2 Samuel 22 - KYERƐW KRONKRON

Dawid aseda ne ne nkonimdi dwom

¹ Na da a AWURADE yii Dawid n’atamfo nyinaa nsam ne Saul nsam no, ɔkaa dwom yi mu nsɛm kyerɛɛ AWURADE,

² na ose: AWURADE, me botan ne m’abankɛse ne me gyefo,

³ me botantim Nyankopɔn a miguan metoa no; me kyɛm ne me nkwagye abɛn, m’abantenten ne me guankɔbea, m’agyenkwa a wugyee me fii akakabensɛm mu.

⁴ AWURADE a woyi no ayɛ no na misu mefrɛ no, na wogye me m’atamfo nsam.

⁵ Na owu asorɔkye twaa me ho hyiae, na ɔsɛe asuasu woro yii me hu.

⁶ Asaman nhama twaa me ho kɔntɔnkrɔn, owu afiri behyiaa me.

⁷ M’ahohia mu misu mefrɛɛ AWURADE, me Nyankopɔn na meteɛɛm mefrɛɛ no. Na ɔtee me nne n’asɔrefi, na me nteɛm duu n’asom.

⁸ Ɛnna asase hinhimii, na ɛwosowee, ɔsoro nnyinaso nso popoe, na ehinhimii, efisɛ ne bo ahuru.

⁹ Owusiw tu fii ne hwenem, na ogya fii n’anom hyew ade, na nnyansramma sɔe wɔ no mu.

¹⁰ Okuntun ɔsoro na odurui, na esum kabii wɔ ne nan ase.

¹¹ Na ɔtenaa Kerub so tui, na wohuu no mframa ntaban so.

¹² Na ɔde esum yɛɛ ne ho asese, nsu mmoaano, amununkum kusuu.

¹³ Ne ho haran mu na nnyansramma dɛwee.

¹⁴ AWURADE boom fii soro, na ɔsorosoroni no ma wɔtee ne nne.

¹⁵ Na ɔtotow agyan de bɔɔ wɔn petee, asraman na ɔde tan wɔn ani.

¹⁶ Na ɛpo mu aka yiyii adi, wiase nnyinaso ho daa hɔ. Ɛnam AWURADE ateɛteɛ so, efi ne hwene mu home hahyeehayee hahyeehayee mu.

¹⁷ Ɔteɛɛ ne nsa fii soro bɛfaa me, ɔtwee me fii nsu pii mu.

¹⁸ Ogyee me fii me tamfo nuɔdenfo ne wɔn a wokyi me nsam, efisɛ wɔsen me ahoɔden.

¹⁹ Wɔbɛtoaa me m’amanehunu da mu, na AWURADE bɛyɛɛ me akyigyina,

²⁰ na oyii me kogyinaa nea ɛhɔ trɛw, ogyee me, efisɛ ɔpɛ m’asɛm.

²¹ AWURADE tuaa me ka sɛ me trenee te, sɛ me nsa ho a afi te no na ɔdan maa me.

²² Na mehwɛɛ AWURADE akwan, na menyɛɛ bɔne mimfii me Nyankopɔn ho ɛ.

²³ Na n’atemmude nyinaa wɔ m’ani so, na n’ahyɛde nso, mimfii ho ɛ.

²⁴ Na mayɛ me ho pɛ mama no, na mahwɛ me ho so mafi m’amumɔyɛ ho.

²⁵ Na AWURADE dan maa me sɛ me trenee, sɛ m’ahotew a ɛda n’anim no te.

²⁶ Adɔeyɛfo na wo ne no bedi no adɔe so, ɔbarima a odi mu na wo ne no bedi no mudi so.

²⁷ Nea ɔtew ne ho na wobɛtew wo ho akyerɛ no, na ɔkɔntɔnkyefo de wubekyinkyim wo ho akyerɛ no.

²⁸ Na ɔman a wohu amane no wugye wɔn, na w’ani sa ahantanfo na woabrɛ wɔn ase.

²⁹ Na wo, AWURADE, wone me kanea, na AWURADE haran me sum mu.

³⁰ Na wo na mede wo metow mehyɛ asafo so, mede me Nyankopɔn mihuruw metra ɔfasu.

³¹ Onyankopɔn de, ne kwan yɛ pɛ, AWURADE asɛm mu tew, ɔyɛ ɔkyɛm ma wɔn a wɔde wɔn ho to no so nyinaa.

³² Na hena ne Nyame sɛ AWURADE nko? Na hena na ɔyɛ ɔbotan sɛ yɛn Nyankopɔn?

³³ Onyankopɔn ne m’aban a ɛyɛ den, na ɔma me kwan yɛ pɛpɛɛpɛ.

³⁴ Ɔyɛɛ m’anan sɛ aforotebere de, na ɔma migyina me sorɔnsorɔmmea so.

³⁵ Ɔkyerɛ me nsa akodi, na m’abasa akuntun kɔbere ta.

³⁶ Na wode wo nkwagye kyɛm maa me, na w’asɛm tie ma meyɛɛ kɛse.

³⁷ Wotrɛw m’anammɔn tutu mu wɔ m’ase na m’anan anwatiri.

³⁸ Mitiw m’atamfo na mesɛee wɔn, na mansan de kosii sɛ mehyew wɔn,

³⁹ na memenee wɔn na mebobɔɔ wɔn na wɔansɔre, na wɔtotɔe me nan ase.

⁴⁰ Na wode ahoɔden bɔɔ me ho so maa akodi; wobrɛɛ wɔn a wɔsɔre hyɛɛ me no ase hyɛɛ m’ase.

⁴¹ Na womaa m’atamfo dan wɔn akyi kyerɛɛ me, wɔn a wokyi me no, na mesɛee wɔn.

⁴² Wɔhwɛe, na ogyefo bi nni hɔ, wɔhwɛɛ AWURADE, na wammua wɔn.

⁴³ Na mepɛtɛw wɔn pasaa sɛ fam mfutuma, mitiatiaa wɔn so mewɔw wɔn sɛ mmorɔn so dɔte.

⁴⁴ Wuyii me fii m’amanko mu, woahwɛ me sɛ meyɛ amanaman ti. Ɔman a minnim wɔn na ɛsom me.

⁴⁵ Ananafo brɛɛ wɔn ho ase maa me, aso tee ara pɛ na wotiee me.

⁴⁶ Ananafo gurowee, na wɔde ahopopo fi wɔn aban mu bae.

⁴⁷ AWURADE te ase, na nhyira ne me botantim no. Na me nkwagye botan Nyankopɔn no, wɔmma no so.

⁴⁸ Onyankopɔn na odii were maa me na ɔbrɛɛ aman ase hyɛɛ m’ase,

⁴⁹ na oyii me fii m’atamfo nsam, na womaa me so fii wɔn a wɔsɔre hyɛɛ me no mu; wugyee me fii onuɔdenfo nsam.

⁵⁰ Enti AWURADE, mɛkamfo wo amanaman mu, na mabɔ wo din mato ayeyi nnwom,

⁵¹ sɛ wone nea ɔma ne hene nkwagye so, na ɔyɛ nea wasra no no adɔe, Dawid ne n’asefo daa.