Atemmufo 15 - KYERƐW KRONKRON

Samson ne sakraman ahasa no

¹ Na ɛkyɛe kakra no, awitwa bere mu, Samson de apapowa kɔe sɛ ɔrekɔhwɛ ne yere anim, na ɔkae sɛ: Mɛkɔ me yere nkyɛn pia mu. Nanso ɔbea no agya amma no kwan ankɔ mu.

² Na n’ase kae sɛ: Me de, mise, wompɛ no bio, enti mede no mama wo yɔnko bi. Ne nua kumaa no ho yɛ fɛ sen no. Fa no si n’ananmu.

³ Na Samson ka kyerɛɛ wɔn sɛ: Eyi de, sɛ me ne Filistifo di no bɔne a, merenni ho so bi.

⁴ Na Samson siim kɔe kɔkyeree sakraman ahasa, na ɔfaa agyatɛn, na ɔde dua sii dua anim de gyatɛn hyɛɛ dua abien biara ntam.

⁵ Na ɔsosɔɔ agyatɛn no ano, na ogyaa wɔn kɔɔ Filistifo no awifuw mu ma ɛhyew awi akuwakuw ne awi a esisi hɔ ne ngodua nturo no.

⁶ Ɛnna Filistifo no kae sɛ: Hena po na ɔyɛɛ eyi? Na wose: Timnani no ase Samson, sɛ ɔde ne yere ama ne yɔnko ntia. Ɛnna Filistifo no siim kɔe de ogya kɔhyew Timnani no ne n’agya fi.

⁷ Na Samson ka kyerɛɛ wɔn sɛ: Sɛ moayɛ saa a, gye sɛ matɔ mo were ansa na magyae.

⁸ Na ɔbobɔɔ wɔn srɛ ne dwonku so kunkum wɔn okunkɛse. Na osiim kɔtenaa Etam botan tokuru mu.

Samson ne afurum abogye

⁹ Ɛnna Filistifo bae bɛbɔɔ Yuda so nsra, na wɔtrɛw wɔn ho mu wɔ Lehi.

¹⁰ Na Yuda mmarima no kae sɛ: Ɛdɛn nti na moba yɛn so yi? Na wose: Yɛreba abɛkyere Samson, na yɛayɛ no sɛnea ɔyɛɛ yɛn no.

¹¹ Na Yuda mmarima mpensa siim kɔɔ Etam botan tokuru no mu, na wɔka kyerɛɛ Samson sɛ: So wunnim sɛ Filistifo na wodi yɛn so, na ɛdɛn na woayɛ yɛn yi? Na ɔka kyerɛɛ wɔn sɛ: Sɛ wɔyɛɛ me no, saa ara na mayɛ wɔn.

¹² Na wɔka kyerɛɛ no sɛ: Yɛreba abɛkyere wo de wo akɔhyɛ Filistifo no nsa. Na Samson ka kyerɛɛ wɔn sɛ: Monka me ntam sɛ mo ara de, morenyɛ me hwee.

¹³ Na wɔka kyerɛɛ no sɛ: Dabi, na ɔkyere nko na yɛrebɛkyere wo de wo akɔhyɛ wɔn nsa. Na okum de, yɛrenkum wo. Na wɔde ntampehama foforo abien kyeree no, na wɔde no foro fii ɔbotan no mu.

¹⁴ Ɔreyɛ adu Lehi no, Filistifo no bɔɔ no so ose. Na AWURADE honhom sii no so dennennen, na ntampehama a ɛwɔ ne basa ho no yeyɛɛ sɛ asaawa a wɔde ogya aka, na ne nhama no sansan fii ne nsa.

¹⁵ Na ohuu afurum abogye foforo bi, na ɔteɛɛ ne nsa fae de kunkum mmarima apem.

¹⁶ Na Samson kae sɛ: Mede afurum abogye ekuw ni, akuw abien ni mede afurum abogye makunkum mmarima apem.

¹⁷ Na owiee ɔkasa no, ɔtow abogye no kyenee, na wɔfrɛɛ hɔ sɛ Ramat-lehi.

¹⁸ Na osukɔm dee no sɛ, na osu frɛɛ AWURADE sɛ: Wo na wode ogye kɛse yi ahyɛ w’akoa nsa, na afei osukɔm rekum me, na mahwe momonotofo nsam.

¹⁹ Na Onyankopɔn paee tokuru a ɛwɔ Lehi no mu, na nsu fi hɔ bae, na ɔnomee. Na ne honhom san bae na onyaa nkwa. Enti wɔfrɛ hɔ En-hakore a ɛwɔ Lehi de besi nnɛ ara.

²⁰ Na odii Israel anim Filistifo bere no so mfirihyia aduonu.