Ester 1 - KYERƐW KRONKRON

Wɔtu Ɔhemmea Wasti ade so

¹ Na Ahas-weros bere so, Ahas-weros a odii hene fi India de kosii Etiopia, amantam ahorow ɔha aduonu ason so no.

² Saa bere no na, ɔhene Ahas-weros te n’ahengua a ɛwɔ Susan abankɛse no mu no so,

³ n’ahenni afe a ɛto so abiɛsa mu no, ɔtow ne mmapɔmma nyinaa ne ne nkoa pon, a Persia ne Media dɔm so atumfo ne mmakoma ne amantam no so asafohene wɔ n’anim.

⁴ Ɛno mu na oyii n’ahenni anuonyam dodow ne ne kɛseyɛ haran ne ne fɛ no kyerɛe nna pii, nnafua ɔha aduɔwɔtwe.

⁵ Na nna yi wiee du no, ɔhene no tow nkurɔfo a wɔwɔ Susan abankɛse no mu nyinaa pon fi ɔkɛse so koduu akumaa so nnansɔn, ahemfi turo no abangua so,

⁶ nwera ne bibitama sensɛn hɔ, wɔde nhama fufu ne nea ɛberedum asuso mu akyekyere dwetɛ nkaa wɔ mu, abofufu adum ho; sika ne dwetɛ nnae wowɔ abohemmaa ne abohyɛn ne abobiri ne dame nsɛwee so.

⁷ Na wɔhyehyɛɛ nsa, sika nkuruwa mu, na nkuruwa no nso gu ahorow, na ɔhene nsa no dɔɔso, sɛnea ɛwɔ ɔhene no nsam.

⁸ Na nsa no nom nso wɔyɛɛ no sɛnea mmara no te; wɔnnhyɛ obiara; na saa na na ɔhene no ahyɛ ne fi so mpanyin nyinaa, sɛ onipa biara nipa nyɛ sɛnea ɔpɛ.

⁹ Ɔhemmea Wasti nso tow mmea pon ɔhene Ahas-weros ahemfi.

¹⁰ Da a ɛto so ason a nsa ama ɔhene no ani agye no, ɔka kyerɛɛ Mehuman, Bista, Harbona, Bigta ne Abagta, Setar ne Karkas, mpiafo baasɔn no a wɔsom ɔhene Ahas-weros anim no,

¹¹ sɛ wɔnkɔfa ɔhemmea Wasti mmra ɔhene anim, ahenni abotiri no mu, na ɔmma aman no ne mmapɔmma no nhu n’ahoɔfɛ, efisɛ ne ho yɛ fɛ.

¹² Nanso ɔhemmea Wasti amma sɛnea ɔhene somaa mpiafo ma wɔbɛhyɛɛ no no. Ɛnna ɔhene no bo hurui sɛ, na n’abufuw dɛwee ne mu.

¹³ Na ɔhene no ka kyerɛɛ mpanyimfo a wonim mmara no, (efisɛ saa na ɔhene asɛm ba wɔn a wonim mmara ne asɛnni no anim,

¹⁴ na wɔn a wɔbɛn no ne: Karsena, Setar, Admata, Tarsis, Meres, Marsena, Memukan, Persia ne Media mmapɔmma baasɔn a wohuu ɔhene anim ne ahenni no mu atitiriw no),

¹⁵ sɛ: Dɛn na mmara no ka sɛ wɔmfa nyɛ ɔhemmea Wasti, sɛ wanni ɔhene Ahas-weros asɛm a mpiafo no kɔka kyerɛɛ no so no?

¹⁶ Na Memukan kae ɔhene ne mmapɔmma no anim sɛ: Ɛnyɛ ɔhene nko ara na ɔhemmea Wasti afom no, na wafom mmapɔmma nyinaa ne amanaman a wɔwɔ ɔhene Ahas-weros nsase nyinaa so no nso.

¹⁷ Na wɔbɛka ɔhemmea no asɛm no akyerɛ mmea nyinaa, na wobebu wɔn kununom animtiaa aka sɛ: Ɔhene Akas-weros kae sɛ wɔmma ɔhemmea Wasti mmra n’anim, na wamma.

¹⁸ Na ɛnnɛ da yi Persia ne Media mmea adehye a wɔate ɔhemmea no asɛm no bɛkeka akyerɛ ɔhene asafohene nyinaa, na animtiaabu ne abohuru bɛdɔɔso.

¹⁹ Sɛ ɔhene pɛ a, ɔmma asɛm bi mfi ne hɔ, na wɔnkyerɛw no Persia ne Media mmara nsɛm mu, na wɔannan ani sɛ: Wasti mmma ɔhene Ahas-weros anim bio; na ɔhene mfa ne hemmaadi no mma ne yɔnko a oye sen no.

²⁰ Na wɔbɛte ɔhene asɛm a ɔrebedi yi n’ahenni nyinaa mu, na ɛso, na ɔyerenom nyinaa ani asosɔ wɔn kununom, efi ɔkɛse so kosi akumaa so.

²¹ Na asɛm no sɔɔ ɔhene ne mmapɔmma no ani, na ɔhene no yɛe sɛ, Memukan kae no.

²² Na ɔsoma ma wɔde nhoma kokɔɔ ɔhene no amantam nyinaa so, na wɔde kɔɔ asase biara so sɛ ne nkyerɛwee te, ne ɔman biara so sɛ ne kasa te: Sɛ ɔbarima biara nni ne fi so panyin, na ɔmfa ne man kasa nka mma wɔnte.