5 Mose 6 - KYERƐW KRONKRON

Mmara no botae ne osetie

¹ Na eyi ne mmara nsɛm, ahyɛde ne atemmude a AWURADE mo Nyankopɔn ahyɛ sɛ wɔnkyerɛkyerɛ mo na monyɛ asase a moretwam akɔfa no so,

² na woasuro AWURADE wo Nyankopɔn adi n’ahyɛde ne ne mmara nsɛm a merehyɛ wo yi nyinaa so, wo ne wo ba ne wo ba ba, wo nkwa nna nyinaa, na wo nna aware.

³ Enti, Israel, tie, na hwɛ yɛ, na asi wo yiye, na woadɔɔso pii, sɛnea AWURADE w’agyanom Nyankopɔn ka kyerɛɛ wo no, asase a nufusu ne ɛwo sen so no so.

⁴ Israel, tie, AWURADE yɛn Nyankopɔn ne AWURADE koro.

⁵ Na fa wo koma nyinaa ne wo kra nyinaa ne w’ahoɔden nyinaa dɔ AWURADE wo Nyankopɔn.

⁶ Na nsɛm yi a merehyɛ wo nnɛ yi nna wo koma so;

⁷ na fa kyerɛkyerɛ wo mma yiye, na kasa ho, w’afitena mu ne wo kwan so nantew mu ne wo nna mu ne wo sɔre mu;

⁸ na fa yɛ sɛnkyerɛnne kyekyere wo nsa, na ɛnyɛ w’aniwa ntam nkae ntamabamma;

⁹ na kyerɛw gu wo fi apongua ho ne w’aponkɛse so.

¹⁰ Na sɛ AWURADE wo Nyankopɔn nya de wo du asase a ɔkaa w’agyanom Abraham, Isak ne Yakob ntam sɛ ɔde bɛma wo no so, nkurow akɛse a ɛyɛ fɛ a ɛnyɛ wo na wokyekyee,

¹¹ ne adan a nnepa nyinaa ayɛ no amaama a ɛnyɛ wo na wode hyehyɛɛ mu, ne mmura a wɔatutu a ɛnyɛ wo na wututui, bobe nturo a ɛnyɛ wo na wotetɛwee, na sɛ wudidi na womee a,

¹² hwɛ yiye na wo werɛ amfi AWURADE a oyii wo Misraim asase so fii nkoa fi no:

¹³ AWURADE wo Nyankopɔn na suro no, na ɔno na som no, na ne din ho ntam na ka;

¹⁴ munnni anyame foforo a wofi amanaman a wogugu mo ho no anyame mu akyi;

¹⁵ na AWURADE wo Nyankopɔn a ɔwɔ wo mu no yɛ Onyankopɔn ninkufo, na AWURADE wo Nyankopɔn abufuw annɛw anhyɛ wo, na wansɛe wo amfi asase ani.

¹⁶ Monnsɔ AWURADE mo Nyankopɔn nnhwɛ, sɛnea mosɔɔ no hwɛe Masa hɔ no;

¹⁷ munni AWURADE mo Nyankopɔn mmara nsɛm ne n’adansesɛm ne n’ahyɛde a wahyɛ mo no so pɛpɛɛpɛ;

¹⁸ na yɛ nea ɛteɛ na eye AWURADE ani so, na asi wo yiye, na woakɔ akɔfa asase pa a AWURADE kaa ho ntam kyerɛɛ w’agyanom no,

¹⁹ na watu w’atamfo nyinaa afi w’anim, sɛnea AWURADE kae no.

²⁰ Sɛ ɔkyena bi wo ba bisa wo sɛ: Adansesɛm ne ahyɛde ne atemmude bɛn na AWURADE yɛn Nyankopɔn de hyɛɛ mo yi a?

²¹ Ka kyerɛ wo ba no sɛ: Yɛyɛɛ Farao nkoa Misraim, na AWURADE de nsa a ɛyɛ den yii yɛn fii Misraim;

²² na AWURADE maa nsɛnkyerɛnne ne anwonwade akɛse a ɛyɛ hu baa Misraim, Farao ne ne fi nyinaa so wɔ yɛn anim;

²³ na yɛn de, oyii yɛn fii hɔ sɛ ɔde yɛn reba, de asase a ɔkaa ho ntam kyerɛɛ yɛn agyanom no abɛma yɛn.

²⁴ Na AWURADE hyɛɛ yɛn sɛ yɛnyɛ ahyɛde yi nyinaa na yensuro AWURADE yɛn Nyankopɔn, na ensi yɛn yiye nna nyinaa, na ɔmma yennya nkwa, sɛ ɛte nnɛ yi;

²⁵ na sɛ yɛhwɛ di mmara nsɛm yi nyinaa so AWURADE yɛn Nyankopɔn anim, sɛnea ɔhyɛɛ yɛn no a, ɛbɛyɛ yɛn atreneefo.