4 Mose 29 - KYERƐW KRONKRON

Torobɛntohyɛn afahyɛ ho afɔrebɔ

¹ Na ɔsram a ɛto so ason no da a edi kan no, munhyia nhyia kronkron; monnyɛ adwumaden biara; ɔnyɛ mo torobɛntohyɛn da.

² Na mommɔ ɔhyew afɔre a eyi hua huamhuam mma AWURADE: nantwinini biako, odwennini biako, nguanten mma a wɔadi afe afe ason a wodi mu;

³ ne ɛho aduan afɔre: asikresam a wɔde ngo afɔtɔw abupɛn du mu abiɛsa nka nantwinini no ho, abupɛn du mu abien nka odwennini no ho,

⁴ na abupɛn du mu biako nka nguammaa ason no mu biara ho;

⁵ ne ɔpapo biako a wɔde bɛbɔ bɔne ho afɔre de apata ama mo;

⁶ ɛsono ɔsram foforo so hyew afɔre ne ɛho aduan afɔre, ne daa ɔhyew afɔre ne ɛho aduan afɔre, ne ɛho ahwiesa sɛ ɛtetee; na ɛnyɛ AWURADE gya afɔre a eyi hua huamhuam.

Akra asebrɛ da afɔre

⁷ Na ɔsram a ɛto so ason no ara da a ɛto so du no, munhyia nhyia kronkron, na munni mmuada; monnyɛ adwuma biara;

⁸ na momfa ɔhyew afɔre a eyi hua huamhuam mmrɛ AWURADE: nantwinini biako, odwennini biako, nguanten mma a wɔadi afe afe ason a wodi mu;

⁹ ne ɛho aduan afɔre: asikresam a wɔde ngo afɔtɔw abupɛn du mu abiɛsa nka nantwinini no ho, abupɛn du mu abien nka odwennini no ho,

¹⁰ abupɛn du mu biako nka nguammaa ason no mu biara ho;

¹¹ ne bɔne ho afɔre papo biako, ɛsono bɔne ho mpata afɔre ne daa ɔhyew afɔre ne ɛho aduan afɔre ne ɛho ahwiesa.

Asese afahyɛ afɔre

¹² Na ɔsram a ɛto so ason no da a ɛto so dunum no, munhyia nhyia kronkron; monnyɛ adwumaden biara na monhyɛ fa nnansɔn mma AWURADE.

¹³ Na momfa ɔhyew afɔre, ogya afɔre a eyi hua huamhuam mmrɛ AWURADE: anantwinini dumiɛnsa, adwennini abien, nguanten mma a wɔadi afe afe dunan a wodi mu;

¹⁴ ne ɛho aduan afɔre: asikresam abupɛn du mu abiɛsa a wɔde ngo afɔtɔw nka anantwinini dumiɛnsa no mu biara ho, abupɛn du mu abien nka adwennini abien no mu biara ho,

¹⁵ na abupɛn du mu biako nka nguammaa dunan no mu biara ho;

¹⁶ ne bɔne ho afɔre papo biako; ɛsono daa ɔhyew afɔre, ɛho aduan afɔre ne ɛho ahwiesa.

¹⁷ Na da a ɛto so abien no: anantwinini dumien, adwennini abien, nguanten mma a wɔadi afe afe dunan a wodi mu;

¹⁸ ne anantwinini, adwennini ne nguammaa no ho aduan afɔre ne ahwiesa, wɔn dodow, sɛ ɛte wɔ mmara no mu;

¹⁹ ne bɔne ho afɔre papo biako; ɛsono daa ɔhyew afɔre ne ɛho aduan afɔre ne ɛho ahwiesa.

²⁰ Na ɛda a ɛto so abiɛsa no: anantwinini dubiako, adwennini abien, nguanten mma a wɔadi afe afe dunan a wodi mu;

²¹ ne anantwi, adwennini ne nguammaa no ho aduan afɔre ne ahwiesa, wɔn dodow, sɛ ɛte wɔ mmara no mu;

²² ne bɔne ho afɔre papo biako; ɛsono daa ɔhyew afɔre ne ɛho aduan afɔre ne ɛho ahwiesa.

²³ Na da a ɛto so anan no: anantwinini du, adwennini abien, nguanten mma a wɔadi afe afe dunan a wodi mu;

²⁴ ne anantwinini, adwennini ne nguammaa no ho aduan afɔre ne ahwiesa, wɔn dodow, sɛ ɛte wɔ mmara no mu;

²⁵ ne bɔne ho afɔre papo biako, ɛsono daa ɔhyew afɔre ne ɛho aduan afɔre ne ɛho ahwiesa.

²⁶ Na da a ɛto so anum no: anantwinini akron, adwennini abien, nguanten mma a wɔadi afe afe dunan a wodi mu;

²⁷ ne anantwinini, adwennini ne nguammaa no ho aduan afɔre ne ahwiesa, wɔn dodow, sɛ ɛte wɔ mmara no mu;

²⁸ ne bɔne ho afɔre papo biako; ɛsono daa ɔhyew afɔre ne ɛho aduan afɔre ne ɛho ahwiesa.

²⁹ Na da a ɛto so asia no: anantwinini awotwe, adwennini abien, nguanten mma a wɔadi afe afe dunan a wodi mu;

³⁰ ne anantwinini, adwennini ne nguammaa no ho aduan afɔre ne ahwiesa, wɔn dodow, sɛ ɛte wɔ mmara no mu;

³¹ ne bɔne ho afɔre papo biako; ɛsono daa ɔhyew afɔre ne ɛho aduan afɔre ne ɛho ahwiesa.

³² Na da a ɛto so ason no: anantwinini asɔn, adwennini abien, nguanten mma a wɔadi afe afe dunan a wodi mu;

³³ ne anantwinini, adwennini ne nguammaa no ho aduan afɔre ne ahwiesa, wɔn dodow, sɛ ɛte wɔ mmara no mu;

³⁴ ne bɔne ho afɔre papo biako; ɛsono daa ɔhyew afɔre ne ɛho aduan afɔre ne ɛho ahwiesa.

³⁵ Ɛda a ɛto so awotwe no, munhyia afahyɛ nhyiam; monnyɛ adwuma den biara;

³⁶ na momfa ɔhyew afɔre, ogya afɔre a eyi hua huamhuam mmrɛ AWURADE: nantwinini biako, odwennini biako, nguanten mma a wɔadi afe afe ason a wodi mu;

³⁷ nantwinini ne odwennini ne nguammaa no ho aduan afɔre ne ahwiesa, wɔn dodow, sɛ ɛte wɔ mmara no mu;

³⁸ ne bɔne ho afɔre papo biako; ɛsono daa ɔhyew afɔre ne ɛho aduan afɔre ne ɛho ahwiesa.

³⁹ Eyinom na monyɛ mma AWURADE, mo fa a mohyɛ no mu, ɛsono mo bɔhyɛ ade ne mo ayamye afɔre, mo hyew afɔre ne mo aduan afɔre ne mo ahwiesa ne mo asomdwoe afɔre.

⁴⁰ Na Mose ka kyerɛɛ Israelfo no sɛnea AWURADE hyɛɛ Mose no nyinaa.