5 Mose 20 - KYERƐW KRONKRON

Ɔsatu ho mmara

¹ Sɛ wutu sa ne w’atamfo akɔko na wuhu apɔnkɔ ne nteaseɛnam ne ɔman a wɔdɔɔso sen wo a, nsuro wɔn, efisɛ AWURADE wo Nyankopɔn a ɔde wo fi Misraim asase so bae no ka wo ho.

² Na sɛ mobɛn dɔm no a, ɔsɔfo no ntwiw mmɛkasa nkyerɛ ɔman no,

³ na ɔnka nkyerɛ wɔn sɛ: Israel, tie, morebɛn dɔm nnɛ ne mo atamfo akɔko, mommma mo koma nntutu, munnsuro na mo ho mmpopo, na mommma wɔn ho nnyɛ mo hu,

⁴ efisɛ AWURADE mo Nyankopɔn ne mo na ɛnam ne mo atamfo rekɔko ama mo na wagye mo.

⁵ Na ahwɛfo no nkasa nkyerɛ ɔman no sɛ: Onii ko a wasi dan foforo na onnuruu mu afiforo no, ɔnsan nkɔ ne fi, na wantɔ ɔko mu na obi ankoduru mu.

⁶ Na onii ko a watɛw bobeturo na onnya nyii ano no, ɔnsan nkɔ ne fi, na wantɔ ɔko mu, na obi anyi ano.

⁷ Na onii ko a wagye ɔbea bi aware na onnya nhyiaa no no, ɔnsan nkɔ ne fi, na wantɔ ɔko mu na obi anhyia no.

⁸ Na ahwɛfo no nkɔ so nkasa nkyerɛ ɔman no sɛ: Onii ko a osuro na ne koma tutu no, ɔnsan nkɔ ne fi, na wamma ne nuanom koma annan sɛ ne de.

⁹ Na sɛ ahwɛfo no wie ɔman no kasakyerɛ a, wɔmfa asafohene nsisi ɔman no ti.

¹⁰ Sɛ wobɛn kurow bi ne no rekɔko a, ka asomdwoesɛm kyerɛ no.

¹¹ Na sɛ obua wo asomdwoe so na ohiɛ wo a, ɔman a wobehu wɔn hɔ no nyi tow mma wo nsom wo.

¹² Na sɛ wɔne wo anni asomdwoesɛm na wɔne wo ko a, ɛnne tua kurow no;

¹³ na sɛ AWURADE wo Nyankopɔn de hyɛ wo nsa a, fa nkrante kunkum emu mmarima nyinaa,

¹⁴ nanso mmea ne mmofra ne afieboa ne nea ɛwɔ kurow no mu nyinaa, emu asade nyinaa de, fom fa, na di w’atamfo asade a AWURADE wo Nyankopɔn de ama wo no.

¹⁵ Saa na yɛ nkurow a ɛne wo ntam kwan ware pii a ɛnyɛ amanaman yi nkurow bi no.

¹⁶ Na amanaman yi nkurow a AWURADE wo Nyankopɔn de rema wo sɛ di so no mu de, mma biribiara a ɛhome nnnya nkwa,

¹⁷ na sɛe wɔn pasaa: Hetifo ne Amorifo, Kanaanfo ne Perisifo, Hewifo ne Yebusifo, sɛnea AWURADE wo Nyankopɔn hyɛɛ wo no.

¹⁸ Na wɔankyerɛ mo wɔn akyide a wɔyɛ ma wɔn anyame no nyinaa bi yɛ, na moanyɛ AWURADE mo Nyankopɔn bɔne.

¹⁹ Sɛ wutua kurow bi nna pii ne no reko afa a, mfa akuma nsɛe ho nnua, na ɛso aba bi na di, na ntow ngu: So afuw mu dua yɛ onipa na woatua no?

²⁰ Nanso nnua a wunim sɛ ɛnyɛ nnua a wodi no de, sɛe no na twa fa yɛ kurow a ɛne wo di ako no ho ntuaban kosi sɛ wobɛbrɛ no ase.