Hebrifo 8 - KYERƐW KRONKRON

Ɔsoro asɔfodi

¹ Na nsɛm a yɛreka yi mu titiriw ni: Yɛwɔ saa ɔsɔfo panyin a wakɔtena tumi kɛse ahengua no nifa, ɔsoro

² sɛ kronkronbea ne nokware ntamadan a Awurade ankasa, na ɛnyɛ onipa, pamee no mu sɔfo.

³ Na ɔsɔfo panyin biara wɔhyɛ no sɛ ɔmfa ayɛyɛde ne afɔre mma, enti ɛsɛ sɛ oyi nso nya biribi a ɔde bɛma.

⁴ Na sɛ ɔwɔ asase so de a, anka ɔnyɛ ɔsɔfo mpo, efisɛ asɔfo a wɔde ayɛyɛde ma, sɛnea mmara no te, wɔ hɔ dedaw.

⁵ Wɔn na wɔsom ɔsoro nneɛma nhwɛso ne mfonini, te sɛnea bere a Mose rebesiesie ntamadan no, ɛbaa ne nkyɛn a ese: Hwɛ, yɛ ade nyinaa sɛnea nsusuwso a wɔkyerɛɛ wo bepɔw no so no te.

⁶ Na afei ne nsa aka asɔfodwuma a ɛkyɛn so, sɛ wayɛ apam a ɛkyɛn so a wogyina bɔhyɛ a ɛkyɛn so so hyɛɛ ho mmara no ntamgyinafo.

Apam foforo bɔhyɛ

⁷ Na sɛ kan apam no ho nni asɛm a, anka wɔnhwehwɛ nea ɛto so abien tobea.

⁸ Na onunu wɔn sɛ: Hwɛ, nna bi reba, Awurade na ose, sɛ me ne Israel fi ne Yuda fi bɛpam apam foforo,

⁹ ɛnte sɛ apam a me ne wɔn agyanom pamee da a misusoo wɔn nsa miyii wɔn mifii Misraim asase so no; efisɛ wɔn de, wɔantena m’apam mu, na me nso mannwen wɔn ho, Awurade na ose.

¹⁰ Na eyi ne apam a nna no akyi me ne Israel fi bɛpam no, Awurade na ose: Mede me mmara mɛhyɛ wɔn adwenem, na makyerɛw wɔ wɔn komam, na mayɛ wɔn Onyankopɔn, na wɔn nso ayɛ me ɔman.

¹¹ Na obi renkyerɛkyerɛ ne kuromani, obi renkyerɛ ne nua sɛ: Hu Awurade! Na wɔn nyinaa behu me afi wɔn mu akumaa so akosi ɔkɛse so.

¹² Na mɛdom wɔn wɔn amumɔyɛ ho, na wɔn bɔne de, merenkae bio.

¹³ Nea ɔka sɛ, “foforo” yi no, ɔde ama kan de no dedaw; na nea ɛreyɛ dedaw na ɛretwa mu no, aka kakra na ayera.