2 Samuel 5 - KYERƐW KRONKRON

Dawid di Israel ne Yuda nyinaa so hene

¹ Ɛnna Israel mmusuakuw nyinaa baa Dawid nkyɛn Hebron bɛkae sɛ: Hwɛ wo nnompe ne wo honam ne yɛn.

² Nso kan no a Saul di yɛn so hene no wone nea ɔde Israel fi adi na wode wɔn ba mu; na AWURADE aka akyerɛ wo sɛ: Wo na wobɛyɛn me man Israel, na wo na wubedi Israel so panyin.

³ Na Israel mpanyin nyinaa baa ɔhene nkyɛn Hebron, na ɔhene Dawid ne wɔn pamee Hebron, AWURADE anim, na wɔsraa Dawid de no sii Israel so hene.

⁴ Dawid bedii hene no na wadi mfe aduasa, na odii hene mfirihyia aduanan.

⁵ Odii Yuda so hene Hebron mfe ason ne asram asia, na odii Israel ne Yuda nyinaa so hene mfe aduasa abiɛsa Yerusalem.

Dawid ko fa Yerusalem

⁶ Na ɔhene ne ne mmarima kɔɔ Yerusalem kotuaa Yebusifo a wɔte asase no so no. Na Yebusifo no ka kyerɛɛ Dawid sɛ: Woremma ha na anifuraefo ne mpakye mpo besiw wo kwan. Na wodwen sɛ Dawid renkɔ mu hɔ.

⁷ Nanso Dawid faa Sion aban no. Ɛne Dawid kurow no.

⁸ Na Dawid kae da no sɛ: Obiara a obekum Yebusifo no nkodu nsuka no ho na onkunkum mpakye ne anifuraefo a Dawid kra tan wɔn no nso! Enti na wɔka sɛ: Onifuraefo ne apakye mmma ofie.

⁹ Na Dawid tenaa aban no mu na ɔfrɛɛ no Dawid kurow. Na Dawid totoo ho afasu hyiae fi Milo ne emu fam.

¹⁰ Na Dawid kɔɔ so yɛɛ kɛse ara na AWURADE, asafo Nyankopɔn, dii n’akyi.

Dawid fifo ne ne nkonimdi horow no

¹¹ Na Tiro hene Hiram somaa abɔfo ma wɔde nkyeneduru nnua ne nnuasenfo ne abantofo baa Dawid nkyɛn na wɔkyekyeree ofi maa Dawid.

¹² Na Dawid hui sɛ AWURADE de no asi Israel so hene pintinn ne sɛ ne man Israel nti wama n’ahenni so.

¹³ Na Dawid fi Hebron bae akyi no, ɔkɔɔ so warewaree yefam ne yerenom fii Yerusalem, na wɔwowoo mmammarima ne mmabea maa Dawid bio.

¹⁴ Na wɔn a wɔwoo wɔn maa Dawid Yerusalem no din ni: Samua ne Sobab ne Natan ne Solomon,

¹⁵ ne Yibhar ne Elisua ne Nefet ne Yafia,

¹⁶ ne Elisama ne Eliada ne Elifelet.

Filistifo so nkonimdi

¹⁷ Na Filistifo tee sɛ wɔasra Dawid de no asi Israel so hene no, Filistifo nyinaa foro bae sɛ wɔbɛhwehwɛ Dawid. Na Dawid tee no, osian kɔɔ aban no mu.

¹⁸ Na Filistifo no bae bɛtrɛw wɔn ho mu Refaim bon mu.

¹⁹ Na Dawid bisaa AWURADE sɛ. Menkɔ Filistifo no so anaa? So wode wɔn bɛhyɛ me nsa anaa? Na AWURADE ka kyerɛɛ Dawid sɛ: Kɔ na mede Filistifo no mɛhyɛ wo nsa ampa.

²⁰ Na Dawid kɔɔ Baal-perasim na Dawid kunkum wɔn hɔ, na ɔkae sɛ: AWURADE apae m’atamfo mu m’anim sɛ wɔpae nsu mu no. Enti ɔfrɛɛ hɔ din sɛ Baal-perasim ase ne: Ntewmubea.

²¹ Na wogyigyaw wɔn ahoni hɔ; na Dawid ne ne nnipa no tasee.

²² Na Filistifo no san foro bae bio bɛtrɛtrɛw wɔn ho mu Refaim bon mu.

²³ Na Dawid bisaa AWURADE no, ɔkae sɛ: Nkɔ! Dan wo ho kosi wɔn akyi na fa baka nnua no ntentenso bra wɔn so.

²⁴ Na sɛ wote nantew nka balsam nnua no atifi a, ɛno de ka wo ho, efisɛ ɛno de na AWURADE afi redi w’anim akokum Filistifo nsra no.

²⁵ Na Dawid yɛe sɛnea AWURADE hyɛɛ no no na okunkum Filistifo no fi Geba de koduu Geser.