4 Mose 1 - KYERƐW KRONKRON

Ɔman no kan

¹ Na Israelfo fii Misraim asase so akyi afe a ɛto so abien no, ɔsram a ɛto so abien no da a edi kan no, AWURADE kasa kyerɛɛ Mose Sinai sare so wɔ ahyiae ntamadan no mu sɛ:

² Wo ne Aaron mmu Israelfo asafo nyinaa ano, sɛ wɔn mmusua ne wɔn mpanyimfi te, nhu mmarima nyinaa mmiako mmiako ne wɔn din dodow,

³ efi wɔn a wɔadi mfe aduonu so de rekɔ, Israel mu obiara a obetumi akɔ ɔsa. Wo ne Aaron nkan wɔn sɛ wɔn dɔm te,

⁴ na abusuakuw biara mu ɔbarima bi mmɛka mo ho, ɔbarima a ɔyɛ ne mpanyimfi mu otitiriw.

⁵ Na mmarima a womfi mmusuakuw no mu mmɛboa mo no din ni: Ruben de ne Sedeur ba Elisur.

⁶ Simeon de: Surisadai ba Selumiel.

⁷ Yuda de: Aminadab ba Nahasɔn.

⁸ Isakar de: Suar ba Netanel.

⁹ Sebulon de: Helon ba Eliab.

¹⁰ Yosef mma no de: Efraim de: Amihud ba Elisama. Manase de: Pedahsur ba Gamaliel.

¹¹ Benyamin de: Gideoni ba Abidan.

¹² Dan de: Amisadai ba Ahieser.

¹³ Aser de: Okran ba Pagiel.

¹⁴ Gad de: Deguel ba Eliasaf.

¹⁵ Naftali de: Enan ba Ahira.

¹⁶ Eyinom ne asafo no mu nnipa a wɔwɔ din a wɔyɛ wɔn agyanom mmusuakuw mu mmapɔmma ne Israel mpem so atitiriw.

¹⁷ Na Mose ne Aaron faa mmarima a wɔabobɔ wɔn din yi,

¹⁸ na wohyiaa asafo no nyinaa boaa ano, ɔsram a ɛto so abien no da a edi kan, na wɔkaa wɔn awo ntoatoaso sɛ wɔn mmusua ne wɔn mpanyimfi te, wɔn din dodow, efi wɔn a wɔadi mfirihyia aduonu so de rekɔ, mmiako mmiako;

¹⁹ sɛnea AWURADE hyɛɛ Mose no, saa ara na ɔkan wɔn Sinai sare so nen.

²⁰ Na Israel abakan Ruben mma, wɔn asefo, sɛ wɔn mmusua ne wɔn mpanyimfi te, sɛ wɔn din dodow si, mmiako mmiako, mmarima a wɔadi mfe aduonu ne akyiri nyinaa, wɔn a wobetumi akɔ ɔsa nyinaa,

²¹ wɔn a wɔkan wɔn maa Ruben abusuakuw no si ɔpeduanan asia ne ahanum.

²² Simeon mma, wɔn asefo, sɛ wɔn mmusua ne wɔn mpanyimfi te, wɔn a wɔkan wɔn, sɛ wɔn din dodow si, mmiako mmiako, mmarima a wɔadi mfe aduonu ne akyiri nyinaa, wɔn a wobetumi akɔ ɔsa nyinaa,

²³ wɔn a wɔkan wɔn maa Simeon abusuakuw no si ɔpeduonum akron ne ahasa.

²⁴ Gad mma, wɔn asefo, sɛ wɔn mmusua ne wɔn mpanyimfi te, sɛ wɔn din dodow si, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

²⁵ nnipa a wɔkan wɔn maa Gad abusuakuw no si ɔpeduanan anum ne ahansia aduonum.

²⁶ Yuda mma, wɔn asefo, sɛ wɔn mmusua ne wɔn mpanyimfi te, sɛ wɔn din dodow si, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

²⁷ nnipa a wɔkan wɔn maa Yuda abusuakuw no si ɔpeduɔsɔn anan ne ahansia.

²⁸ Isakar mma, wɔn asefo, sɛ wɔn mmusua ne wɔn mpanyimfi te, sɛ wɔn din dodow si, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

²⁹ nnipa a wɔkan wɔn maa Isakar abusuakuw no si ɔpeduonum anan ne ahannan.

³⁰ Sebulon mma, wɔn asefo, sɛ wɔn mmusua ne wɔn mpanyimfi te, sɛ wɔn din dodow si, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

³¹ nnipa a wɔkan wɔn maa Sebulon abusuakuw no si ɔpeduonum ason ne ahannan.

³² Yosef mma: Efraim mma, wɔn asefo, wɔn mmusua ne wɔn mpanyimfi so din dodow, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

³³ nnipa a wɔkan wɔn maa Efraim abusuakuw no si ɔpeduanan ne ahannum.

³⁴ Manase mma, wɔn asefo, wɔn mmusua ne wɔn mpanyimfi so din dodow, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

³⁵ nnipa a wɔkan wɔn maa Manase abusuakuw no si ɔpeduasa abien ne ahanu.

³⁶ Benyamin mma, wɔn asefo, wɔn mmusua ne wɔn mpanyimfi so din dodow, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

³⁷ nnipa a wɔkan wɔn maa Benyamin abusuakuw no si ɔpeduasa anum ne ahannan.

³⁸ Dan mma, wɔn asefo, wɔn mmusua ne wɔn mpanyimfi so din dodow, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

³⁹ nnipa a wɔkan wɔn maa Dan abusuakuw no si ɔpeduosia abien ne ahansɔn.

⁴⁰ Aser mma, wɔn asefo, wɔn mmusua ne wɔn mpanyimfi so din dodow, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

⁴¹ nnipa a wɔkan wɔn maa Aser abusuakuw no si ɔpeduanan biako ne ahanum.

⁴² Naftali mma, wɔn asefo, wɔn mmusua ne wɔn mpanyimfi so din dodow, efi wɔn a wɔadi mfe aduonu so de rekɔ, wɔn a wobetumi akɔ ɔsa nyinaa,

⁴³ nnipa a wɔkan wɔn maa Naftali abusuakuw no si ɔpeduonum abiɛsa ne ahanan.

⁴⁴ Eyinom ne wɔn a wɔkan wɔn a Mose ne Aaron ne Israel mmapɔmma no kanee no, mmarima dumien a wotuatua wɔn mpanyimfi ano mmiako mmiako no.

⁴⁵ Na Israelfo mu nnipa a wɔkan wɔn nyinaa, sɛ wɔn mpanyimfi te, wɔn a wɔadi mfe aduonu ne akyiri, Israel mu ɔbarima biara a obetumi akɔ ɔsa,

⁴⁶ nnipa a wɔkan wɔn no nyinaa si ɔpehansia ne abiɛsa ne ahanum aduonum.

⁴⁷ Na Lewi mma de, sɛ wɔn agyanom abusuakuw te no, wɔankan wɔn amfra wɔn.

Lewifo no ahyɛde

⁴⁸ Na AWURADE kasa kyerɛɛ Mose sɛ:

⁴⁹ Lewi abusuakuw no nko de, nkan wɔn, nanso mmu wɔn dodow ano mfra Israelfo,

⁵⁰ na wo ara, fa Lewi mma no sisi adanse tenabea no ne ɛho nneɛma nyinaa ne ade biara a ɛka ho no so, wɔn na wɔnsoa tenabea no ne ɛho nneɛma nyinaa, na wɔn na wɔnyɛ ho adwuma, na tenabea no ho ara na wɔmmɔ wɔn nsra nhyia.

⁵¹ Sɛ tenabea no retu a, Lewifo no na wɔntutu, na sɛ wɔresi tenabea no a, Lewifo no na wonsi; na ɔhɔho a otwiw bɛn no, wonkum no.

⁵² Na Israelfo no mmobɔ nsra wɔn ara nsra mu ne wɔn afrankaa ho sɛ wɔn dɔm horow no te mmiako mmiako.

⁵³ Na Lewifo no de, wɔmmɔ adanse tenabea no ho nsra nhyia, na AWURADE abufuw amma Israelfo asafo no so; na Lewifo no nkura adanse tenabea no sohwɛ mu.

⁵⁴ Na Israelfo no yɛɛ sɛnea AWURADE hyɛɛ Mose no nyinaa.