4 Mose 23 - KYERƐW KRONKRON

Balak nkɔmhyɛ a edi kan

¹ Na Bileam ka kyerɛɛ Balak sɛ: Sisi afɔremuka ason ma me wɔ ha, na pɛ anantwinini ason ne adwennini ason fa brɛ me ha.

² Na Balak yɛe sɛnea Bileam ka kyerɛɛ no no; na Balak ne Bileam de nantwinini biako ne odwennini biako bobɔɔ ɔhyew afɔre, afɔremuka biara so.

³ Na Bileam ka kyerɛɛ Balak sɛ: Kogyina wo hyew afɔre no ho, na menkɔ: ebia AWURADE behyia me, na ade ko a ɔbɛma mahu no, mɛka makyerɛ wo. Na osiim kɔɔ koko pataa bi so.

⁴ Na Onyankopɔn behyiaa Bileam, na Bileam ka kyerɛɛ no sɛ: Masisi afɔremuka asɔn, na mede nantwinini ne odwennini mabɔ ɔhyew afɔre wɔ afɔremuka biara so.

⁵ Na AWURADE de asɛm hyɛɛ Bileam anom sɛ: San kɔ Balak nkyɛn, na sɛnea kasa ne no.

⁶ Na ɔsan kɔɔ ne nkyɛn, na hwɛ, ogyina ne hyew afɔre no ho, ɔno ne Moab atitiriw nyinaa.

⁷ Na ɔkasae sɛ: Aram na Balak kɔfaa me fii, Moab hene no faa me fii apuei mmepɔw mu sɛ Bra bɛdome Yakob ma me, na bɛbɔ Israel dua.

⁸ Ɛbɛyɛ dɛn na mɛdome nea Onyankopɔn nnomee no no, na ɛbɛyɛ dɛn na mɛbɔ nea AWURADE mmɔɔ no dua no dua?

⁹ Abotan atifi na mifi mihu no, na nkoko so na mifi migyen no: Hwɛ, ɔman a ne nko bɛtena ni, na wɔremmu wɔn mfra wiase aman.

¹⁰ Hena na ɔbɛkan Yakob mfutuma ne Israel abupɛn anan mu biako dodow? Ma menwu teefo wu, na m'awiei nyɛ sɛ wɔn de.

¹¹ Ɛnna Balak ka kyerɛɛ Bileam sɛ: Woyɛ me dɛn ni? M'atamfo nnome nti na mekɔfaa wo bae, na hwɛ, nhyira na wuhyira wɔn.

¹² Na obuae sɛ: So ɛnyɛ nea AWURADE de hyɛ m'anom no na ɛsɛ sɛ mehwɛ meka?

Bileam nkɔmhyɛ a ɛto so abien

¹³ Na Balak ka kyerɛɛ no sɛ: Ɛnne bra na yɛnkɔ baabi foforo ɛ, faako a wubehu wɔn; wɔn ano nko na wubehu, na worenhu wɔn nyinaa; na dome wɔn ma me wɔ hɔ.

¹⁴ Na ɔde no kɔɔ Sofim sare so, Pisga bepɔw atifi, na osii afɔremuka asɔn, na ɔde nantwinini ne odwennini bobɔɔ ɔhyew afɔre wɔ afɔremuka biara so.

¹⁵ Na ɔka kyerɛɛ Balak sɛ: Gyina w'afɔremuka no ho ara, na me de, merekɔ makɔhwɛ.

¹⁶ Na AWURADE behyiaa Bileam, na ɔde asɛm hyɛɛ n'anom sɛ: San kɔ Balak nkyɛn, na sɛɛ na kasa.

¹⁷ Na ɔbaa ne nkyɛn, na hwɛ, ogyina ne hyew afɔre no ho, na Moab atitiriw no ne no gyinagyina hɔ; na Balak bisaa no sɛ: Dɛn na AWURADE kae?

¹⁸ Na ɔkasaa mmebu mu sɛ: Sɔre, Balak, na tie; yɛ aso ma me, Sipor ba.

¹⁹ Onyankopɔn nyɛ onipa, na wadi atoro, anaa onipa ba, na wanu ne ho. So ɔno de, ɔbɛka asɛm bi na ɔrenyɛ, anaasɛ ɔbɛkasa na ɔremma entim?

²⁰ Hwɛ, nhyira na manya; wahyira, na merentumi mennan ani.

²¹ Wanhu amumɔyɛ Yakob mu, na wanhu ɔhaw Israel mu. AWURADE Nyankopɔn di n'akyi, na ɔhene ho ahurusi wɔ no mu.

²² Onyankopɔn ayi wɔn afi Misraim, n'ahoɔden te sɛ ɛkoɔ de.

²³ Ampa ara, adebisa nni Yakob mu, na nkɔmhyɛ nni Israel mu: Afei na wɔbɛka wɔ Yakob ne Israel ho sɛ: Dɛn na Onyankopɔn ayeyi!

²⁴ Hwɛ, ɔman yi sɔre sɛ gyatabere, na ɔma ne ho so sɛ gyata: ɔremmutuw gye sɛ wadi bɔnam, na wanom atɔfo mogya ansa.

²⁵ Ɛnna Balak ka kyerɛɛ Bileam sɛ: Nnome wɔn koraa, na nhyira nso nhyira wɔn koraa.

²⁶ Na Bileam bua ka kyerɛɛ Balak sɛ: So manka mankyerɛ wo sɛ: Biribiara a AWURADE bɛka no, ɛno na mɛyɛ?

Nkɔmhyɛ a ɛto so abiɛsa

²⁷ Na Balak ka kyerɛɛ Bileam sɛ: Bra na memfa wo menkɔ baabi foforo, ebia ɛbɛsɔ Onyankopɔn ani sɛ wobɛdome wɔn ama me wɔ hɔ.

²⁸ Na Balak faa Bileam kɔɔ Peor atifi a ɛhwɛ sare pradada no so no.

²⁹ Na Bileam ka kyerɛɛ Balak sɛ: Sisi afɔremuka ason ma me wɔ ha, na fa anantwinini ason ne adwennini ason brɛ me ha.

³⁰ Na Balak yɛe sɛ Bileam kae no, na ɔde nantwinini ne odwennini bɔɔ ɔhyew afɔre wɔ afɔremuka biara so.