5 Mose 29 - KYERƐW KRONKRON

AWURADE apam

¹ Eyi ne apam a AWURADE hyɛɛ Mose sɛ ɔne Israelfo mpam Moab asase so nka apam a ɔne wɔn pamee Horeb ho no mu nsɛm no ho.

² Na Mose frɛɛ Israel nyinaa ka kyerɛɛ wɔn sɛ: Mo ara moahu nea AWURADE yɛɛ Farao ne ne nkoa nyinaa ne n’asase nyinaa mo aniwa mu, wɔ Misraim asase so no nyinaa,

³ sɔhwɛ akɛse a w’aniwa hui, nsɛnkyerɛnne ne anwonwade akɛse no.

⁴ Nanso ɛde besi nnɛ, AWURADE mmaa mo koma a enim ade ne aniwa a ehu ade ne aso a ɛte asɛm.

⁵ Na mama moanantew sare so mfirihyia aduanan, mo ntama nsuwii mo ho ɛ, na wo mpaboa ntetewee wo nan ase ɛ;

⁶ moanni abodoo na moannom bobesa ne nsa biara, na moahu sɛ mene AWURADE mo Nyankopɔn.

⁷ Na muduu ha yi no, Hesbon hene Sihon ne Basan hene, Og fi behyiaa yɛn ne yɛn bɛkoe, na yekum wɔn;

⁸ na yɛfaa wɔn asase de maa Rubenfo ne Gadfo ne Manasefo abusuakuw fa sɛ wonni so.

⁹ Enti monhwɛ apam yi mu nsɛm yi nni so, na nea moyɛ nyinaa awie mo yiye.

¹⁰ Ɛnnɛ mo nyinaa mugyina AWURADE mo Nyankopɔn anim, mo atitiriw, mo mmusuakuw, mo mpanyimfo ne mo ahwɛfo, Israel mmarima nyinaa;

¹¹ mo mma, mo yerenom ne wo hɔho a ɔwɔ wo nsra mu, efi wo duatwafo so kosi wo nsusawfo so:

¹² Sɛ wobɛhyɛn AWURADE wo Nyankopɔn apam ne ne nsew a AWURADE wo Nyankopɔn ne wo repam na ɔredi nnɛ yi mu,

¹³ sɛ nnɛ ɔde wo resi hɔ ayɛ ne man, na ɔno nso ayɛ wo Onyankopɔn, sɛnea ɔka kyerɛɛ wo, ne sɛnea ɔkaa w’agyanom Abraham, Isak ne Yakob ntam no.

¹⁴ Na ɛnyɛ mo nko na me ne mo repam apam yi na meredi nsew yi,

¹⁵ na mmom me ne wɔn a wɔne yɛn gyina AWURADE yɛn Nyankopɔn anim ha nnɛ yi ne wɔn a wɔne yɛn nni ha nnɛ yi.

¹⁶ Na mo ara munim sɛnea yɛtenaa Misraim asase so, ne sɛnea yetwaa amanaman a mofaa wɔn mu bae no mu;

¹⁷ na muhuu wɔn akyide ne wɔn nnua ne abo ne dwetɛ ne sika ahoni a ɛwɔ wɔn mu no;

¹⁸ na monhwɛ yiye, na ɔbarima bi anaa ɔbea bi anaa abusua bi anaa abusuakuw bi antena mo mu a wɔn koma redan nnɛ afi AWURADE yɛn Nyankopɔn ho, sɛ worekɔ akɔsom amanaman no anyame no, na ntini bi antena mo mu a ɛsow bɔre ne awɔnwene;

¹⁹ na sɛ ɔte nsew yi mu nsɛm no a, wanhyira ne ho ne koma mu anka sɛ: Menam me koma denyɛ mu de, nanso menya asomdwoe; na wɔansesaw nea wanom ne nea osukɔm de no ammom.

²⁰ AWURADE rempene mfa mfiri no, na ɛno de AWURADE abufuw ne ne ninkuntwe bepun onipa ko no, na nsew a wɔakyerɛw nhoma yi mu no nyinaa beduru no, na AWURADE bɛpopa ne din afi ɔsoro ase.

²¹ Na AWURADE beyi no afi Israel mmusuakuw nyinaa mu ama bɔne, sɛ apam a wɔakyerɛw mmara nhoma yi mu no mu nsew no nyinaa te.

²² Na sɛ awo ntoatoaso a ɛbɛba, mo mma a wɔbɛsɔre adi mo akyi, ne ɔnanani a ofi akyirikyiri asase so bɛba no hu asase yi haw ahorow ne nyarewa a AWURADE de aba so,

²³ sufre ne nkyene, ɔhyew a asase no nyinaa ahyew a wonnua so ade na ɛnsow, na wura biara mfifi so, sɛ Sodom ne Gomora, Adma ne Seboim butuw a AWURADE de n’abufuw ne n’abufuhyew butuwii no a, wɔbɛka ho asɛm,

²⁴ na amanaman nyinaa bɛka sɛ: Ɛdɛn nti na AWURADE ayɛ asase yi sɛɛ yi? Abufuw kɛse hyewhyew yi yɛ dɛn?

²⁵ Na wɔbɛka sɛ: Efisɛ wɔagyaw AWURADE wɔn agyanom Nyankopɔn apam a oyii wɔn Misraim asase so no, ɔne wɔn pamee no,

²⁶ na wɔakɔ akɔsom anyame foforo na wɔasɔre wɔn, anyame a wonnim wɔn na ɛnyɛ ɔno na ɔde wɔn maa wɔn.

²⁷ Na AWURADE abufuw dɛw hyɛɛ asase yi ma ɔde nnome a wɔakyerɛw nhoma yi mu nyinaa baa so;

²⁸ enti na AWURADE atutu wɔn afi wɔn asase so abufuw ne aboɔhyew ne abohuru kɛse mu na watow wɔn agu asase bi so sɛ ɛte nnɛ yi.

²⁹ Nneɛma a ahintaw yɛ AWURADE yɛn Nyankopɔn dea, na nea wɔayi adi no yɛ yɛn ne yɛn mma dea kosi daa, sɛ yenni mmara yi mu nsɛm nyinaa so.