan wo nsa ahyɛ amamfo a afei wɔtete mu, ne ɔman a wɔaboaboa wɔn ano afi amanaman mu na wɔanya mmoa ne nneɛma na wɔte asase mfinimfini no.

¹³ Seba ne Dedan aguadifo, ne Tarsis adetɔnfo no nyinaa bɛka akyerɛ wo sɛ: Asade na worebɛfa yi? Afow nti na woahyia w’asafo, sɛ worebɛsoa dwetɛ ne sika na woafa mmoa ne nneɛmanneɛma na woafom asade bebree yi?

¹⁴ Enti, onipa ba, hyɛ nkɔm na ka kyerɛ Gog sɛ: Sɛ AWURADE Nyankopɔn se ni: So ɛnyɛ da a me man Israel bɛtena ase dwoodwoo no na wubehu,

¹⁵ na wubefi wo tenabea benkum fam ano noho tɔnn aba, wo ne aman bebree a wɔka wo ho a wɔn nyinaa tete apɔnkɔ so, asafo kɛse ne dɔm a ɛso,

¹⁶ na wubetu aba me man Israel so sɛ omununkum abɛkata asase no so? Nna a edi akyiri no mede wo mɛba m’asase so, na amanaman ahu me, bere a meyi me kronkronyɛ adi wɔ wo ho, wɔn anim no, oo, Gog!

¹⁷ Sɛ AWURADE Nyankopɔn se ni: So wone nea mekaa ne ho asɛm tete nna no mu a menam me nkoa, Israel adiyifo a wɔkaa adiyisɛm nna no mu mfe mfe no, so mekae sɛ mede wo mɛba wɔn so no?

¹⁸ Na ɛda no, ɛda a Gog bɛba Israel so no, AWURADE Nyankopɔn asɛm ni, m’abufuw mu yamgya bɛdɛw,

¹⁹ na me ninkuntwe mu, m’anibere gya no mu, maka sɛ: Ampa ara, ɛda no, ɔwosow kɛse bɛba Israel asase so,

²⁰ na ɛpo mu mpataa ne wim nnomaa bɛwosow m’anim, ne wuram mmoa ne wɔn a wɔwea asase so nyinaa, ne nnipa a wɔwɔ asase ani nyinaa, na mmepɔw bedwiriw agu, na abotan atenten ahwehwe ase, na afasu nyinaa ahwehwe ase.

²¹ Na mɛfrɛ nkrante mahyɛ no, me mmepɔw nyinaa so, AWURADE Nyankopɔn asɛm ni, wɔn nyinaa nkrante, obi de bɛka ne nua;

²² na mede owuyare ne mogya ne wɔn bedi, na mɛtɔ osu a ehwie na ɛsram so ne amparuwbo, ogya ne sufre agu ɔno ne n’asafotow ne aman bebree a wɔkeka ne ho no so.

²³ Na mɛyɛ me ho kɛse na mayɛ me ho kronkron, na mama wɔahu me, amanaman bebree anim, na wɔahu sɛ mene AWURADE.