Hesekiel 27 - KYERƐW KRONKRON

Tiro ho kwadwom

¹ Na AWURADE asɛm baa me nkyɛn sɛ:

² Na wo, onipa ba, twa Tiro ho kwadwom,

³ na ka kyerɛ Tiro sɛ: Wo a wote ɛpo abobow ano, aman batani a wokɔ nsupɔw bebree so, sɛ AWURADE Nyankopɔn se ni: Tiro, wo de, woka sɛ: Me na me ho wie fɛ yɛ!

⁴ W’ahye wɔ po mfinimfini, w’abantofo awie wo fɛ yɛ,

⁵ Senir apopaw na wɔde pempam w’ahyɛn afasu, Lebanon nkyeneduru na wɔfa de yɛɛ w’ahyɛn mu nnua;

⁶ Basan adum na wɔde yɛɛ w’atabon, wɔyɛe wɔ asonse mangoo a ɛhyehyɛ kwabɔhɔrɔ nnua a efi Kitim nsupɔw mu no mu.

⁷ Nwera a wɔakyere mu a efi Misraim yɛ wo mframatam a ɛyɛɛ wo ɔfrankaa; bibitam ne ntama a ɛberedum a efi Elisa nsupɔw mu yɛ wo nkataso;

⁸ Sidonfo ne Arwadfo yɛɛ w’aharefo; w’anyansafo wɔ wo Tiro no ara mu, wɔne w’ahyɛn akwankyerɛfo;

⁹ Gebal mpanyin ne emu anyansafo nso wɔ wo mu repempam w’agowagow; ɛpo so ahyɛn nyinaa ne wɔn hyɛn mufo wɔ wo mu di w’aguade ho nsesagua

¹⁰ Persia ne Lidia ne Put wɔ wo dɔm mu yɛ w’akofo, wɔde kyɛm ne dade kyɛw sensɛn wo mu, wɔn na wɔmaa w’anim baa onyam.

¹¹ Arwadfo ne wo dɔm wɔ w’afasu so hyia, na Gamadfo wɔ w’aban atenten mu, wɔde wɔn akyɛm sensɛn w’afasu ho hyia, wɔn na wɔmaa w’ahoɔfɛ wiee yiyeyɛ.

¹² Tarsis ne wo guadifo, w’ade nyinaa dodow nti; dwetɛ, dade, sanyaa ne sumpii na wɔde bɛsesa wo hɔ ade;

¹³ Tawan, Tubal ne Mesek ne wo di gua, nnipa akra ne kɔbere ade na wɔde gye w’aguade;

¹⁴ Togarma fi na wofi de apɔnkɔ ne apɔnkɔfo ne mfurumpɔnkɔ ba de bɛsesa wo hɔ ade;

¹⁵ Dedanfo ne wo di gua; nsupɔw bebree so na wo nsa ano aguade kɔ; asonse amuamu ne duabo nnua na wɔde betua wo ka;

¹⁶ Siria ne wo di gua, w’ade a woyɛe no dodow nti; nsramma bo, ntama a ɛberedum ne nkyeremu ne nwera pa ne nnɛnkyerema na wɔde bɛsesa wo hɔ ade;

¹⁷ Yuda ne Israel asase ne wo di gua; Minit awi ne paanoo ne ɛwo ne ngo ne aneneduhuam na wɔde gye w’aguade;

¹⁸ Damasko ne wo di gua, w’ade a woyɛe no dodow so, ahode nyinaa dodow nti; wɔde Helbon bobesa ne nguan nwi fitaa ba;

¹⁹ Wedan ne Yawan fi Usal ba ne wo bedi nsesagua; dade a wɔabɔ, bɛwewonua ne mmetire yɛ wo nsesa ade;

²⁰ Dedan de apɔnkɔtam a wɔtena so ne wo di gua;

²¹ Arabia ne Kedar abirempɔn nyinaa yɛ wo nsa ano aguadifo: Nguammaa ne adwennini ne mpapo gua na wɔne wo di;

²² Seba ne Rama abatafo ne wo di gua, wɔde nnuhuam nyinaa mu titiriw ne aboɔden abo nyinaa ne sika ne wo bedi nsesagua;

²³ Haran ne Kane ne Eden, Seba abatafo, Asur, Kilmad ne wo di gua;

²⁴ wɔn na wɔyɛ w’abatafo, ntama afɛfɛ mu, bibitam ne nkyeremu nguguso mu, ne asaawa a wɔafura ademude, nhama a wɔafura na wɔakyim mu, wɔde gye w’aguade.

²⁵ Tarsis ahyɛn no ne w’akwantufo di w’aguadi mu akɔneaba, na woayɛ ma, na w’anim aba nyam, sɛ ɛpo horow no mfinimfini.

²⁶ Akwamfo no de wo kɔ nsu bebree mu, apuei mframa bobɔ wo ɛpo horow no mfinimfini.

²⁷ W’ade dodow ne w’adetɔnne, wo nsesa aguade, w’ahyɛn mufo ne w’ahyɛn akwankyerɛfo, wo mu agowagow pempamfo ne w’aguade sesa ne wo mu akofofo nyinaa ne w’asafo a wɔwɔ wo mu nyinaa, wɔbɛtotɔ bosonopo yam, w’asehwe da no.

²⁸ W’ahyɛn kwankyerɛfo nteɛm nne ma mpoano asase wosowosow,

²⁹ na wɔn a wokurakura atabon nyinaa, ahyɛn mufo, po ani kwankyerɛfo nyinaa fifi wɔn ahyɛn mu siansian begyinagyina fam,

³⁰ na wo so na wɔmoma wɔn nne so, na wɔteɛm yawyaw de dɔte gugu wɔn atifi yantayantam nso mu,

³¹ na wɔbobɔ tikwaw ma wo furafura ayitam na wɔde ɔkra awerɛhow ne abubuwbɔ yawyaw su ma wo,

³² na wobetwa wo ho kwadwom, wɔn adwotwa no mu ato wo ho dwom sɛ: Hena na ɔte sɛ Tiro a wɔama asɛe ayɛ dinn, ɛpo mu yi?

³³ W’aguade fi po nyinaa mu bae no, wode maa aman bebree mee, w’ahonyade ne w’aguade dodow na wode maa asase so ahene nyaa wɔn ho.

³⁴ Afei a wɔabobɔ wo afi ɛpo ani de wo ahyɛ nsudonkudonku mu yi, w’aguade ne w’asafo a ɛwo wɔ mu no nyinaa atotɔ.

³⁵ Mpoano aman nyinaa, wo nti wɔn ho dwiriw wɔn, na awɔse gu wɔn ahene so wɔn anim akisa.

³⁶ Aman mu aguadifo bɔ wo so hwirema hwee hwee; woapatu asɛe, na wunni hɔ bio de rekosi daa.