4 Mose 34 - KYERƐW KRONKRON

Ahyɛde wɔ Kanaanfo ho

¹ Na AWURADE kasa kyerɛɛ Mose sɛ:

² Hyɛ Israelfo no mmara na ka kyerɛ wɔn sɛ: Sɛ mudu Kanaan asase no so a, eyi ne asase a ɛbɛyɛ mo agyapade, Kanaan asase no sɛ n'ahye te.

³ Mo anafo fam nkyɛn mu mfi Sin sare so Edom nkyɛn mu; na mo anafo fam hye mfi Nkyene-Po awiei wɔ apuei;

⁴ na mo hye no mmra Akrabim aforoe anafo fam, na entwam nkɔ Sin, na emfi ha nkɔ Kades-barnea anafo fam, na emfi nkɔ Hasar-adar ntwam nkɔfa Asmon.

⁵ Na ɔhye no nkɔntɔn mfi Asmon nkɔ Misraim subon no mu, na ano nkɔpem po no ano.

⁶ Na atɔe fam hye no de, ɛpo kɛse a ɛda hɔ ma mo no na ɛnyɛ ɔhye; ɛno na ɛnyɛ mo atɔe fam hye.

⁷ Na eyi nyɛ mo atifi fam hye: Mumfi po kɛse no ano mfa mo ani nkari Hor bepɔw,

⁸ na mumfi Hor bepɔw ho nkari nea wɔfa kɔ Hamat, na ɔhye no ano nkɔpem Sedad.

⁹ Na ɔhye no mfi hɔ nkɔ Sifron, na ano nkɔpem Hasar-enan; eyi na ɛnyɛ mo atifi fam hye.

¹⁰ Na monkari apuei fam hye mfi Hasar-enan nkɔ Sefam;

¹¹ na ɔhye no mfi Sefam nsian nkɔ Ribla, Ain apuei, na ɔhye no nsian ara nkɔpem Kineret po no kɔn so, apuei.

¹² Na ɔhye no nsian nkodu Yordan, na ano nkɔpem Nkyene-Po ano. Eyi ne mo asase no sɛnea ɛho ahye te.

¹³ Na Mose hyɛɛ Israelfo no sɛ: Eyi ne asase a momfa ntontobɔ so nkyɛmu nni so a AWURADE ahyɛ sɛ wɔmfa mma mmusuakuw akron ne fa no.

¹⁴ Na Ruben mma abusuakuw, sɛ wɔn mpanyimfi te, ne Gad mma abusuakuw, sɛ wɔn mpanyimfi te, ne Manase abusuakuw fa no anya wɔn kyɛfa.

¹⁵ Mmusuakuw abien ne fa abusua no anya wɔn kyɛfa Yeriko, Yordan agya, anim fam ne apuei.

¹⁶ Na AWURADE kasa kyerɛɛ Mose sɛ:

¹⁷ Mmarima a wɔnkyɛ asase no mu mma mo no din ni: ɔsɔfo Eleasar ne Nun ba Yosua.

¹⁸ Na munyiyi mmusuakuw nyinaa mu mmapɔmma mmiako mmiako, na wɔnkyɛ asase no mu.

¹⁹ Mmarima no din ni: Yuda abusuakuw mu: Yefune ba Kaleb;

²⁰ Simeon abusuakuw mu: Amihud ba Semuel;

²¹ Benyamin abusuakuw mu: Kislon ba Elidad;

²² Dan mma abusuakuw mu bapɔmma: Yogli ba Buki;

²³ Yosef mma no de: Manase mma abusuakuw mu bapɔmma: Efod ba Haniel;

²⁴ Efraim mma abusuakuw mu bapɔmma: Siftan ba Kemuel;

²⁵ Sebulon mma abusuakuw mu bapɔmma: Parnak ba Elisafan;

²⁶ Isakar mma abusuakuw mu bapɔmma: Asan ba Paltiel;

²⁷ Aser mma abusuakuw mu bapɔmma: Selomi ba Ahihud;

²⁸ Naftali mma abusuakuw mu bapɔmma: Amihud ba Pedahel.

²⁹ Eyinom ne wɔn a AWURADE hyɛɛ wɔn sɛ wɔnkyɛ Kanaan asase mma Israelfo no.