3 Mose 9 - KYERƐW KRONKRON

Wɔde Aaron asɔfodi adwuma hyɛ no nsa

¹ Na da a ɛto so awotwe no Mose frɛɛ Aaron ne ne mma no ne Israel mpanyimfo,

² na ɔka kyerɛɛ Aaron sɛ: Fa nantwi ba a wode bɛyɛ bɔne ho afɔre ne odwennini a wode bɛyɛ ɔhyew afɔre, wonni mu, na fa bra AWURADE anim.

³ Na Israelfo no nso, kasa kyerɛ wɔn sɛ: Momfa ɔpapo mmɛyɛ bɔne ho afɔre, ne nantwi ba ne oguanten ba a wɔadi afe a wodi mu mmɛyɛ ɔhyew afɔre,

⁴ ne nantwinini ne odwennini mmɛyɛ asomdwoe afɔre, na wɔmfa mmɔ afɔre, AWURADE anim, ne aduan afɔre a wɔagu so ngo, efisɛ ɛnnɛ na AWURADE beyi ne ho akyerɛ mo.

⁵ Na wɔde nea Mose hyɛe no baa ahyiae ntamadan no anim, na asafo no nyinaa twiw bae begyinaa AWURADE anim.

⁶ Na Mose kae sɛ: Eyi ne asɛm a AWURADE hyɛe no, monyɛ, na AWURADE anuonyam nyi ne ho nkyerɛ mo.

⁷ Na Mose ka kyerɛɛ Aaron sɛ twiw bɛn afɔremuka no ho, na bɔ wo hyew afɔre ne wo bɔne ho afɔre, na pata ma wo ho ne ɔman no; na fa ɔman no ayɛyɛde bra, na pata ma wɔn, sɛnea AWURADE hyɛe no.

⁸ Na Aaron twiw bɛn afɔremuka no ho, na okum ne bɔne ho afɔre nantwi ba no.

⁹ Na ne mma no de mogya no kɔmaa no, na ɔde ne nsatea bɔɔ mogya no mu de kekaa afɔremuka no mmɛn ho, na ohwiee mogya no petee afɔremuka no ase.

¹⁰ Na bɔne ho afɔre no mu srade ne asaabo ne mmerɛbo so ntontan no, ɔtoo mu gya, afɔremuka no so, sɛnea AWURADE hyɛɛ Mose no.

¹¹ Na nam no ne nhoma no de, ɔde gya hyewee nsra no akyi.

¹² Na okum ɔhyew afɔre aboa no nso, na Aaron mma no de mogya no brɛɛ no, na ohwie petee afɔremuka no so hyiae.

¹³ Na wɔde ɔhyew afɔre no asinasin ne ne tiri no brɛɛ no, na ɔhyewee afɔremuka no so.

¹⁴ Na ɔhohoroo ayamde ne nnyawa no ho, na ɔhyewee ɔhyew afɔre a ɛwɔ afɔremuka no so no so.

¹⁵ Ɛnna ɔde ɔman no afɔre no bae, na ɔfaa bɔne ho afɔre papo a ɔyɛ ɔman no de no kum no de bɔɔ bɔne ho afɔre sɛ kan de no.

¹⁶ Na ɔde ɔhyew afɔre no bae, na ɔbɛyɛɛ no sɛnea yɛbea te no.

¹⁷ Na ɔde aduan afɔre no bae, na ɔfaa emu nsa ma hyewee afɔremuka no so kaa anɔpa ɔhyew afɔre no ho.

¹⁸ Ɛnna okum nantwinini ne odwennini a ɛyɛ ɔman no asomdwoe afɔre no, na Aaron mma no de mogya no brɛɛ no, na ohwie petee afɔremuka no so hyiae.

¹⁹ Na nantwinini ne odwennini no srade no, sradedua no ne nea ɛkata asaabo ho no ne mmerɛbo so ntontan no,

²⁰ wɔde srade no nyinaa guu ɔyan no so, na wɔhyew srade no afɔremuka no so.

²¹ Na ɔyan no ne ɔsrɛ nifa no, Aaron him de yɛɛ ohim afɔre AWURADE anim, sɛnea Mose hyɛe no.

²² Ɛnna Aaron maa ne nsa so kyerɛɛ ɔman no, na ohyiraa wɔn. Na ɔbɔɔ bɔne ho afɔre, ɔhyew afɔre ne asomdwoe afɔre wiei no, osianee.

²³ Na Mose ne Aaron hyɛn ahyiae ntamadan no mu; na wofii adi no, wohyiraa ɔman no. Ɛnna AWURADE anuonyam yii ne ho kyerɛɛ ɔman no nyinaa.

²⁴ Na ogya fii AWURADE anim bɛhyew afɔremuka no so ɔhyew afɔre ne srade no. Na ɔman no nyinaa hui, na wɔde anigye huroe, na wɔde wɔn anim butubutuw fam.