Amos 5 - KYERƐW KRONKRON

Adwotwa ne ahonu frɛ

¹ Muntie asɛm yi a merema so mo ho a ɛyɛ kwadwom, O Israel fi.

² Ababaa Israel atɔ, ɔrensɔre bio, wɔahwe no ase n’asase so, nea ɔbɛma no so nni hɔ.

³ Na sɛ AWURADE Nyankopɔn se ni: Kurow a wɔde apem fi adi bɛka ɔha, na kurow a wɔde ɔha fi adi bɛka du ama Israel fi.

⁴ Na sɛ AWURADE ka kyerɛ Israel fi ni: Monhwehwɛ m’akyi kwan na munnya nkwa.

⁵ Na monnhwehwɛ Betel akyi kwan, na monnkɔ Gilgal, na munntwam nnkɔ Beer-seba; na Gilgal begyina akɔ otukɔ mu, na Betel bɛdan ahuhuw.

⁶ Monhwehwɛ AWURADE akyi kwan na munnya nkwa, na wampue sɛ ogya Yosef fi, na wanhyew a obi a obedum nni hɔ mma Betel;

⁷ mo a modan atemmu awɔnwene na mode trenee hwehwe fam no!

⁸ Ɔno na ɔyɛ nsoromma ahorow a ebi ne: Aberewa-ne-ne-mma ne Nyankrɛnte, na ɔdan sum kabii adekyee, na ɔma awia duru sum sɛ anadwo, ɔfrɛ ɛpo mu nsu hwie gu asase ani, AWURADE ne ne din.

⁹ Ɔma ɔsɛe ba otumfo so sɛ anyinam, na ɔsɛe nso ba aban a ɛyɛ den so.

¹⁰ Wɔtan nea ɔteɛ so, kurow pon mu, na wokyi nea ɔka nsɛm a ɛyɛ pɛ.

¹¹ Enti sɛ mutiatia ɔbrɛfo so na mugye ne hɔ awi pae nti, mode abo a wɔatwa atoto aban, nanso morentena mu, moatɛw bobe nturo a ɛyɛ fɛ, nanso morennom mu nsa.

¹² Na minim sɛ mo mmarato dɔɔso na mo bɔne mu yɛ den; muhiahia ɔtreneeni ho na mugyigye mpata, na mokyea ahiafo asɛm kurow pon mu.

¹³ Ne saa nti ɔba nimdefo mua n’ano, ɛbere no mu, efisɛ ɛyɛ bere bɔne.

¹⁴ Monhwehwɛ papa, na ɛnyɛ bɔne, na moanya nkwa, na AWURADE, asafo Nyankopɔn, ne mo atena, sɛnea moka no.

¹⁵ Montan bɔne na monnɔ papa, na momma atɛmpa ntim kurow apon mu; ebia AWURADE, asafo Nyankopɔn, behu Yosef nkae no mmɔbɔ.

¹⁶ Enti sɛ AWURADE, asafo Nyankopɔn, AWURADE no, se ni: Adwotwa wɔ mmɔnten nyinaa so, na wɔka mmorɔn nyinaa so sɛ: Buei, buei! Na wɔfrɛ okuafo ma obesu, ne wɔn a wonim osu ma wobetwa agyaadwo.

¹⁷ Na adwotwa wɔ bobe nturo nyinaa mu, efisɛ mɛsan mafa wo mu, AWURADE na ose.

¹⁸ Wonnue, wɔn a wɔfe AWURADE da no! AWURADE da yi bɛyɛ mo dɛn? Ɛyɛ esum, na ɛnyɛ hann.

¹⁹ Ɛte sɛnea obi guan fi gyata anim na osisi hyia no, na ɔba ofie na ɔde ne nsa tweri ɔfasu na ɔwɔ ka no.

²⁰ So AWURADE da no yɛ sum? So ɛyɛ hann? Ɛyɛ kusuu, na ɛnhyerɛn!

²¹ Metan na mepo mo nnapɔnna, na m’ani nnye mo afahyɛ nhyiam ho.

²² Na sɛ mobɔ mo hyew afɔre ma me na mode mo aduan ayɛyɛde brɛ me a, m’ani rensɔ, na mo nyɛmmoa asomdwoe afɔre nso, merenhwɛ.

²³ Yi wo dwonto gyegyeegye fi me so, na merentie wo sankubɔ nso.

²⁴ Na atemmu mpirew mmra sɛ nsu, na trenee mmra sɛ asu a ɛsen daa.

²⁵ O Israel fi, so mode okum afɔre ne aduan ayɛyɛde brɛɛ me sare so mfirihyia aduanan?

²⁶ Mmom mosoa mo hene Sikut ne mo ahoni Kiun no, mo nsoromma anyame a moyɛ fae no.

²⁷ Enti metu mo akɔ Damasko akyi noho, AWURADE na ose, asafo Nyankopɔn ne ne din.