Amos 3 - KYERƐW KRONKRON

Amos kasa tia Israel

¹ Muntie asɛm yi a AWURADE aka wɔ mo, Israelfo ho, mo a moyɛ mmusua a miyii mo fii Misraim asase so bae no nyinaa ho sɛ:

² Mo nko na mahu mo, asase so mmusua nyinaa mu, enti nso, mo na metua mo, mo amumɔyɛ nyinaa so ka.

³ So baanu bɔ mu nantew a wɔanyɛ nokoro kan?

⁴ So gyata bobom kwae mu a aboa bi nni n’anim anaa? So gyataforo ma ne nne so fi ne tu mu a ɔnkyere biribi?

⁵ So anomaa tɔ afirim ɛfam a hentia bi nni hɔ mma no? So afiri bi huan fi fam a enyii biribi anaa?

⁶ Anaasɛ wɔhyɛn torobɛnto kurow mu a ɔman mmɔ piriw? Anaasɛ bɔne bi ba kurow bi mu a ɛnyɛ AWURADE na ɔma ɛbae?

⁷ Ampa ara AWURADE Nyankopɔn renyɛ biribi gye sɛ wayi n’agyina adi akyerɛ ne nkoa adiyifo no ansa.

⁸ Gyata abobom, hena na ɔrensuro? AWURADE Nyankopɔn akasa, hena na ɔrenhyɛ nkɔm?

Samaria sɛe

⁹ Momma ɛmfa Asdod aban so na wɔnte, ne Misraim asase so aban so, na monka sɛ: Mommoa mo ho ano, Samaria mmepɔw so, na mommɛhwɛ emu kitikiti bebree ne nhyɛso a ɛwɔ no mu no.

¹⁰ Efisɛ wonnim adetreneeyɛ, AWURADE asɛm ni, wɔn na wɔboa atirimmɔden ne dwowtwa ano, wɔn aban mu no.

¹¹ Enti sɛ AWURADE Nyankopɔn se ni: Ɔhohiafo betwa asase no ho ahyia, na wayi w’ahoɔden afi wo ho ahwe fam, na wafow w’aban dennen no.

¹² Sɛ AWURADE se ni: Sɛnea oguanhwɛfo hwim nnyaawa abien anaa asokoraa fi gyata anom no, saa ara nso na wobehwim Israelfo a wɔtete Samaria, te sɛ nnae twea so sin bi anaa mpa so ntama sin bi.

¹³ Muntie, na munni Yakob fi adanse, AWURADE Nyankopɔn, asafo Nyankopɔn, asɛm ni:

¹⁴ Sɛ ɛda a mɛba mabɛtwe Israel mmarato so aso no, mɛtwe Betel afɔremuka nso aso, na wɔatwitwa afɔremuka no mmɛn, na agu fam.

¹⁵ Na mɛbobɔ awɔwbere fi ne ahohurubere fi, na asonse afi nso asɛe, na afi bebree nso ase agu koraa, Awura agu koraa, Awurade asɛm ni.