4 Mose 15 - KYERƐW KRONKRON

Aduan afɔrebɔ ho mmara

¹ Na AWURADE kasa kyerɛɛ Mose sɛ:

² Kasa kyerɛ Israelfo no sɛ: Sɛ mudu asase a morekɔtena so a me ara mede merema mo no so,

³ na morebɔ ogya afɔre a efi anantwi anaa nguan mu ama AWURADE a, sɛ ɛyɛ ɔhyew afɔre anaa okum afɔre a mode reyɛ aboade, anaa ɛyɛ ayamye afɔre anaa mo afahyɛ ase de, sɛ morema ayi hua huamhuam ama AWURADE a,

⁴ ɛnne nea ɔde n'ayɛyɛde brɛ AWURADE no, ɔmfa aduan afɔre nso mmra, asikresam abupɛn du mu biako a wɔde ngo susutoa abupɛn anan mu biako afɔtɔw,

⁵ ne ahwiesa susutoa abupɛn anan mu biako, na ɔmfa nka ɔhyew afɔre anaa okum afɔre guan ba biako ho.

⁶ Na odwennini de, nea fa bɔ aduan afɔre ne asikresam abupɛn du mu abien a wɔde ngo afɔtɔw susutoa abupɛn abiɛsa mu biako,

⁷ na fa ahwiesa susutoa abupɛn abiɛsa mu biako nso bra, na enyi hua huamhuam mma AWURADE.

⁸ Na sɛ nantwi ba na wode rebɛbɔ ɔhyew afɔre anaa okum afɔre de ayɛ aboade, anaasɛ wode rebɛbɔ asomdwoe afɔre ama AWURADE a,

⁹ ɛnne aduan afɔre a ɔmfa nka nantwi ba no ho ne asikresam abupɛn du mu abiɛsa a wɔde ngo susutoa fa afɔtɔw;

¹⁰ na fa ahwiesa susutoa fa nso bra, na ɛnyɛ ogya afɔre a eyi hua huamhuam ma AWURADE.

¹¹ Saa na wɔnyɛ nantwi biara anaa odwennini biara anaa nguanten anaa mmirekyi mma no mu biara;

¹² sɛ afɔre a mobɛbɔ no dodow te no, saa ara na monyɛ wɔn mu biara, sɛ wɔn dodow te.

¹³ Wɔn a wɔyɛ ɔman mma nyinaa nyɛ ade yi sa mfa mmɔ ogya afɔre a eyi hua huamhuam mma AWURADE.

¹⁴ Na sɛ ɔhɔho bi abɛsoɛ mo mu, anaa obi wɔ mo mu, mo awo ntoatoaso nyinaa mu na ɔpɛ sɛ ɔbɔ ogya afɔre a eyi hua huamhuam ma AWURADE a, sɛnea moyɛ no no, saa ara na ɔnyɛ no.

¹⁵ Ɔman asafo mu no, ahyɛde biako na ɛnna hɔ mma mo ne ɔhɔho a wabɛsoɛ mo mu no; ɔnyɛ daa ahyɛde mo awo ntoatoaso nyinaa mu: sɛnea mote no, saa nso na ɔhɔho nyɛ, AWURADE anim.

¹⁶ Mmara koro ne atemmude koro na ɛnna hɔ mma mo ne ɔhɔho a wabɛsoɛ mo mu nyinaa.

¹⁷ Na AWURADE kasa kyerɛɛ Mose sɛ:

¹⁸ Ka kyerɛ Israelfo no sɛ: Sɛ mudu asase a mede mo merekɔ so no so,

¹⁹ na ɛba sɛ mudi asase no so aduan no bi a, momma soma ade so mma AWURADE,

²⁰ momfa mo mmɔre a edi kan bi tetare nyɛ soma ade; sɛ moyɛ awiporowbea soma ade no, saa ara na momma so;

²¹ momfa mo mmɔrekan no bi mma AWURADE sɛ soma ade, mo awo ntoatoaso nyinaa mu.

²² Na sɛ mofom na moanni mmara nsɛm a AWURADE aka akyerɛ Mose yi nyinaa so,

²³ nea AWURADE nam Mose so ahyɛ mo nyinaa, fi da a AWURADE hyɛɛ mmara no de rekodu mo awo ntoatoaso so no,

²⁴ na sɛ wɔfom awerɛfirim a ɔman no nnim a, ɛnne asafo no nyinaa mfa nantwinini biako mmɔ ɔhyew afɔre a eyi hua huamhuam mma AWURADE, ne n'aduan afɔre ne n'ahwiesa sɛ ne yɛbea te, ne ɔpapo biako, na ɔnyɛ bɔne ho afɔre.

²⁵ Na ɔsɔfo no mpata mma Israelfo asafo no nyinaa, na wɔde bekyɛ wɔn; efisɛ ɛyɛ ɔfom; na wɔn de, wɔn fom no nti wɔde wɔn ayɛyɛde aba de rebɛbɔ AWURADE gya afɔre ne wɔn bɔne ho afɔre, AWURADE anim;

²⁶ na wɔde bɛkyɛ Israelfo asafo no nyinaa ne ɔhɔho a wabɛsoɛ mo mu no, efisɛ ɔman no nyinaa na wɔyɛ maa wɔn, ɔfom no mu.

²⁷ Na sɛ ɔkra bi anhyɛ da na ɔyɛ bɔne a, ɛnne ɔmfa abirekyibere a wadi afe mmra mmɛbɔ bɔne ho afɔre,

²⁸ na ɔsɔfo no mpata mma ɔkra a ɔfomee awerɛfirim no, AWURADE anim, sɛ ɔrepata ama no; na wɔde bɛkyɛ no.

²⁹ Mmara biako na ɛnna hɔ mma mo mma nea ɔyɛ biribi awerɛfirim: nea ɔyɛ Israelfo mu kuromani, ne ɔhɔho a wabɛsoɛ wɔn mu.

³⁰ Na ɔkra a ɔde anuɔden boapa yɛ biribi no, asase no soni oo, ɔhɔho oo, wasopa AWURADE, na wobetwa saa ɔkra no afi ne man mu akyene,

³¹ efisɛ wabu AWURADE asɛm animtiaa na wabu ne mmara asɛm so: otwa na wobetwa saa ɔkra no akyene, n'amumɔyɛ da no so.

Wosiw homeda sɛefo abo

³² Na Israelfo no wɔ sare so no, wokohuu ɔbarima bi a ɔrepɛ nnyina homeda;

³³ na nnipa a wohuu no sɛ ɔrepɛ nnyina no de no brɛɛ Mose ne Aaron ne asafo no nyinaa;

³⁴ na wɔbɔɔ no dua mu, efisɛ wonnya nkyerɛɛ nea wɔnyɛ no ɛ.

³⁵ Na AWURADE ka kyerɛɛ Mose sɛ: Okum na wonkum ɔbarima no, asafo no nyinaa nsiw no abo wɔ nsra no akyi.

³⁶ Ɛnna asafo no nyinaa de no fii adi kɔɔ nsra no akyi kosiw no abo ma owui, sɛnea AWURADE hyɛɛ Mose no.

Nnwow ho mmara

³⁷ Na AWURADE ka kyerɛɛ Mose sɛ:

³⁸ Kasa kyerɛ Israelfo, na ka kyerɛ wɔn sɛ: Wɔnyɛ wɔn ntama ano nnwow, wɔn awo ntoatoaso nyinaa mu, na wɔmfa bibiri hama nsuso ntama ano nnwow no mu;

³⁹ na ɛnyɛ mo nnwow a mohwɛ kae AWURADE mmara nsɛm nyinaa yɛ, na moammɔre anni mo koma ne mo aniwa akyi, sɛnea motaa di akyi kɔbɔ aguaman no:

⁴⁰ nea ɛbɛyɛ na moakae me mmara nsɛm nyinaa ayɛ, na moayɛ kronkron ama mo Nyankopɔn.

⁴¹ Mene AWURADE mo Nyankopɔn a miyii mo fii Misraim asase so sɛ mɛyɛ mo Nyankopɔn no: Mene AWURADE mo Nyankopɔn.