Amos 6 - KYERƐW KRONKRON

Adwenharefo ne ahantanfo no asotwe

¹ Wonnue, wɔn a wɔte Sion dwoodwoo ne wɔn a wɔde wɔn ho to Samaria bepɔw so, wɔn a wɔdɛnsow amanaman mu adikanfo mu, wɔn a Israel fi kɔ wɔn nkyɛn no.

² Monsen nkɔ Kalne nkɔhwɛ, na mumfi hɔ nkɔ Hamat kɛse, na munsian nkɔ Filistifo Gat. So woye sen ahenni yi, anaasɛ wɔn hye mu trɛw sen mo hye?

³ O mo a mutu da bɔne hyɛ akyirikyiri, na mode nhyɛso agua twiw bɛn.

⁴ Wɔdeda asonse mpadua so, na wɔtwe wɔn mu wɔn nnae so, na wodi nguanten mma a wofi nguankuw mu, ne nantwi mma a wofi ɔyɛn dan mu;

⁵ wɔto ahuhudwom de yi sanku ano, na wɔbɔ wɔn tirim yɛ asanku sɛ Dawid;

⁶ wɔnom nsa nkora mu, na wɔde ngohuam sra wɔn ho, nanso Yosef sɛe de ɛnyɛ wɔn yaw.

⁷ Enti afei wɔn na wobedi atukɔfo kan atu akɔ, na saguaasefo gyegyeegye no agyae.

⁸ AWURADE Nyankopɔn aka ne ho ntam, AWURADE, asafo Nyankopɔn, asɛm ni: Me de, Yakob ahantan ayɛ me nwini, na metan n’aban afɛfɛ no, na meyi kurow no ne ne mayɛ mama.

⁹ Na sɛ wogyaw nnipa du ofi koro mu a, owu ara na wobewuwu.

¹⁰ Na obi busuani ne nea ɔhyew no bɛma no so sɛ ɔreyi nnompe no afi fie hɔ, na ɔbɛka akyerɛ nea ɔwɔ ofi mpiakyiri mu no sɛ: So obi da so ne wo wɔ hɔ? Na ɔbɛka sɛ: Wɔasa! Na ɔno nso bɛka sɛ: Mua w’ano! Na wɔmmɔ AWURADE din so.

¹¹ Na hwɛ, AWURADE ahyɛ, na wɔbɛbɔ ofi kɛse no pasapasa, ne ofi ketewa no nso dukuduku.

¹² So apɔnkɔ tutu ɔbotan so mmirika anaasɛ wɔde anantwi fɛtɛw hɔ nti na modan atemmu bɔnwoma na modan trenee aba awɔnwene?

¹³ Mo a mo ani gye Lo-debar ho na moka sɛ: So ɛnyɛ yɛn ahoɔden na yɛde agye Karnaim afa?

¹⁴ Na hwɛ, merema ɔman bi asɔre ahyɛ mo, Israel fi, AWURADE, asafo Nyankopɔn, asɛm ni, na wɔabɛhaw mo afi nea wɔfa kɔ Hamat akosi tataw so subon Araba no ano.