Atemmufo 6 - KYERƐW KRONKRON

Gideon frɛ

¹ Na Israelfo yɛɛ nea ɛyɛ AWURADE ani so bɔne, na AWURADE de wɔn hyɛɛ Midian nsa mfe asɔn.

² Na Midian nsa yɛɛ Israel so den. Midian nti Israelfo yɛɛ atu a ɛwɔ mmepɔw mu ne abodan ne hintabea fae.

³ Na sɛ Israel nya gu nneɛma a, na Midian ne Amalek ne apueifo no aforo aba wɔn so,

⁴ na wɔbɛbɔ wɔn so nsra, na wɔsɛe asase no so nnɔbae de kodu Gasa, na wonnyaw aduan bi anaa oguan sɛ nantwi sɛ afurum bi wɔ Israel.

⁵ Na wɔde wɔn mmoa ne wɔn ntamadan ba, na wɔba sɛ mmoadabi pii pa; wɔne wɔn yoma nni ano, na wɔba asase no so bɛsɛe no.

⁶ Na Israel gurowee Midian anim sɛ, na Israelfo su frɛɛ AWURADE.

⁷ Na Midian nti Israelfo su frɛɛ AWURADE no,

⁸ AWURADE somaa ɔbarima diyifo bi baa Israelfo nkyɛn, na ɔka kyerɛɛ wɔn sɛ: Sɛ AWURADE Israel Nyankopɔn se ni: Me na mema moforo fii Misraim bae, na miyii mo nkoafi mu,

⁹ na migyee mo Misraim nsam ne mo ahawfo nyinaa nsam, na mituu wɔn fii mo anim, na mede wɔn asase memaa mo;

¹⁰ na misee mo sɛ: Mene AWURADE mo Nyankopɔn, munnsuro Amorifo a mote wɔn asase so no anyame, nanso moantie me nne.

¹¹ Na AWURADE bɔfo bae bɛtenaa odupɔn a ɛwɔ Ofra a ɛyɛ Abi-eserni Yoas de no ase; na ne ba Gideon reporow awi nsa-kyi-amoa mu, sɛ ɔde rehintaw Midianfo.

¹² Na AWURADE bɔfo no yii ne ho kyerɛɛ no, na ɔka kyerɛɛ no sɛ: AWURADE di w’akyi, wo dɔmmarima.

¹³ Na Gideon ka kyerɛɛ no sɛ: Wo kyɛw ni, me wura, sɛ AWURADE di yɛn akyi a, anka ɛdɛn na eyi nyinaa ato yɛn yi? Na ɛhe na n’anwonwade a yɛn agyanom kaa yɛn sɛ: Misraim na Awurade yii yɛn, no nyinaa wɔ? Na afei Awurade apa yɛn, na ɔde yɛn ahyɛ Midian nsayam.

¹⁴ Na Awurade dan n’ani kyerɛɛ no na ɔkae sɛ: Fa w’ahoɔden yi ara kɔ kogye Israel Midian nsam; ɔsoma na masoma wo yi!

¹⁵ Na ɔka kyerɛɛ no sɛ: Wo kyɛw ni, Awurade, dɛn na mede megye Israel? Hwɛ, m’asafo agurow Manase mu, na me nso, mene akumaa m’agya fi.

¹⁶ Na AWURADE ka kyerɛɛ no sɛ: Ampa, medi w’akyi na woakum Midian sɛ onipa biako.

¹⁷ Na ɔka kyerɛɛ no sɛ: Afei sɛ manya w’anim anuonyam a, ɛnne yɛ sɛnkyerɛnne bi kyerɛ me, sɛ ɛyɛ wo na wo ne me rekasa yi.

¹⁸ Afei mfi ha kosi sɛ mɛkɔ maba wo nkyɛn na mede m’ayɛyɛde mabesi w’anim. Na ose: Mɛtwɛn akosi sɛ wobɛsan aba.

¹⁹ Na Gideon kɔe kosiesiee apapowa ne asikresam olonka biako apiti; nam no ɔde hyɛɛ kɛntɛn mu, na ɛho nsu no ohwie guu kuku mu, na ɔde fii adi baa ne nkyɛn odupɔn no ase, na ɔde brɛɛ no.

²⁰ Na Onyankopɔn bɔfo no ka kyerɛɛ no sɛ: Fa nam no ne apiti no gu ɔbotan a ɛwɔ ha yi so, na ɛho nsu no, hwie gu. Na ɔyɛɛ sa.

²¹ Ɛnna AWURADE bɔfo no teɛɛ poma a ekura no no de ano kaa nam ne apiti no, na ogya fi ɔbo no mu bɛhyew nam ne apiti no. Na AWURADE bɔfo no fii n’anim kɔe.

²² Na Gideon huu sɛ ɛyɛ AWURADE bɔfo no, Gideon kae sɛ: Ao, AWURADE Nyankopɔn! Afei na mahu AWURADE bɔfo anim ne anim.

²³ Na AWURADE ka kyerɛɛ no sɛ: Asomdwoe nka wo, nsuro, worenwu.

²⁴ Ɛnna Gideon sii afɔremuka hɔ maa AWURADE, na ɔfrɛɛ no: Yahwe-salom. Ɛda so wɔ Ofra a ɛyɛ Abi-eserfo de no de besi nnɛ.

²⁵ Na anadwo no ara AWURADE ka kyerɛɛ no sɛ: Fa w’agya nantwinini, nantwinini a ɔto so abien a wadi mfe ason no, na koburuw Baal afɔremuka a ɛyɛ w’agya de no, na twitwa ɛho Asera nnua no gu.

²⁶ Na si afɔremuka ma AWURADE wo Nyankopɔn, bepɔw a ɛyɛ den yi atifi, sɛ ɛho nhyehyɛe te. Na fa nantwinini a ɔto so abien no bɔ ɔhyew afɔre Asera nnua a wubetwa no nnyina no so.

²⁷ Na Gideon faa ne nkoa mu mmarima du, na ɔyɛe sɛnea AWURADE ka kyerɛɛ no no; na sɛ osuro n’agya fi ne kurom hɔfo no sɛ ɔbɛyɛ no awia nti, ɔyɛɛ no anadwo.

²⁸ Na kurom hɔfo no sɔree anɔpa no, na hwɛ, wɔaburuw Baal afɔremuka no, na wɔatwitwa ɛho Asera nnua no, na wɔahyew nantwinini a ɔto so abien no, afɔremuka a wɔasi no so.

²⁹ Na wosisee wɔn ho wɔn ho sɛ: Hena na odii saa asɛm yi? Na wobisa hwehwɛɛ akyiri kwan; na wose: Yoas ba Gideon na odii saa asɛm yi.

³⁰ Na kurom hɔfo ka kyerɛɛ Yoas sɛ: Yi wo ba no bra na ommewu, efisɛ waburuw Baal afɔremuka na watwitwa ɛho Asera nnua no.

³¹ Ɛnna Yoas ka kyerɛɛ nnipa a wɔsɔre hyɛɛ no no nyinaa sɛ: So mo na mobɛko ama Baal, anaasɛ mubegye no? Nea ɔbɛko ama no no, wonkum no anɔpa yi; sɛ ɔyɛ onyame a, ɔno ara nko mma ne ho, sɛ wɔaburuw n’afɔremuka.

³² Na wɔfrɛɛ no Yerubaal da no ara se: Baal ne no nni sɛ waburuw n’afɔremuka.

³³ Na Midian ne Amalek ne Apueifamfo n nyinaa bɛboaa wɔn ho ano, na wotwa bɛbɔɔ nsra Yesreel bon mu.

³⁴ Na AWURADE honhom sii Gideon so, na ɔhyɛn torobɛnto, na Abi-eserfo hyia bedii n’akyi.

³⁵ Na ɔsomaa abɔfo kɔɔ Manase nyinaa, na wɔn nso hyiae bedii n’akyi. Na ɔsomaa abɔfo kɔɔ Aser ne Sebulon ne Naftali, na wɔforo bae behyiaa no.

³⁶ Na Gideon ka kyerɛɛ Onyankopɔn sɛ: Sɛ ɛwom sɛ me so na worebɛfa agye Israel sɛnea wokae no a,

³⁷ hwɛ, mede oguanten nwi merebɛhata awiporowbea; sɛ obosu tɔ nwi no nko so, na fam hɔ nyinaa wo a, ɛno na mehu sɛ me so na wobɛfa agye Israel, sɛnea wokae no.

³⁸ Na n’adekyee anɔpa a ɔsɔree no, okyim nwi no, na okyii nwi no mu obosu hyɛɛ kora ma.

³⁹ Na Gideon ka kyerɛɛ Onyankopɔn sɛ: Mma wo bo mmfuw me, na ma menkasa prɛko yi bio. Ma memfa nwi no mensɔ menhwɛ prɛko bio: Ma nwi no nko nwo na obosu ntɔ ngu fam hɔ nyinaa.

⁴⁰ Na Onyankopɔn yɛɛ saa anadwo no, na nwi no nko woe, na fam hɔ nyinaa, obosu tɔ guu hɔ.