2 Samuel 24 - KYERƐW KRONKRON

Dawid kenkan ɔman no mufo

¹ Na AWURADE bo huru hyɛɛ Israel bio, na opiapiaa Dawid ma ɔhyɛɛ wɔn sɛ: Kɔ na kɔkan Israel ne Yuda.

² Na ɔhene ka kyerɛɛ ɔsahene Yoab a ɔka ne ho no sɛ: Kokyin Israel mmusuakuw nyinaa mu fi Dan kosi Beer-seba, na monkan ɔman no, na minhu ɔman no dodow.

³ Na Yoab ka kyerɛɛ ɔhene sɛ: Ma AWURADE wo Nyankopɔn nka ɔman no sɛnea wɔte yi ho mpɛn ha, na me wura ɔhene aniwa nhu, na ɛdɛn nti na me wura ɔhene pɛ sɛ wodi saa asɛm yi?

⁴ Nanso ɔhene asɛm no yɛɛ Yoab ne dɔm no mu asafohene no so den. Na Yoab ne dɔm no mu asafohene no fii ɔhene anim fii adi, sɛ wɔrekɔkan Israel man no.

⁵ Na wokotwaa Yordan, na wɔkɔsoɛɛ Aroer, kurow bi a ɛda Gad subon no mu a ɛkyerɛ Gad na ɛkɔ Yaser no,

⁶ na wɔkɔɔ Gilead ne Kades a ɛwɔ Hitifo asase so ne Tatim-hodsi asase so, na wɔkɔɔ Dan fi hɔ kɔɔ Dan-yaan ne Sidon.

⁷ Na woduu Tiro kurow a ɛyɛ den no ne Hewifo ne Kanaanfo nkurow nyinaa mu. Na wofi hɔ baa Yuda nifa fam wɔ Beer-seba.

⁸ Na wokyin asase no nyinaa so, na asram akron ne adaduonu akyi no, wɔbaa Yerusalem,

⁹ na Yoab de ɔman no anobu no dodow no brɛɛ ɔhene, na Israel dɔm mu mmarima a wɔtwe nkrante ano si ɔpeha ahorow awotwe, na Yuda mmarima si ɔpeha ahorow anum.

¹⁰ Na Dawid kan ɔman no saa no, ne koma bɔɔ no pan, na Dawid ka kyerɛɛ AWURADE sɛ: Nea mayɛ yi, mayɛ bɔne pa ara, na afei AWURADE, mesrɛ wo, ma w’akoa amumɔyɛ nsen nkɔ, na madi nkwaseasɛm sɛ!

¹¹ Na Dawid sɔree anɔpa no, AWURADE asɛm baa odiyifo Gad, Dawid dehufo no nkyɛn sɛ:

¹² Kɔ na kɔka kyerɛ Dawid sɛ: Sɛ AWURADE se ni: Ade abiɛsa na mede mereto w’anim, fa emu biako na memfa menyɛ wo.

¹³ Na Gad baa Dawid nkyɛn bɛka kyerɛɛ no, na ɔka kyerɛɛ no sɛ: So ɔkɔm mmra w’asase so mfe asɔn, anaasɛ wubeguan w’atamfo a wɔtaa wo anim asram abiɛsa, anaasɛ ɔyaredɔm mmra w’asase so nnansa? Afei hwɛ, na hu asɛm ko a memfa mensan menkɔma nea ɔsomaa me no.

¹⁴ Ɛnna Dawid ka kyerɛɛ Gad sɛ: Me ho hia me sɛ! Ma yɛnhwe AWURADE nsam ɛ, na ne mmɔborohunu dɔɔso; na nnipa nsam na wɔmmma mennhwe.

¹⁵ Ɛnna AWURADE maa owuyare baa Israel so fi anɔpa kosii bere a ɔhyɛe no, na ɔman a efi Dan kosi Beer-seba no mu nnipa ɔpeduɔsɔn wuwui.

Arauna awiporowbea afɔrebɔ

¹⁶ Na ɔbɔfo no teɛɛ ne nsa Yerusalem so sɛ ɔresɛe no no, AWURADE nuu ne ho bɔne no ho, na ɔka kyerɛɛ ɔbɔfo a ɔresɛe ɔman no sɛ: Adɔɔso afei, pono wo nsa. Na AWURADE bɔfo no adu Yebusini Arauna awiporowbea ho.

¹⁷ Na Dawid huu ɔbɔfo a ɔresɛe ɔman no no, ɔka kyerɛɛ AWURADE sɛ: Hwɛ, me na mayɛ bɔne, na me na mafom, na nguan yi de, dɛn na wɔayɛ? Ma wo nsa mmra me ne m’agya fi so.

¹⁸ Na Gad baa Dawid nkyɛn da no bɛka kyerɛɛ no sɛ: Foro kɔ na kosi afɔremuka ma AWURADE, Yebusini Arauna awiporowbea hɔ.

¹⁹ Na Dawid nam Gad asɛm no so foro kɔe, sɛnea AWURADE hyɛe no.

²⁰ Na Arauna hwɛe no, ohuu ɔhene ne ne nkoa sɛ wɔreba ne nkyɛn. Na Arauna fii adi kɔkotow ɔhene de n’anim butuw fam.

²¹ Ɛnna Arauna kae sɛ: Ɛdɛn nti na me wura ɔhene ba n’akoa nkyɛn yi? Na Dawid se: Merebɛtɔ wo hɔ awiporowbea no, na masi afɔremuka mama AWURADE, na wɔasiw ɔhaw no kwan afi ɔman no so.

²² Na Arauna ka kyerɛɛ Dawid sɛ: Ma me wura ɔhene mfa na ɔmmɔ afɔre sɛnea eye n’ani so. Hwɛ, ɔhyew afɔrebɔ nantwi ne porow nteaseɛnam ne anantwi no adwumayɛ nnua a wɔde bɛyɛ nnyina ni.

²³ Ɔhene, Arauna de ne nyinaa ma ɔhene. Na Arauna ka kyerɛɛ ɔhene sɛ: AWURADE wo Nyankopɔn ani nsɔ wo.

²⁴ Na ɔhene ka kyerɛɛ Arauna sɛ: Daabi, na ɔtɔ na mɛtɔ no wo hɔ, sɛ ne bo te, na meremfa ade biara a ɛnsom me bo memmɔ AWURADE me Nyankopɔn ɔhyew afɔre. Na Dawid tɔɔ awiporowbea no ne anantwi no maa dwetɛ nnwetɛbona aduonum.

²⁵ Na Dawid sii afɔremuka maa AWURADE wɔ hɔ na ɔbɔɔ ɔhyew afɔre ne asomdwoe afɔre. Na AWURADE gyee mpata no maa asase no, na wosiw ɔhaw no kwan fii Israel so.