3 Mose 7 - KYERƐW KRONKRON

Asodi afɔrebɔ ho mmara

¹ Na eyi ne asodi ho afɔre ho mmara; ɛyɛ akronkronne mu ade kronkron.

² Nea wokum ɔhyew afɔre aboa no, ɛhɔ ara na wonkum asodi ho afɔre no nso; na onhwie ne mogya mpete afɔremuka no so nhyia.

³ Na onyi ne srade nyinaa mmra: ne sradedua, ne srade a ɛkata ayamde ho no,

⁴ ne asaabo abien, ne srade a ɛwɔ ho, sisia mu no, ne mmerɛbo so ntontan, omfi asaabo ho nyi;

⁵ Na ɔsɔfo no nhyew ne nyinaa afɔremuka no so nyɛ AWURADE gya afɔre: asodi ho afɔre ne no.

⁶ Mmarima a wofi asɔfo abusuakuw mu nyinaa nni; nea ɛhɔ yɛ kronkron na wonni; ɛyɛ akronkronne mu ade kronkron.

⁷ Sɛ bɔne ho afɔre te no, sɛ asodi ho afɔre nso te ne no, mmara koro na ɛda ho; ɔsɔfo a ɔde pata no, ɛnyɛ ne dea.

⁸ Na ɔsɔfo a ɔbɔ ɔhyew afɔre ma obi no, ɔhyew afɔre a ɔbɔe no nhoma nyɛ ɔsɔfo no dea.

⁹ Na aduan afɔre a wɔto fononoo mu nyinaa, ne nea wosiesie no kutu mu ne kyew dade so nyinaa, ɔsɔfo a ɔde ba no na ɛnyɛ ne dea.

¹⁰ Na aduan afɔre a wɔagu so ngo anaa nea ɛyɛ wosee nyɛ Aaron mma nyinaa de, obiara nnya sɛnea ne yɔnko nya.

Asomdwoe afɔre

¹¹ Na eyi ne asomdwoe afɔre a wɔbɔ ma AWURADE no ho mmara.

¹² Sɛ wɔyɛ no aseda afɔre de ba a, aseda afɔre a ɔde ba no nyɛ apiti tetare a wɔde ngo afɔtɔw, ne apiti fam a wɔde ngo agu so ne asikresam tetare a wɔde ngo afɔtɔw akyew.

¹³ Mmɔkaw abodoo tetare na ɔmfa nka n'ayɛyɛde ne n'asomdwoe aseda afɔre no ho mmra.

¹⁴ Na ɔmfa ayɛyɛde no mu biara biako mmra, na wɔmma so mma AWURADE, ɔsɔfo a ɔde asomdwoe afɔre mogya petee no na ɛnyɛ ne dea.

¹⁵ Na n'asomdwoe aseda afɔre no nam no, wonni no da a wɔde bae no ara, wonnnyaw bi nnkosi adekyee.

¹⁶ Na sɛ n'ayɛyɛde no yɛ bɔhyɛ anaa ayamye ayɛyɛde a, wonni no da a ɔbɔ n'afɔre no, na sɛ ade kye bi so a, wonni ara;

¹⁷ na afɔre no nam a ɛbɛka akosi da a ɛto so abiɛsa no, wɔmfa ogya nhyew.

¹⁸ Na sɛ obi di n'asomdwoe afɔre nam no bi da a ɛto so abiɛsa no a, ɛrensɔ ani, na wɔremmu mma nea ɔde bae no, ɛyɛ akyide, na ɔkra a obedi bi no bɛsoa ne mmusu.

¹⁹ Na nam a aka biribi a ɛho ntew no, wonnni; wɔmfa ogya nhyew. Na nam no de, obiara a ne ho tew nni bi.

²⁰ Na ɔkra a obedi asomdwoe afɔre a ɛyɛ AWURADE dea no nam no bi na n'afide da no so no, wobetwa saa ɔkra no afi ne man mu akyene.

²¹ Na ɔkra bi a ɔbɛka afide biara, onipa ho afide bi oo, aboa a ne ho ntew oo, akyide biara a ɛho ntew oo, na obedi AWURADE asomdwoe afɔre nam no bi no, wobetwa saa ɔkra no afi ne man mu akyene.

Mogya ne srade ho akyiwade

²² Na AWURADE kasa kyerɛɛ Mose sɛ

²³ Kasa kyerɛ Israelfo sɛ Nantwi ne oguanten ne abirekyi srade biara, munnni.

²⁴ Na aboa funu srade ne nea wɔatetew no srade, wɔmfa nyɛ adwuma biara, na odi na munnni.

²⁵ Na obiara a obedi afieboa a wɔde bi bɛbɔ AWURADE gya afɔre srade no, wobetwa ɔkra a odi no afi ne man mu akyene.

²⁶ Na mogya biara nso, anomaa de oo, atɔteboa de oo, munnni, mo tenabea biara mu;

²⁷ ɔkra biara a obedi mogya biara no, wobetwa saa ɔkra no afi ne man mu akyene.

²⁸ Na AWURADE kasa kyerɛɛ Mose sɛ

²⁹ Kasa kyerɛ Israelfo sɛ Nea ɔbɛbɔ n'asomdwoe afɔre ama AWURADE no, ɔmfa n'asomdwoe afɔre no mu ayɛyɛde mmrɛ AWURADE.

³⁰ N'ankasa ne nsa na ɔmfa nso AWURADE gya afɔre no mu mmra, srade ne ɔyan na ɔmfa mmra; ɔyan no, wonhim nyɛ ohim afɔre AWURADE anim.

³¹ Na ɔsɔfo no nhyew srade no, afɔremuka no so, na ɔyan no nyɛ Aaron ne ne mma dea.

³² Na ɔsrɛ nifa no, momfa nyɛ mo asomdwoe afɔre mu soma afɔrebɔde mma ɔsɔfo no.

³³ Aaron mma mu nea ɔde asomdwoe afɔre mogya ne srade ba no, ɔno na ɔsrɛ nifa no nyɛ ne kyɛfa.

³⁴ Na ohim yan ne ɛsoma srɛ no na mafa, Israelfo asomdwoe afɔre no mu, na mede mama ɔsɔfo Aaron ne ne mma sɛ wɔn daa kyɛfa a efi Israelfo nsam.

³⁵ Eyi ne Aaron kyɛfa ne ne mma kyɛfa a efi AWURADE gya afɔre mu, ɛda a wɔde wɔn bae sɛ wommedi AWURADE asɔfo,

³⁶ na AWURADE hyɛe sɛ wɔmfa mma wɔn, ɛda a wɔsraa wɔn ngo fii Israelfo mu, sɛ ɛnyɛ wɔn daa kyɛfa, wɔn awo ntoatoaso nyinaa mu no.

³⁷ Eyi ne mmara a ɛda hɔ ma ɔhyew afɔre ne aduan afɔre ne bɔne ho afɔre ne asodi ho afɔre ne nsamhyɛ afɔre ne asomdwoe afɔre

³⁸ a AWURADE hyɛɛ Mose, Sinai bepɔw so, ɛda a ɔhyɛɛ Israelfo sɛ wɔmfa wɔn ayɛyɛde mmrɛ AWURADE, Sinai sare so no.