4 Mose 24 - KYERƐW KRONKRON

¹ Na Bileam hui sɛ asɔ AWURADE ani sɛ ohyira Israel no, wankɔ abisa sɛ ɔkɔe kan no, na mmom ɔde n'ani kyerɛɛ sare no so.

² Na Bileam maa n'ani so, na ohuu Israel sɛ wogu hɔ mmusua mmusua; na Onyankopɔn honhom baa no so,

³ na ɔkasae sɛ Beor ba Bileam asɛm a wanya sɛ ɔreka, ɔbarima a n'ani hu ade yiye no asɛm a wanya,

⁴ nea ɔte Nyankopɔn nsɛm no na ɔreka yi, nea ohu Tweaduampɔn anisoade, na ɔrehwe ase a, wɔtew n'ani so no:

⁵ Wo ntamadan yɛ fɛ dɛn ara, Yakob, wo tenabea no, Israel!

⁶ Ɛyerɛw sɛ asubon, sɛ asu so nturo, te sɛ pɛprɛ nnua a AWURADE atɛw, te sɛ nsu so nkyeneduru.

⁷ Ne nsusaw ade mu nsu bubu so, na n'asefo tena nsu pii mu. Ne hene so sen Agag, na wɔbɛma n'ahenni so.

⁸ Onyankopɔn na oyii no fii Misraim, n'ahoɔden te sɛ ɛkoɔ de. Ɔbɛmene amanaman a wɔyɛ n'atamfo, na wadwerɛw wɔn nnompe, na ɔde n'agyan awowɔ wɔn.

⁹ Ɔkotow, obutuw sɛ gyata ne gyatabere, hena na ɔbɛma wasɔre? Nhyira ne wɔn a wohyira wo, na nnome ne wɔn a wɔdome wo.

Balak gya no kwan

¹⁰ Ɛnna Balak bo fuw Bileam, na ɔbɔɔ ne nsam; na Balak ka kyerɛɛ Bileam sɛ: M'atamfo nnome nti na mihyiaa wo, na hwɛ, nhyira na woahyira wɔn mpɛn abiɛsa yi?

¹¹ Na afei guan kɔ nea wufi! Mekae sɛ anka mɛhyɛ wo anuonyam, na hwɛ, AWURADE asiw w'anuonyam ho kwan.

¹² Na Bileam ka kyerɛɛ Balak sɛ: So manka mankyerɛ w'abɔfo a wosomaa wɔn me nkyɛn no nso sɛ:

¹³ Sɛ Balak de ne fi a dwetɛ ne sika ayɛ no ma ma me mpo a, merentumi mentena AWURADE asɛm mimfi me komam menkɔyɛ papa anaa bɔne; nea AWURADE bɛka no, ɛno na mɛka?

¹⁴ Na afei, hwɛ, merekɔ me man mu: Bra na menkasa nkyerɛ wo nea ɔman yi bɛyɛ wo man nna a edi akyiri no mu.

¹⁵ Na ɔkasae sɛ: Beor ba Bileam asɛm a wanya sɛ ɔreka, ɔbarima a n'ani hu ade yiye no asɛm a wanya,

¹⁶ nea ɔte Nyankopɔn nsɛm na ohu ɔsorosoroni no ho nimdeɛ no, nea ɔhwɛ Tweaduampɔn ahwɛde, na ɔrehwe ase a, wɔtew n'ani so no:

¹⁷ Mihu no, nso ɛnyɛ mprempren, mehwɛ no, nso ɔmmɛn: Nsoromma bepue Yakob mu, na ahempoma befi Israel mu asɔre, na wadwerɛw Moab afanan nyinaa na wabubu ɔko huuyɛ mma no nyinaa.

¹⁸ Na ɔbɛfa Edom adi so, na wafa n'atamfo asase Seir adi so, na Israel bɛyɛ ahoɔdenne ara.

¹⁹ Na obi a ofi Yakob mu bedi tumi, na wasɛe wɔn a wɔaka wɔ kurow no mu no.

²⁰ Afei ɔhwɛɛ Amalek toaa ne kasa no so sɛ: Amanaman mu dikanfo ne Amalek, nanso n'awiei bewie no ɔsɛe mu.

²¹ Na ɔhwɛɛ Kenifo toaa ne kasa no so kae sɛ: Wo tenabea si hɔ pintinn, na wode wo berebuw asie ɔbotan mu;

²² nanso wobegu Kain ase, de akosi sɛ Asur bɛfa wo nnommum.

²³ Na owie ne kasa no sɛ: Buei, sɛ Onyankopɔn reyɛ eyi a, hena na obenya nkwa?

²⁴ Na ahyɛn befi Kitim fam aba, na wɔabɛbrɛ Asur ase abrɛ Eber ase; na ɔno ara nso awie no ɔsɛe mu.

²⁵ Ɛnna Bileam sɔree, na osiim san kɔɔ n'atenae; na Balak nso kɔɔ ne kwan.