4 Mose 18 - KYERƐW KRONKRON

Lewifo no ne Asɔfo no asɛde

¹ Na AWURADE ka kyerɛɛ Aaron sɛ: Wo ne wo mma ne wo mpanyimfi nyinaa, monsoa kronkronbea no ho amumɔyɛ, na wo ne wo mma a wɔka wo ho no, monsoa mo asɔfodi ho amumɔyɛ.

² Na wo nuanom nso, Lewi abusuakuw, w'agya abusuakuw no, fa wɔn ka wo ho bra, na wɔmmoa wɔ ɔsom no mu; nanso wo ne wo mma a wɔka wo ho no na monsom, adanse ntamadan no anim,

³ na wonkura w'adwuma no mu bi na wɔnyɛ ntamadan no ho nnwuma nyinaa; na kronkronbea nneɛma ne afɔremuka no ho nko na wɔmmmɛn, na wɔne mo nyinaa nso anwuwu.

⁴ Na wɔnka wo ho, na wonkura ahyiae ntamadan no ho adwuma no mu nyɛ ntamadan no ho adwuma nyinaa, na onipa foforo biara ammɛn mo.

⁵ Na monhwɛ kronkronbea no ho nnwuma ne afɔremuka no ho nnwuma no, na abufuhyew bi amma Israelfo so bio.

⁶ Na me de, hwɛ, mafa mo nuanom Lewifo afi Israelfo mu mama mo sɛ akyɛde a wɔde ama AWURADE, sɛ wɔnyɛ ahyiae ntamadan no ho som adwuma no.

⁷ Na wo ne wo mma a wɔka wo ho no nhwɛ mo asɔfodi no, afɔremuka no ho nsɛm nyinaa mu, ne ntwamu mmɔhɔɔ no mu de no mu mfa nsom: mede mo asɔfodi no mama mo sɛ akyɛde som adwuma; na obi foforo biara a ɔbɛn no, wonkum no.

⁸ Na AWURADE kasa kyerɛɛ Aaron sɛ: Me de, hwɛ, mede me soma ade so hwɛ mema wo; Israelfo akronkronne nyinaa, mede mama wo ne wo mma sɛ daa kyɛfa.

⁹ Akronkronne mu ade kronkron a efi ogya no mu no mu nea ɛnyɛ wo de ni: wɔn ayɛyɛde biara a wɔde ba, wɔn aduan afɔre biara, ne wɔn bɔne ho afɔre biara ne wɔn asodi ho afɔre biara a wɔde brɛ me no nyɛ akronkronne mu ade kronkron mma wo ne wo mma.

¹⁰ Di no faako a ɛhɔ yɛ kronkron pa ara, mmarima nyinaa nni bi, ɔnyɛ wo ade kronkron.

¹¹ Na eyi nso nyɛ wo de: wɔn ayɛyɛde mu soma ade, Israelfo him afɔre nyinaa; wɔde ama wo ne wo mmammarima ne wo mmabea a wɔka wo ho sɛ daa kyɛfa; obiara a ne ho tew, wo fi mu, nni bi.

¹² Ngo foforo mu nea eye koraa no nyinaa ne nsa foforo ne awi mu nea eye koraa no nyinaa, emu adekan a wɔde ma AWURADE no, wo na wɔde ama wo.

¹³ Wɔn asase so ade nyinaa mu adekan a wɔde brɛ AWURADE no, ɛnyɛ wo de; obiara a ne ho tew wɔ wo fi nni bi.

¹⁴ Israel mu ahyirade nyinaa nyɛ wo de.

¹⁵ Ade biara a ebue yafunu ano ɔhonam nyinaa mu a wɔde brɛ AWURADE no, onipa oo, afieboa oo, ɛnyɛ wo de; nnipa mmakan, ne afieboa a wɔn ho ntew mmakan nso wonhyɛ wɔn anan mu.

¹⁶ Na ananmuhyɛde no de, nea wadi ɔsram no, ma wonnye no dwetɛ nnwetɛbona anum a wobɛhyɛ ama wɔn, sɛ kronkronbea dwetɛbona a ano si gera aduonu no te.

¹⁷ Na nantwi abakan anaa oguanten abakan anaa abirekyi abakan de, mma wonnnye: wɔyɛ kronkron; fa wɔn mogya pete afɔremuka no so na hyew wɔn srade ma ɛnyɛ ogya afɔre a eyi hua huamhuam ma AWURADE.

¹⁸ Na wɔn nam nyɛ wo de sɛ ohim yan ne srɛ nifa no yɛ wo de no.

¹⁹ Akronkronne mu soma ade a Israelfo de brɛ AWURADE nyinaa, mede mama wo ne wo mmammarima ne wo mmabea a wɔka wo ho no sɛ daa kyɛfa; ɔnyɛ AWURADE anim daa nkyene apam mma wo ne w'asefo a wɔka wo ho no.

²⁰ Na AWURADE ka kyerɛɛ Aaron sɛ: Wɔn asase no bi na worenni, na worennya kyɛfa bi wɔn mu: Mene wo kyɛfa ne w'agyapade Israelfo mu.

²¹ Na Lewifo no de, wɔn som a wɔsom ahyiae ntamadan no mu nti, hwɛ, mede Israel mu ntotoso du du nyinaa mama wɔn sɛ agyapade.

²² Na Israelfo no mmmɛn ahyiae ntamadan no bio, na wɔamfa mmusu anwuwu;

²³ na Lewifo no de, wɔn na wɔnyɛ ahyiae ntamadan no ho som adwuma, na, wɔnsoa ɛho mmusu: ɛyɛ daa ahyɛde, mo awo ntoatoaso nyinaa mu; na Israelfo mu de, wɔrennya agyapade bi.

²⁴ Na Israelfo ntotoso du du a wɔmoma no yɛ soma ade ma AWURADE no, mede mama Lewifo no sɛ agyapade; ɛno nti na maka wɔn ho sɛ wɔrennya agyapade bi Israelfo mu no.

²⁵ Na AWURADE kasa kyerɛɛ Mose sɛ:

²⁶ Lewifo de, kasa kyerɛ wɔn sɛ: Sɛ mugyigye Israelfo hɔ ntotoso du du a mede mama mo fi wɔn nkyɛn sɛ mo agyapade no a, ɛnne momma emu bi so nyɛ AWURADE soma ade, ntotoso du du no mu ntoso du.

²⁷ Na wommu mo soma ade mma mo sɛ awiporowbea awi ne nsa-kyi-amoa mu adenya.

²⁸ Enti mo nso momma soma ade so mma AWURADE mfi mo ntotoso du du a mugyigye Israelfo hɔ nyinaa mu, na momfa emu soma ade a ɛyɛ AWURADE de no mma ɔsɔfo Aaron.

²⁹ Ade a wɔbɛma mo nyinaa mu na momma AWURADE soma ade nyinaa, emu nea eye koraa no nyinaa mu akronkronne.

³⁰ Na ka kyerɛ wɔn sɛ: Morema emu nea eye koraa no so a, wommu nea aka no mma Lewifo sɛ awiporowbea nnɔbae ne nsa-kyi-amoa mu adenya.

³¹ Na munni no baabiara, mo ne mo fifo, na ɛyɛ mo ahyiae ntamadan ho som adwuma so akatua.

³² Na moma emu nea eye koraa no ma a, ɛnne na mmusu bi nna mo so na munngu Israelfo akronkronne ho fi, na moanwuwu.