3 Mose 25 - KYERƐW KRONKRON

Ahomegye afe

¹ Na AWURADE kasa kyerɛɛ Mose Sinai bepɔw so sɛ

² Kasa kyerɛ Israelfo na ka kyerɛ wɔn sɛ: Sɛ mudu asase a mede merema mo no so a, asase no, nni ɔhome afe mma AWURADE.

³ Mfe asia na dua w'afuw mu ade, na mfe asia no pompan wo bobe turo mu nnua ho na boa emu nnɔbae ano;

⁴ na afe a ɛto so ason no nyɛ ahomegye, mma asase no, ɛnyɛ ɔhome mma AWURADE: nnua w'afuw mu ade, na mpompan wo bobe turo mu nnua ho.

⁵ Wo ntwakae a efifi no, ntwa, na wo bobehama a woampempan ho no so akasiaw no, ntetew, ɛnyɛ ahomegye afe mma asase no.

⁶ Na asase no home mu ade nyɛ mo de, na munni, wo ne w'akoa ne w'afenaa ne wo paani ne wo hɔho a wabɛtena wo nkyɛn,

⁷ ne w'afieboa ne mmoa a wɔwɔ w'asase so, na ɛso nnɔbae no nyinaa nyɛ wɔn aduan.

⁸ Na kan ɔhome mfe asɔn, mfe ason ahorow ason fa, na ɔhome mfe ason no mu nna nyɛ aduanan akron.

⁹ Na ɔsram a ɛto so ason no da a ɛto so du no, ma wɔnhyɛn torobɛnto yiye, mpata da no na momma wɔnhyɛn torobɛnto ntwam mo asase nyinaa so.

¹⁰ Na monyɛ afe a ɛto so aduonum no afe kronkron, na mompae ahofadi, asase no so, mma ɛsotefo nyinaa; ɛnyɛ mo ahosɛpɛw afahyɛ, na mo mu biara nsan nkɔ n'agyapade mu, na obiara nsan nkɔ n'abusua mu.

¹¹ Afe a ɛto so aduonum no nyɛ mo ahosɛpɛw afahyɛ Munnnua ade na munntwa ne ntwakae a efifi, na monntetew mo bobe hama a wɔampompan ho no so aba.

¹² Na ɛyɛ ahosɛpɛw afahyɛ afe, ɛnyɛ kronkron mma mo. Munni mfuw so nnɔbae a ɛba afe no mu no.

¹³ Ahosɛpɛw afahyɛ afe yi mu no, mo mu biara nsan nkɔ n'agyapade mu.

¹⁴ Na sɛ wotɔn biribi ma wo yɔnko anaasɛ wotɔ wo yɔnko nsam biribi a, mo mu bi nnni ne nua amim.

¹⁵ Sɛ ahosɛpɛw afahyɛ afe no akyi mfirihyia ano te na tɔ wo yɔnko nkyɛn ade, sɛ nnɔbae mfirihyia ano te na ɔntɔn mma wo.

¹⁶ Mfe no dɔɔso a, to ne bo so, na mfe no sua a, tew ne bo so, efisɛ afe afe nnɔbae na ɔtɔn ma wo.

¹⁷ Na mo mu biara nnni ne yɔnko amim, na suro wo Nyankopɔn; na mene AWURADE mo Nyankopɔn.

¹⁸ Na monyɛ m'ahyɛde na munni m'atemmude so nyɛ, na montena asase no so dwoodwoo.

¹⁹ Na asase no bɛbɔ n'aduan na moadi amee, na moatena so dwoodwoo.

²⁰ Na sɛ moka sɛ: Dɛn na yebedi afe a ɛto so ason no mu? Hwɛ, yennua na yentwa yɛn nnɔbae a,

²¹ ɛnne, mɛhyɛ me nhyira mama mo afe a ɛto so asia no mu, na aba mfe abiɛsa aduan;

²² na mudua aduan afe a ɛto so awotwe no mu a, mubedi nnɔbae dedaw no akosi afe a ɛto so akron no mu; mubedi aduan dedaw no akosi sɛ ne nnɔbae bɛba.

²³ Na wɔnntɔn asase no korakora, efisɛ asase no yɛ me dea na moyɛ me nkyɛn ahɔho ne atubrafo.

²⁴ Na asase a mudi so nyinaa, momma asase no gye ho kwan.

²⁵ Sɛ ehia wo nua na ɔtɔn n'ade bi a, ɛnne ne gyefo a ɔyɛ obusuani a ɔbɛn no mmra mmegye nea ne nua tɔnee no.

²⁶ Na sɛ obi nni gyefo na ne nsa aso na wanya nea ɛso gye a,

²⁷ ɛnne ommu mfe a ɔtɔnee no ano na ɔnhyɛ nea ɛboro so no ananmu mma nea ɔtɔn maa no no, na ɔnsan mmra n'ade ho.

²⁸ Na sɛ ne nsa anso nea ɛso ananmuhyɛ no so a, ɛnne ade a ɔtɔnee no ntena nea ɔtɔe no nsam nkosi ahosɛpɛw afahyɛ afe no, na efi ahosɛpɛw afahyɛ afe no mu no, ɔnsan mmra n'ade ho.

²⁹ Na sɛ obi tɔn ofi a wɔtena mu wɔ kurow a ɔfasu wɔ ho mu a wɔmma ne gye ho kwan nkosi ne tɔn no akyi afe; nna yi na ɔwɔ ne gye ho kwan.

³⁰ Na sɛ wannye ma afe mu wie du a, ɛnne, ofi a ɛwɔ kurow a ɔfasu wɔ ho mu no nyɛ nea ɔtɔe no dea korakora, n'awo ntoatoaso nyinaa mu; ɔdede no ntumi mmegye bio ahosɛpɛw afahyɛ afe no mu.

³¹ Na adan a ɛwowɔ nkuraa a ɔfasu nni ho ase de, wommu nka asase no so mfuw ho: wɔmma ne gye ho kwan, na wommegye ahosɛpɛw afahyɛ afe no mu.

³² Na Lewifo nkurow a ɛyɛ nkurow a wodi so no mu afi de, Lewifo wɔ ne gye ho kwan daa.

³³ Na sɛ Lewifo mu bi annye ne fi a wɔatɔn a ɛwɔ kurow a odi so mu a, ahosɛpɛw afahyɛ afe no mu no ɔmfa n'ade, efisɛ Lewifo nkurow mu afi ne wɔn ade a wodi so, Israelfo mu.

³⁴ Na wɔn nkurow ho mfikyisaase de, wɔnntɔn na ɛyɛ wɔn ade a wodi so daa.

³⁵ Na sɛ ehia wo nua na ɔpa abaw a, so no mu na ɔntena wo nkyɛn sɛ ɔhɔho ne otudanfo.

³⁶ Nnye ne hɔ mfɛntom, na nhuruw ne ka a ɔde wo no, na suro wo Nyankopɔn, na wo nua nnya wo nkyɛn nkwa.

³⁷ Mfa wo sika mma no nnye ɛho mfɛntom, na nhuruw w'aduan a woma no no:

³⁸ Mene AWURADE mo Nyankopɔn a miyii mo fii Misraim asase so sɛ mede Kanaan asase merema mo na mayɛ mo Onyankopɔn.

³⁹ Na sɛ ehia wo nua a ɔwɔ wo nkyɛn na wɔtɔn no ma wo a, nni no nya,

⁴⁰ na mmom ɔntena wo nkyɛn sɛ ɔpaani ne otudanfo; nsom wo nkosi ahosɛpɛw afahyɛ afe no so.

⁴¹ Ɛno na omfi wo nkyɛn, ɔno ne ne mma nyinaa, na ɔnsan nkɔ n'abusua mu ne n'agyanom ade a wodi so no ho.

⁴² Na wɔyɛ me nkoa a miyii wɔn fii Misraim asase so; wɔnntɔn wɔn nkoatɔn.

⁴³ Mfa anyadimɔ nhyɛ no so, na suro wo Nyankopɔn.

⁴⁴ Na w'akoa ne w'afenaa a wubenya no, amanaman a wogugu mo ho no, wɔn mu na tɔ akoa ne afenaa.

⁴⁵ Na ahɔho a wɔatu abɛtena mo nkyɛn no mma no nso, montɔ wɔn mu bi ne wɔn abusuafo a wɔne mo te a wɔawo wɔn mo asase so no bi, na wɔnyɛ mo agyapade,

⁴⁶ na moagyaw wɔn ama mo mma wɔ mo akyi ayɛ wɔn awunnyade ne ade a wodi so daa, na wɔnsom mo nkoasom; na mo nuanom Israelfo de, obiara mmfa anyadimɔ nnhyɛ ne nua so.

⁴⁷ Na sɛ wo nkyɛn hɔho anaa otubrafo bi nsam wɔ biribi, na ehia wo nua a ɔne no wɔ hɔ, na wɔtɔn no ma ɔhɔho a watu abɛtena wo nkyɛn anaa ɔhɔho no abusua mu nipa bi a,

⁴⁸ ɛnne ne tɔn akyi no wɔmma ne gye ho kwan; ne nuanom mu biako nnye no,

⁴⁹ anaasɛ n'agya nua anaa n'agya nua ba nnye no, anaasɛ n'abusua mu bogya bi nnye no, anaasɛ ne nsam wɔ biribi a, onnye ne ho.

⁵⁰ Na ɔne nea ɔtɔɔ no no mmu akontaa mfi afe a wɔtɔn no maa no no so nkosi ahosɛpɛw afahyɛ afe no so, na ne tiade nyɛ sɛnea mfe no dodow te, ɔne no asetena nyɛ sɛ ɔpaani nna.

⁵¹ Sɛ mfe no da so dɔɔso a, ne tiri sika no mu ogye ade a ɔbɛdan ama no no nnɔɔso saa ara;

⁵² na sɛ aka mfe kakraa bi na adu ahosɛpɛw afahyɛ afe no so a, ommu mma no: ne mfe no ano pɛ na ɔnnan ne gye ade mma no.

⁵³ Ɔne no asetena nyɛ sɛ ɔpaani de afe afe: ɔmmfa anyadimɔ nnhyɛ no so wɔ w'anim.

⁵⁴ Na sɛ wɔamfa eyinom so annye no a, ɛnne ahosɛpɛw afahyɛ afe no mu, ɔmfa ne ho nkodi, ɔno ne ne mma nyinaa.

⁵⁵ Na me na Israelfo yɛ me nkoa; me nkoa a miyii wɔn fii Misraim asase so ne wɔn: Mene AWURADE mo Nyankopɔn.