2 Samuel 16 - KYERƐW KRONKRON

Siba ne Simei

¹ Na Dawid twaam fii atifi hɔ kakra no, hwɛ, Mefiboset abofra Siba behyiaa no; ɔde mfurum abien a wɔahyehyɛ wɔn a wɔsoso abodoo sebɔw ahanu ne bobe aba a wɔabɔ no atɔwatɔw ɔha ne awia bere mu borɔdɔma ɔha ne nsa aboa nhoma kotoku ma.

² Na ɔhene bisaa Siba sɛ: Wode eyinom rebɛyɛ dɛn? Na Siba se: Mfurum yi wɔmfa mma ɔhene fifo na wɔntenatena so, na abodoo ne awia bere mu nnuaba yi, mmerante no nni, na nsa yi nso, wɔmfa mma wɔn a wɔabrɛ sare so na wɔnnom.

³ Na ɔhene kae sɛ: Na ɛhe na wo wura ba no wɔ? Na Siba ka kyerɛɛ ɔhene sɛ: Ɔte Yerusalem, na ose: Ɛnnɛ na Israel fi bɛdan m’agya ahenni ama me.

⁴ Ɛnna ɔhene ka kyerɛɛ Siba sɛ: Hwɛ, nea ɛyɛ Mefiboset de nyinaa yɛ wo dea. Na Siba kae sɛ: Mekotow wo, ma minnya me wura ɔhene anim anuonyam.

⁵ Na ɔhene Dawid duu Bahurim no, hwɛ, ɔbarima bi a ofi Saul abusua mu a wɔfrɛ no Simei a ɔyɛ Gera ba fii adi fii hɔ bae; na ɔreba no, na ɔredome.

⁶ Na ɔpaa Dawid ne ɔhene Dawid nkoa nyinaa abo; nso ɔman no nyinaa ne mmarima akofofo no nyinaa wowɔ ne nifa ne ne benkum.

⁷ Na Simei redome no, sɛ ɔkae ni: Fi adi kɔ, fi adi kɔ, mogyapɛfo, onipa huhuni!

⁸ AWURADE adan Saul a wubesii n’ananmu dii hene no fi mogya nyinaa aba wo so, na AWURADE de ahenni no ahyɛ wo ba Absalom nsa, na hwɛ, w’amane mu na woda yi, efisɛ onipa a wahwie mogya agu ne wo.

⁹ Ɛnna Seruia ba Abisai ka kyerɛɛ ɔhene sɛ: Ɛdɛn nti na ɔkraman funu yi dome me wura ɔhene yi? Ma menkɔ menkotwa ne ti ɛ!

¹⁰ Na ɔhene se: Dɛn na me ne mo Seruia mma wɔ yɛ? Ma ɔnnome ara, na AWURADE ase no sɛ: Dome Dawid! Na ɛhena na ɔbɛka akyerɛ no sɛ: Ɛdɛn nti na woyɛ sɛɛ?

¹¹ Na Dawid ka kyerɛɛ Abisai ne ne nkoa sɛ: Hwɛ, me ba a ofi me yam na ɔrehwehwɛ me akum me yi, na afei menne Benyaminni yi. Munnyaa no mma ɔnnome, efisɛ AWURADE na wahyɛ no.

¹² Ebia AWURADE bɛhwɛ m’amanehunu, na AWURADE de papa ahyɛ me nnome a ɔredome me nnɛ yi ananmu.

¹³ Na Dawid ne ne nnipa nam ɔkwan no so rekɔ no na Simei nam bepɔw no ho ne ntentenso rekɔ; na ɔrekɔ no, na ɔdome ara, na osianee no paa no abo, na ɔtow mfutuma petee.

¹⁴ Na ɔhene ne nnipa a wɔka ne ho no nyinaa duu Yordan no; na wɔabrɛ, na wɔhomee wɔ hɔ.

Absalom wɔ Yerusalem

¹⁵ Na Absalom ne Israel mmarima nyinaa baa Yerusalem na Ahitofel ka ne ho.

¹⁶ Na Husai, Arkini no, a ɔyɛ Dawid adamfo no baa Absalom nkyɛn no, Husai ka kyerɛɛ Absalom sɛ: Ɔhene tiri nkwa, ɔhene tiri nkwa!

¹⁷ Na Absalom ka kyerɛɛ Husai sɛ: W’adɔe a wode yɛ w’adamfo ni? Ɛdɛn nti na wo ne w’adamfo no ankɔ?

¹⁸ Na Husai buaa no sɛ: Daabi, na nea AWURADE ne ɔman yi ne Israel mmarima nyinaa afa no no, ɔno na mɛyɛ ne de na me ne no atena.

¹⁹ Bio nso, hena na mɛsom no? So ɛnyɛ ne ba? Sɛnea mesom w’agya no, saa ara na mɛyɛ wo.

²⁰ Ɛnna Absalom ka kyerɛɛ Ahitofel sɛ: Muntu nea yɛnyɛ ho agyina.

²¹ Na Ahitofel ka kyerɛɛ Absalom sɛ: Kɔ w’agya yefamnom a ogyaw wɔn sɛ wɔnhwɛ ofie no ne wɔn nna, na Israel nyinaa nte sɛ woama wo ho abɔn w’agya, na wɔn a wɔwɔ wo nkyɛn nyinaa nsa bɛyɛ den.

²² Ɛnna wosii Absalom ntamadan, aban no atifi, na Absalom kɔɔ n’agya yefamnom no ho, Israel nyinaa anim.

²³ Na Ahitofel ɛfo a otui nna no mu te sɛnea obi kobisa Onyankopɔn hɔ ade, saa na Ahitofel afotu nyinaa te ma Dawid ne Absalom.