5 Mose 33 - KYERƐW KRONKRON

Mose hyira Israel

¹ Na eyi ne nhyira a Onyankopɔn nipa Mose de hyiraa Israelfo ansa na owui. Na ɔkae sɛ:

² AWURADE fi Sinai bae, na opue fii Seir maa wɔn, ɔharan fii Paran bepɔw so; ofi akronkronfo pii mu na ɛbae, ogya a ɛyɛ mmara ma wɔn wɔ ne nifa mu.

³ Yiw, ɔdɔ ne man, n’akronkronfo nyinaa wɔ ne nsam. Na wɔn de, wɔboaboa wo nan ase, na wotie w’asɛm.

⁴ Mmara na Mose hyɛɛ yɛn, Yakob bagua agyapade;

⁵ na ɔyɛɛ Yesurun mu hene, ɛda a ɔman no atitiriw hyiae na Israel mmusuakuw nyinaa hyiaa faako no.

Mmusuakuw dumien no nhyira

⁶ Ruben nnya nkwa na onnwu, na ne mmarima nso nnyɛ ketewa.

⁷ Na Yuda nso de ni, ose: AWURADE, tie Yuda nne, na fa no kɔ ne man nkyɛn; ma wo nsa nko mma no, na yɛ no ɔboafo fi n’ahohiafo nsam.

⁸ Na Lewi ho de, ɔkae sɛ: Wo nokware ne wo hann wɔ wo hotefo no, nea wosɔɔ no hwɛe Masa hɔ na wo ne no hamee Meriba asu ho no;

⁹ nea ɔkae wɔ n’agya ne ne na ho sɛ: Minnim wɔn! Na ɔpaa ne nuanom, na ɔpoo n’ankasa ne mma no. Na wodi wo nsɛm so, na wɔkora w’apam.

¹⁰ Wɔde w’atemmude bɛkyerɛ Yakob, na wɔde wo mmara akyerɛ Israel; wɔde aduhuam betua wo hwene ano, na wɔde afɔre amuamu begu w’afɔremuka so.

¹¹ AWURADE, hyira n’ahonyade so, na ma ne nsa ano adwuma nsɔ w’ani; bobɔ wɔn a wɔsɔre hyɛ no no dwonku, ne wɔn a wɔtan no, na wɔansɔre bio.

¹² Benyamin ho nso, ɔkae sɛ: AWURADE dɔfo bɛtena ne nkyɛn dwoodwoo; ɔkata no so daa nyinaa, na ɔbɛtena ne mmati so.

¹³ Na Yosef ho nso, ɔkae sɛ: AWURADE nhyira n’asase; ɔmma no ɔsoro nnepa, obosu ne ebun a ɛtrɛw ase no de,

¹⁴ ne owia mu nnɔbae nnepa, ne nea asram ma efifi mu nnepa,

¹⁵ ne tete mmepɔw atifi ne daapem nkoko nnepa,

¹⁶ ne asase ne ne mayɛ mu nnepa, ne nea ɔte nkyɛkyerɛ no mu no anisɔ; wɔmma ɛmmra Yosef atifi, ne ne nuanom mu hotuafo no mpampam.

¹⁷ Ne nantwinini abakan, anuonyam wɔ no, na n’abɛn yɛ ɛkoɔ abɛn; ɛno na ɔde besunsum aman nyinaa agu akodu asase ano. Efraim dodow ne no, na Manase mpem ne no.

¹⁸ Na Sebulon ho nso, ɔkae sɛ: Sebulon, ma w’ani nnye w’adifi mu, ne Isakar, wo ntamadan mu.

¹⁹ Wɔbɛfrɛ aman akɔ bepɔw no so, ɛhɔ na wɔbɛbɔ trenee afɔre; na wobefew po mu mmoroso ne nwea mu ademude a ahintaw

²⁰ Na Gad ho nso, ɔkae sɛ: Nhyira ne nea ɔtrɛw Gad mu; obutuw hɔ sɛ gyatabere, ɔtetew basa ne mpampam;

²¹ ɔno na ɔpaw nea eye no fae, na ɛhɔ na wɔakora mmarahyɛfo no kyɛfa; na ɔnam di ɔman no atitiriw mu, ɔyɛ AWURADE treneede ne n’atemmude wɔ Israel.

²² Na Dan ho nso, ɔkae sɛ: Dan yɛ gyataforo, ohuruw fi Basan.

²³ Na Naftali ho nso, ɔkae sɛ: Naftali a anisɔ amee no, na AWURADE nhyira ayɛ no ma, fa ɛpo ne ahohuru asase no di so

²⁴ Na Aser ho nso, ɔkae sɛ: Wɔmfa mma nhyira Aser, ɔnyɛ nea ɔsɔ ani ne nuanom mu, na ɔmfa ne nan mmɔ ngo mu.

²⁵ Dade ne kɔbere nyɛ w’adaban, sɛ wo nna te no, saa na w’ahotɔ nyɛ.

²⁶ Obi nni hɔ a ɔte sɛ Yesurun Nyankopɔn! Ɔnam soro di boa wo, ɔde ne kɛseyɛ nam omununkum mu.

²⁷ Tete Nyankopɔn ne wo tenabea, na ase na daapem abasa no wɔ. Na ɔbɛpam ɔtamfo w’anim, na waka sɛ: Dwerɛw wɔn.

²⁸ Na Israel bɛtena hɔ dwoodwoo, Yakob asubura no, ne nko na ɔbɛtena, ɔbɛtena aburow ne nsa asase so; ne soro nso bɛsosɔ obosu.

²⁹ Nhyira ne wo, Israel, hena na ɔte sɛ wo, ɔman a wɔanya AWURADE mu nkwagye! Ɔyɛ wo boa kyɛm, na ɔyɛ wo kɛseyɛ nkrante. W’atamfo bɛbrɛ wɔn ho ase ama wo, na wo de, wubetiatia wɔn sorɔnsorɔmmea so.