5 Mose 18 - KYERƐW KRONKRON

Asɔfo ne Lewifo agyapade ne AWURADE

¹ Wɔmmma asɔfo Lewifo, Lewi abusuakuw nyinaa nnnya kyɛfa ne agyapade biara Israel mu. Wobetumi adi AWURADE gya afɔre so ade no bi, ɛno nyɛ wɔn agyapade.

² Na wɔrennya agyapade wɔn nuanom mu; AWURADE ne wɔn agyapade, sɛnea ɔhyɛɛ wɔn bɔ no.

³ Na eyi nyɛ asɔfo no kyɛfa a efi ɔman no nsam, mfi wɔn a wɔbɔ afɔre no nkyɛn, nantwi oo, oguan oo: Wɔmfa basa ne abogye ne ofuru mma ɔsɔfo no;

⁴ w’aburow, wo nsa ne wo ngo mu adekan ne wo nguan ho nwi a wutwa kan no, fa ma no,

⁵ efisɛ ɔno na AWURADE wo Nyankopɔn ayi no afi wo mmusuakuw nyinaa mu, sɛ onnyina nsom AWURADE din mu, ɔno ne ne mma, nna nyinaa.

⁶ Na sɛ Lewini bi fi wo nkurow no biara mu, fi Israel mu baabiara a wakɔsoɛ hɔ, na ɔde ne pɛ nyinaa ba bɛtena faako a AWURADE bɛkyerɛ hɔ a,

⁷ ɛnne ɔnsom AWURADE ne Nyankopɔn din mu sɛ ne nuanom Lewifo a wogyina AWURADE anim hɔ nyinaa yɛ no.

⁸ Wonnya kyɛfa koro nni nka nea efi n’agyanom ade a wɔatɔn mu no ho.

Wɔnnyɛ amanaman akyide

⁹ Sɛ wunya du asase a AWURADE wo Nyankopɔn de rema wo no so a, nsua amanaman no akyide no yɛ.

¹⁰ Mma wonnhu wo mu obi a ɔma ne babarima anaa ne babea fa ogya mu, ɔkɔmfo a ɔhyɛ abosonkɔm, ɔbayifo ne ɔdebisafo ne ntafowayifo,

¹¹ ne kaberɛkyerefo ne samanfrɛfo ne osumanni ne nea obisa afunu,

¹² efisɛ AWURADE akyide ne wɔn a wɔyɛ eyinom nyinaa, na akyide yi nti na AWURADE wo Nyankopɔn retu wɔn afi w’anim yi.

¹³ Wo ne AWURADE wo Nyankopɔn ntena no mudi mu.

¹⁴ Na amanaman yi a worekotu wɔn yi tie abayifo ne nkɔmhyɛfo, na wo de, AWURADE wo Nyankopɔn mmaa wo kwan sɛ yɛ no sa.

Wontie Odiyifo no

¹⁵ Odiyifo a ofi wo mu a ofi wo nuanom mu te sɛ me na AWURADE wo Nyankopɔn bɛma no so ama wo, ɔno na muntie no.

¹⁶ Sɛnea wubisaa AWURADE wo Nyankopɔn wɔ Horeb guabɔ da no sɛ: Mma mennte AWURADE me Nyankopɔn nne bio, na mma minnhu ogya kɛse yi bio, na manwu!

¹⁷ Na AWURADE ka kyerɛɛ me sɛ: Nea wɔaka no wɔaka no yiye:

¹⁸ Mɛma odiyifo so mama wɔn wɔn nuanom mu sɛ wo; na mede me nsɛm mɛhyɛ n’anom, na waka nea mɛhyɛ no nyinaa akyerɛ wɔn;

¹⁹ na obiara a ɔrentie me nsɛm a ɔbɛka me din mu no, me ara mebisa no ase.

²⁰ Na odiyifo a ɔbɛma ne ho so aka asɛm bi, me din mu, a menhyɛɛ no sɛ ɔnka ne nea ɔbɛkasa anyame foforo din mu no, odiyifo ko no bewu.

²¹ Na sɛ woka wo koma mu sɛ: Ɛbɛyɛ dɛn na yebehu asɛm a AWURADE nkae no?

²² Sɛ odiyifo no kasa AWURADE din mu na asɛm no amma anaasɛ amma mu a, na AWURADE nkae ne no; ahokyerɛ na odiyifo no de kasae, nsuro no.