Asomafo 27 - KYERƐW KRONKRON

Paulo si mu kɔ Roma

¹ Na wosii gyinae sɛ yɛnkɔ Italia no, woyii Paulo ne apokyerɛfo bi maa asraafo ha so panyin bi a ne din de Yulio a ofi Augustan asraafo kuw mu.

² Na yɛkɔɔ Adramitio hyɛn bi a ɛrebɛkɔ Asia fam mu no, yetui, na Makedoniani Aristarko a ofi Tesalonika ka yɛn ho.

³ Na n’adekyee no, yekogyinaa Sidon. Na Yulio yɛɛ Paulo adɔe maa no kwan sɛ ɔnkɔ ne nnamfonom nkyɛn ma wɔnhwɛ no.

⁴ Na yetu fii hɔnom no, yɛfaa Kipro ase ase, efisɛ mframa hyiaa yɛn.

⁵ Na yɛfaa Kilikia ne Pamfilia po so no, yekogyinaa Likia kurow Mira ho.

⁶ Ɛhɔ na asraafo ha so panyin no huu Aleksandria suhyɛn bi a ɛrekɔ Italia no, ɔde yɛn koguu mu.

⁷ Na nnafua bebree na yɛnam brɛoo, na yɛbrɛe ansa na yɛrebɛn Knido, na mframa amma yɛn ho kwan nti, yɛfaa Krete ase ase twaa Salmone ho.

⁸ Na yɛnam ano ano resan no, yɛbrɛɛ mu ansa na yɛredu baabi a wɔfrɛ hɔ Hyɛn-agyinaye a Lasea kurow bɛn ho.

⁹ Na esiane sɛ na bere kɔ pii, na mmuadadi bere no atwam dedaw na, nsu ani fa ayɛ hu nti, Paulo tuu wɔn fo

¹⁰ see wɔn sɛ: Mmarima, mihu sɛ akwantu yi rekɔyɛ sɛ nea amane ne adesɛe bebree bɛba mu, ɛnyɛ aguade ne hyɛn yi fam nko, na yɛn nkwa nso wom bi.

¹¹ Nanso asraafo ha so panyin no gyee hyɛn kwankyerɛfo ne hyɛn wura no dii kyɛn nea Paulo kae no.

¹² Na esiane sɛ hyɛn gyinabea hɔ nna hɔ yiye sɛ wobedi awɔw bere hɔ nti, wɔn mu bebree kae sɛ wobetu afi hɔ nso akɔhwɛ sɛ wobetumi akodu Foenike a ɛyɛ Krete hyɛn gyinabea a ɛda kɔ atifi ne atɔe ntam, ɛne anafo ne atɔe ntam, na wɔakodi awɔw bere wɔ hɔ.

Ahum tu wɔ ɛpo no so

¹³ Na anafo mframa fii ase bɔe no, ɛyɛɛ wɔn sɛ wɔn nsa aka nea wɔde sii wɔn anim no, na wotuu sɛkyɛ nam ano ano a wɔbɛn Krete.

¹⁴ Na ankyɛ, na mframa kɛse bi a wɔfrɛ no Atifi-apuei-mframa faa Krete so bɛbɔe;

¹⁵ na ɛkyeree hyɛn no na entumi nhyia mframa no no, yɛma ɛtwee yɛn.

¹⁶ Na yɛde mmirika kɔfaa supɔw ketewa bi a wɔfrɛ no Klauda ase no, yɛbɔɔ mmɔden ansa na yesusoo ɔkorow no mu.

¹⁷ Na wɔmaa so no, wɔboa kyekyeree hyɛn no; na wosuroe sɛ ebia wɔbɛkɔ akɔhwe Anweatam no so nti, wohuan hyɛndua no, na ɛtwee wɔn saa.

¹⁸ Na mframa no bɔe dennen de yɛn kyinkyinii, na ade kyee no, wɔtotow hyɛn no mu nneɛma bi gui.

¹⁹ Na ne nnansa so no, wɔde wɔn ankasa nsa totow hyɛn no ho nneɛma no kyenee.

²⁰ Na nnafua bebree na owia anaa nsoromma mpuei, nso na mframa a ɛrebɔ yɛn nyɛ adewa, enti yɛn nkwagye ho anidaso nyinaa yerae.

²¹ Na nna bebree twaam a yɛannidi no, Paulo sɔre gyinaa wɔn mfinimfini kae sɛ: Mmarima, ɛsɛ sɛ anka mutie me, na yɛamfi Krete ammehu amane ne adesɛe yi.

²² Na afei mitu mo fo sɛ momma mo bo ntɔ mo yam, na mo mu biara kra renyera, gye hyɛn yi.

²³ Na anadwo yi, Onyankopɔn a meyɛ ne de na mesom no no bɔfo begyinaa me nkyɛn

²⁴ kae sɛ: Paulo, nsuro! Etwa sɛ wokogyinaa Kaesare anim; na hwɛ, Onyankopɔn de wɔn a wɔne wo nam no nyinaa akyɛ wo.

²⁵ Enti, mmarima, momma mo bo ntɔ mo yam, na migye Onyankopɔn midi sɛ ɛbɛyɛ sɛnea wɔaka akyerɛ me no;

²⁶ nanso etwa sɛ yekogu supɔw bi so.

²⁷ Na dadu nnanan dui na yɛredi akɔneaba Adria po so no, ɛbɛyɛ sɛ ɔdasum na hyɛn no mu adwumayɛfo no hui sɛ wɔrebɛn asase bi.

²⁸ Na wɔtow susuhama, na wohui sɛ esi abasam aduonu; na wɔkɔɔ wɔn anim kakra no, wɔtowee bio, na wohuu no abasam dunum.

²⁹ Na wosuroe sɛ ebia yɛbɛkɔ akɔhwe abotan bi so nti, wɔtow asɛkyɛ anan fi hyɛn no to twɛn adekyee.

³⁰ Na esiane sɛ hyɛn mu adwumayɛfo no hwehwɛ aguan afi hyɛn no mu nti, wogyaa ɔkorow no mu too po mu yɛe sɛnea wɔrekɔtow sɛkyɛ afi hyɛn no ti nso no,

³¹ Paulo ka kyerɛɛ asraafo ha so panyin ne asraafo no sɛ: Sɛ eyinom antena hyɛn yi mu de a, morennya nkwa.

³² Ɛnna asraafo no twaa ɔkorow no ntampehama no, na wɔma ɛkɔe.

³³ Na ade rebɛkye no, Paulo srɛɛ wɔn nyinaa sɛ wonnidi, na ɔkae sɛ: Dadu nnanan ni a moatena hɔ adi mmuada a momfaa biribi nkaa mo ano ɛ.

³⁴ Enti mesrɛ mo sɛ munnidi, na ɛno nso begye mo nkwa bi. Na mo mu biara nwi biako po rentɔ fam.

³⁵ Na ɔkaa saa na ɔfaa abodoo no, ɔdaa Onyankopɔn ase wɔn nyinaa anim, na obubui fii ase dii.

³⁶ Na wɔn nyinaa bo tɔɔ wɔn yam, na wɔn nso faa bi dii.

³⁷ (Na yɛn a yɛwɔ hyɛn no mu nyinaa si akra ahanu aduɔsɔn asia.)

³⁸ Na wodidi mee no, wɔtow aduan no guu po mu maa hyɛn no yɛɛ hare.

Hyɛn no bɔ

³⁹ Na ade kyee no, na wonnim asase no. Na wohuu dɔnnɔn bi a ɛho mpoano da hɔ; ɛno mu na wosusuwii sɛ wobetumi a, wɔbɛtwe hyɛn no akɔ.

⁴⁰ Na wotwaa asɛkyɛ no ahama mu gyaa mu guu po mu, na wɔsan akyerɛkyerɛkwan no ahama, na wosii suhyɛn no anim abrannaa maa mframa a ɛbɔe no pia kɔɔ mpoano.

⁴¹ Na wɔkɔhwee baabi a ɛpo abu kɔntɔn no, wɔde suhyɛn no kɔtaae, na eti kotimii, na ɛkaa hɔ pintinn, na ɛto de, asorɔkye a ɛbɔ dennen no bubuu no.

⁴² Na asraafo no tuu agyina sɛ wobekum nneduafo no, na obi anguare anguan.

⁴³ Nanso asraafo ha so panyin no pɛ sɛ ogye Paulo nti, wamma wɔanyɛ nea wosusuwii no, na ɔhyɛe sɛ wɔn a wobetumi aguare mfa wɔn ho ngu po mu kan nsi fam.

⁴⁴ Na wɔn a aka no de, ebinom butubutuw ntaaboo so, na ebinom nso butubutuw suhyɛn nnua asinasin no bi so. Na sɛnea ɛyɛe na yɛn nyinaa nyaa nkwa sii fam ne no.