4 Mose 22 - KYERƐW KRONKRON

Balak soma ma wokohyia Bileam

¹ Na Israelfo no tu kɔbɔɔ nsra wɔ Moab tataw so, Yordan fa a ɛbɛn Yeriko agya.

² Na Sipor ba Balak huu nea Israel yɛɛ Amorifo no nyinaa.

³ Na Moab suroo ɔman no pii, efisɛ wɔdɔɔso, na ehu kaa Moab, Israelfo no nti.

⁴ Na Moab ka kyerɛɛ Midian mpanyimfo sɛ: Afei dɔm yi bedi yɛn ho ade nyinaa, sɛnea nantwi di asase so wura no. Saa bere no mu na Sipor ba Balak ne Moab hene.

⁵ Na ɔsomaa abɔfo kɔɔ Beor ba Bileam nkyɛn wɔ Petor a ɛda asubɔnten no ano, ne manfo asase so sɛ, wonkohyia no sɛ: Hwɛ, ɔman bi fi Misraim aba, na hwɛ, wɔabɛkata asase ani, na wɔn ara na wogu m'anim yi.

⁶ Na afei bra bɛdome ɔman no ma me, efisɛ wɔyɛ den sen me, sɛ ebia metumi makum wɔn, na mapam wɔn afi asase yi so anaa; na minim sɛ nea wuhyira no no, wɔahyira no, na nea wodome no no, wɔadome no.

⁷ Na Moab mpanyin ne Midian mpanyin no siim kɔe, na adebisa so akatua no wɔ wɔn nsam; na wɔkɔɔ Bileam nkyɛn de Balak asɛm no kɔtoo n'anim.

⁸ Na ɔka kyerɛɛ wɔn sɛ: Montena ha anadwo yi, na mede mmuae bɛbrɛ mo, sɛnea AWURADE bɛkasa akyerɛ me no. Na Moab asafohene no ne Bileam tenaa hɔ.

⁹ Na Onyankopɔn baa Bileam nkyɛn bɛkae sɛ: Mmarima bɛn na wɔne wo wɔ hɔ yi?

¹⁰ Na Bileam ka kyerɛɛ Onyankopɔn sɛ: Moab hene Sipor ba Balak na ɔsoma baa me nkyɛn bɛkae sɛ:

¹¹ Hwɛ, ɔman a wofi Misraim bae no abɛkata asase ani, afei bra bɛdome wɔn ma me, sɛ ebia metumi ne wɔn ako na mapam wɔn anaa?

¹² Na Onyankopɔn ka kyerɛɛ Bileam sɛ: Wo ne wɔn nnkɔ, nkɔdome ɔman no, efisɛ mahyira wɔn.

¹³ Na Bileam sɔree anɔpa, na ɔka kyerɛɛ Balak asafohene no sɛ: Monkɔ mo asase so, na AWURADE ampene amma me kwan sɛ me ne mo nkɔ.

¹⁴ Na Moab asafohene no sɔre baa Balak nkyɛn bɛkae sɛ: Bileam ampene sɛ ɔne yɛn bɛba.

¹⁵ Na Balak san somaa atitiriw a wɔdɔɔso na wɔn anim yɛ nyam sen kanfo no.

¹⁶ Na wɔkɔɔ Bileam nkyɛn kɔka kyerɛɛ no sɛ: Sɛ Sipor ba Balak se ni: Afei de, mma biribi nnsiw wo me nkyɛn ba kwan,

¹⁷ na mɛhyɛ wo anuonyam pii, na biribiara a wobɛka akyerɛ me no, mɛyɛ enti bra ara, na bɛdome ɔman yi ma me.

¹⁸ Na Bileam bua see Balak nkoa no sɛ: Sɛ Balak de ne fi a dwetɛ ne sika ayɛ no ma no, ma me po a, merentumi mimmu AWURADE me Nyankopɔn asɛm so menkɔyɛ biribi ketewa anaa kɛse.

¹⁹ Na afei mo nso montena ha anadwo yi, na minhu nea AWURADE bɛsan aka akyerɛ me.

²⁰ Na Onyankopɔn baa Bileam nkyɛn anadwo bɛka kyerɛɛ no sɛ: Sɛ nhyia na mmarima yi behyiaa wo a, sɔre na wo ne wɔn nkɔ; nanso asɛm a mɛka makyerɛ wo no nko na di so.

N'afurum gye no nkwa

²¹ Ɛnna Bileam sɔree anɔpa hyehyɛɛ n'afurum na ɔne Moab atitiriw no siim kɔe.

²² Na ɔrekɔ no, Onyankopɔn bo fuwii, na AWURADE bɔfo begyinaa ɔkwan no so sɛ obesiw no kwan; nso na ɔte n'afurum so na ne nkoa baanu ne no na ɛnam.

²³ Na afurum no huu AWURADE bɔfo no sɛ ogyina ɔkwan mu kura nkrante a watwe no, ɔman fii kwan no so kɔfaa wuram; na Bileam hwee afurum no sɛ ɔredan no aba ɔkwan mu.

²⁴ Ɛnna AWURADE bɔfo no kogyinaa bobe nturo ntam anammɔnkoro kwan bi mu a ɔfasu wɔ ha ne ha.

²⁵ Na afurum no huu AWURADE bɔfo no no, ɔde ne ho miaa ɔfasu no, na ɔkaa Bileam nan miaa ɔfasu no; na ɔkɔɔ so hwee no ara.

²⁶ Na AWURADE bɔfo no twiw kɔɔ anim kogyinaa nea ɛhɔ yɛ hihiaa a ɔkwan nni hɔ a wɔbɛdan akɔ nifa anaa benkum.

²⁷ Na afurum no huu AWURADE bɔfo no no, obutuw fam Bileam ase; na Bileam bo fuwii, na ɔde abaa bɔɔ afurum no.

²⁸ Ɛnna AWURADE buee afurum no ano, na ɔka kyerɛɛ Bileam sɛ: Dɛn na mayɛ wo na woabɔ me mpɛn abiɛsa yi?

²⁹ Na Bileam ka kyerɛɛ afurum no sɛ: Sɛ woagoru me ho ntia! Sɛ mikura nkrante a, anka sesɛɛ makum wo.

³⁰ Na afurum no ka kyerɛɛ Bileam sɛ: So ɛnyɛ w'afurum ne me a woatena me so ara de abesi nnɛ da yi? So mayɛ wo sɛɛ pɛn? Na ose: Dabi.

³¹ Ɛnna AWURADE buee Bileam ani, na ohuu AWURADE bɔfo no sɛ ogyina ɔkwan mu kura nkrante a watwe, na ɔkotow de n'anim butuw fam.

³² Na AWURADE bɔfo no ka kyerɛɛ no sɛ: Ɛdɛn nti na wobɔɔ w'afurum no mpɛn abiɛsa yi? Hwɛ, maba sɛ merebesiw wo kwan, efisɛ wo kwan nteɛ wɔ m'anim;

³³ na afurum no huu me, na ɔman fii m'anim mpɛn abiɛsa yi; sɛ wamman amfi m'anim a, anka sesɛɛ makum wo dedaw, na ɔno de, magye no nkwa.

³⁴ Na Bileam ka kyerɛɛ AWURADE bɔfo no sɛ: Mayɛ bɔne, na minnim sɛ wo na wugyina ɔkwan mu hyia me; na afei, sɛɛ yɛ bɔne w'ani so de a, mɛsan m'akyi.

³⁵ Na AWURADE bɔfo no ka kyerɛɛ Bileam sɛ: Wo ne mmarima no nkɔ; na asɛm a mɛka makyerɛ wo no nko na ka. Na Bileam ne Balak atitiriw no siim kɔe.

³⁶ Na Balak tee sɛ: Bileam reba no, ofi kohyiaa no, Moab kurow a ɛda Arnon a ɛyɛ ɔhye no so no mu, wɔ nhyenoa hɔ pɛɛ.

³⁷ Na Balak ka kyerɛɛ Bileam sɛ: So ɛnyɛ ɔsoma na mesomae sɛ, wommehyia wo mmra? Ɛdɛn nti na woamma? So wugye di sɛ merentumi menhyɛ wo anuonyam?

³⁸ Na Bileam ka kyerɛɛ Balak sɛ: Hwɛ, maba wo nkyɛn afei; so metumi maka asɛm bi anaa? Asɛm a Onyankopɔn de hyɛ m'anom no, ɛno na mɛka.

³⁹ Na Bileam ne Balak kɔe, na woduu Kiriat-husot.

⁴⁰ Na Balak de anantwi ne nguan bɔɔ afɔre ma wɔde kɔmaa Bileam ne atitiriw a wɔne no wɔ hɔ no.

⁴¹ Na ade kyee no, Balak faa Bileam, na ɔde no foro kɔɔ Baal sorɔnsorɔmmea so; na ofi hɔ huu ɔman no ano.