Amos 2 - KYERƐW KRONKRON

Moab, Yuda ne Israel so atemmusɛm

¹ Sɛ AWURADE se ni: Moab amumɔyɛ ntoatoaso nti merennan n’asotwe no, sɛ ɔhyew Edom hene nnompe sɛ akadoo nti.

² Na mɛto Moab mu gya, na ahyew Keriot aban dennen no, na Moab bewu hooyɛ mu, osebɔ ne torobɛnto nnyigyei mu.

³ Na metwa emu temmufo no akyene, na makunkum ne mmapɔmma nyinaa aka ne ho, AWURADE na ose.

⁴ Sɛ AWURADE se ni: Yuda amumɔyɛ ntoatoaso nti merennan n’asotwe no, sɛ wɔapa AWURADE mmara na wɔanni n’ahyɛde so, na wɔn atoro a wɔn agyanom dii akyiri no ma wɔwɔ ntwɛtwɛdɛ nti.

⁵ Na mɛto Yuda mu gya, na ahyew Yerusalem aban dennen no.

⁶ Sɛ AWURADE se ni: Israel amumɔyɛ ntoatoaso nti merennan n’asotwe no, sɛ wɔtɔn ɔtreneeni gye dwetɛ, na mpaboa nti wɔtɔn ohiani.

⁷ Wɔn kɔn dɔ abrɛfo atifi dɔte mpo, na wɔkyea amanehunufo kwan, na obi ne n’agya kɔ ababaa koro ho, sɛ wɔde rehura me din kronkron ho,

⁸ na wɔda awowa ntama so, afɔremuka nyinaa nkyɛn mu, na wɔnonnom wɔn a wɔadi wɔn kasa nsa, wɔn anyame fi.

⁹ Nanso mesɛee wɔn anim Amorini a ne kɛse te sɛ nkyeneduru kɛse, na ne ho yɛ den sɛ adum nnua no, na mesɛee n’aba wɔ soro ne n’ase ntini no;

¹⁰ na me nso miyii mo fii Misraim asase so, na mede mo nantew sare so mfirihyia aduanan, sɛ mommɛfa Amorini asase nni.

¹¹ Na memomaa mo mma binom so misisii adiyifo, ne mo mmerante binom meyeyɛɛ ahotuafo. So ɛnte sa, Israelfo? AWURADE asɛm ni.

¹² Nanso momaa ahotuafo nsa nomee, na mohyɛɛ adiyifo sɛ: Monnhyɛ nkɔm!

¹³ Hwɛ, me ara memia mo akɔ fam, sɛnea teaseɛnam a awi afiafi ayɛ no ma mia no.

¹⁴ Na aguan bɛbɔ ɔhoɔharefo, na ɔhoɔdenfo nso ahoɔden abɔ no, na dɔmmarima rennye ne ho nkwa.

¹⁵ Na ɔtakurafo rennyina, na nea ne nan yɛ hare remfi mu, na ɔpɔnkɔsotefo rennye ne ho nkwa.

¹⁶ Na nnɔmmarima mu kokodurufo de adagyaw beguan ɛda no, AWURADE asɛm ni.