5 Mose 16 - KYERƐW KRONKRON

Afahyɛ horow no ho mmara

¹ Hwɛ ɔsram Abib na di Twam ma AWURADE wo Nyankopɔn, efisɛ ɔsram Abib mu na AWURADE wo Nyankopɔn yii wo fii Misraim anadwo.

² Enti kum Twam afɔre no ma AWURADE wo Nyankopɔn, nguan ne anantwi, faako a AWURADE ayi sɛ ne din ntena hɔ no.

³ Nni mmɔkaw nka ho; nnansɔn na di apiti, amanehunu abodoo, efisɛ ɔhare so na wufii Misraim asase so, na woakae wo Misraim asase so fi da no, wo nkwa nna nyinaa.

⁴ Na mma wonnhu mmɔkaw wɔ wo nkyɛn, w’asase nyinaa so nnansɔn; nso mma nam a wokum da a edi kan anwummere no bi nnka nnkosi adekyee.

⁵ Nkum Twam no wɔ nkurow a AWURADE wo Nyankopɔn de rema wo no mu biara mu,

⁶ gye faako a AWURADE wo Nyankopɔn beyi sɛ ne din ntena hɔ no, ɛhɔ na kum Twam no anwummere a owia rekɔtɔ no, wo Misraim fi bere no mu;

⁷ na ma ɛmmen na di wɔ faako a AWURADE wo Nyankopɔn bɛkyerɛ hɔ, na ade kye a, woasan akɔ wo ntamadan mu.

⁸ Nnansia na di apiti, na da a ɛto so ason no nyɛ afahyɛ nhyiam mma AWURADE wo Nyankopɔn; nyɛ adwuma biara.

⁹ Adapɛn ason na kan fa; da a wɔrefi ase de kantankrankyi ahyɛ awi mu no na fi kan adapɛn asɔn;

¹⁰ na di adapɛn dapɔnna ma AWURADE wo Nyankopɔn bɔ wo nsam ayamye afɔre sɛnea AWURADE wo Nyankopɔn ahyira wo no;

¹¹ na ma w’ani nnye AWURADE wo Nyankopɔn anim, wo ne wo babarima ne wo babea ne w’akoa ne w’afenaa ne Lewini a ɔwɔ wo nkurow mu ne ɔhɔho ne ayisaa ne okunafo a wɔwɔ mo mu, faako a AWURADE wo Nyankopɔn beyi sɛ ne din ntena hɔ no.

¹² Na kae sɛ woyɛɛ akoa Misraim, na hwɛ na yɛ ahyɛde yi.

¹³ Di asese nnapɔnna nnansɔn, bere a woaboaboa w’awiporowbea ne wo nsa-kyi-amoa mu ade ano no;

¹⁴ na ma w’ani nnye wo nnapɔnna no mu, wo ne wo babarima ne wo babea ne w’akoa ne w’afenaa ne Lewini ne ɔhɔho ne ayisaa ne okunafo a wɔwɔ wo nkurow mu.

¹⁵ Nnansɔn na di dapɔnna no ma AWURADE wo Nyankopɔn faako a AWURADE ayi hɔ: Na AWURADE wo Nyankopɔn behyira wo, wo nnɔbae mu ne wo nsa ano adwuma nyinaa mu; enti ma w’ani nnye ara.

¹⁶ Afirihyia biako mu mpɛn abiɛsa na wo mmarima nyinaa mmeyi wɔn ho adi AWURADE wo Nyankopɔn anim faako a ɔbɛkyerɛ hɔ: Apiti nnapɔnna, adapɛn dapɔnna ne asese nnapɔnna mu; na wɔmmfa nsapan mmmeyi wɔn ho adi, AWURADE anim;

¹⁷ obiara mma nea ne nsa bɛso so, sɛnea AWURADE wo Nyankopɔn nhyira a ɔde ahyira wo no te.

Atemmufo ne atemmu ho asɛm

¹⁸ Sisi wo so atemmufo ne mpanyimfo, wo nkurow a AWURADE wo Nyankopɔn de rema wo sɛ wo mmusuakuw te no nyinaa mu, na wɔmfa atɛntrenee mmu ɔman no.

¹⁹ Nnan atemmu ani, nhwɛ nnipa anim na nnye adammude; na ademmude fura anyansafo aniwa, na ɛdan treneefo nsɛm ani butuw.

²⁰ Asɛntrenee, asɛntrenee akyi na di, na woanya nkwa, na woakɔfa asase a AWURADE wo Nyankopɔn de rema wo no.

²¹ Ntɛw nnua biara mfa nyɛ Asera nnua wɔ AWURADE wo Nyankopɔn afɔremuka a worebesi no ho;

²² na mfa ɔbo dum nsi hɔ mfa; na AWURADE wo Nyankopɔn akyide ne no.