2 Samuel 15 - KYERƐW KRONKRON

Absalom atuatew

¹ Na eyi akyi no, Absalom siesiee nteaseɛnam ne apɔnkɔ, ne mmarima aduonum a wɔbɛwɛn no, dii n’anim.

² Na Absalom tuaa ahema kogyina kurow no pon ano kwan ho. Na obiara a ɔwɔ asɛm bi na ɔreba ɔhene nkyɛn abedi no, Absalom frɛ no sɛ: Kurow bɛn so na wufi? Na ose: Israel mmusuakuw bi mu na w’akoa fi a,

³ Absalom ka kyerɛ no sɛ: Hwɛ wo nsɛm ye na ɛteɛ, nanso obi nni hɔ a ofi ɔhene fam a obetie ama wo.

⁴ Absalom ka nso sɛ: Hena na ɔde me besi asase yi so temmufo na me nkyɛn na anka obiara a okura asɛm bi anaa atemmude bi bɛba na mabu no atɛntrenee.

⁵ Na sɛ obi twiw bɛn no bɛkotow no a, ɔteɛ ne nsa so no mu na ofew n’ano.

⁶ Na sɛɛ na Absalom yɛ Israelfo a wɔba ɔhene nkyɛn asenni nyinaa; na Absalom de nyaa Israel mmarima baa n’afa.

⁷ Na mfirihyia anan twaa mu no, Absalom ka kyerɛɛ ɔhene sɛ: Mesrɛ wo, ma menkɔ menkɔma m’aboade a mede mehyɛɛ AWURADE bɔ wɔ Hebron.

⁸ Efisɛ metenaa Gesur wɔ Aram no w’akoa hyɛɛ bɔ sɛ: Sɛ AWURADE de me san ba Yerusalem a, ɛnne mɛsom AWURADE.

⁹ Na ɔhene ka kyerɛɛ no sɛ: Fa asomdwoe kɔ. Na osiim kɔɔ Hebron.

¹⁰ Na Absalom somasomaa akwansrafo kɔɔ Israel mmusuakuw nyinaa mu sɛ: Mote torobɛnto nka ara pɛ a, monka sɛ: Absalom adi hene wɔ Hebron.

¹¹ Na mmarima ahanu a wɔfrɛɛ wɔn fii Yerusalem kaa Absalom ho kɔe; na wɔn de wɔkɔɔ ɔkɔ hunu na wonnim ho hwee.

¹² Na Absalom soma kohyiaa Giloni Ahitofel, Dawid aguasenni, fii ne kurow Gilo mu, bere a ɔrebɔ afɔre no; na atirisopam no mu yɛɛ den na nnipa a wɔwɔ Absalom nkyɛn no kɔɔ so dɔɔso ara.

Dawid guan fi Yerusalem

¹³ Na ɔbɔfo bi baa Dawid nkyɛn bɛkae sɛ: Israel mmarima koma di Absalom akyi.

¹⁴ Ɛnna Dawid ka kyerɛɛ ne nkoa a wɔne no wɔ Yerusalem nyinaa sɛ: Monsɔre mma yenguan na yɛrennya mu afiye Absalom anim. Monyɛ ntɛm mma yɛnkɔ na wanyɛ ntɛm ammɛto yɛn anyɛ yɛn bɔne bi na wamfa nkrante ammɛbɔ kurow yi.

¹⁵ Na ɔhene nkoa ka kyerɛɛ ɔhene sɛ: Sɛnea me wura ɔhene pɛ nyinaa no, hwɛ wo nkoa bɛyɛ.

¹⁶ Ɛnna ɔhene fii adi na ne fifo nyinaa dii n’akyi; na ɔhene gyaw mmea yefam du sɛ wɔnhwɛ ofie.

¹⁷ Na ɔhene fii adi na ɔman no nyinaa dii n’akyi na wokogyinaa ɔdan bi a ɛwɔ akyirikyiri ho.

¹⁸ Na ne nkoa nyinaa sen faa ne nkyɛn; na Keretifo nyinaa ne Peletifo nyinaa ne Gatfo nyinaa, mmarima ahansia a wodii n’akyi fi Gat bae no, betwaam ɔhene anim.

¹⁹ Ɛnna ɔhene ka kyerɛɛ Gatni Itai sɛ: Ɛdɛn nti na wo nso ne yɛn rekɔ? San kɔ na kɔtena ɔhene nkyɛn na woyɛ ɔnanani ne nea wɔatu no afi ne kurow mu nso.

²⁰ Nnɛra nko na wobae na ɛnnɛ memma wo ne yɛn nkokyin? Na me de, merekɔ baabiara a metumi makɔ; san na fa wo nuanom nso ka wo ho san kɔ adɔe ne nokware so.

²¹ Na Itai buaa ɔhene sɛ: Sɛ AWURADE te ase na me wura ɔhene nso te ase yi, faako a me wura ɔhene bɛtena no, owu mu oo, nkwa mu oo, ɛhɔ ara na w’akoa bɛtena!

²² Ɛnna Dawid ka kyerɛɛ Itai sɛ: Bra bɛsen! Na Gatni Itai ne ne mmarima nyinaa ne mmofra a wɔka ne ho no nyinaa betwaam.

²³ Na asase no sofo nyinaa de nne kɛse sui na ɔman no nyinaa twaam kɔe na ɔhene twaa asu Kidron na ɔman no nyinaa twae kɔfaa sare so kwan fam.

²⁴ Na Abiatar bae na hwɛ, Sadok nso ni, a Lewifo nyinaa ka ne ho. Wɔso Onyankopɔn apam adaka no na wɔsoɛɛ Onyankopɔn adaka no sii hɔ, kosii sɛ ɔman no nyinaa fii kurow no mu twaam wiei ansa.

²⁵ Na ɔhene ka kyerɛɛ Sadok sɛ: Fa Onyankopɔn adaka no san kɔ kurow no mu. Sɛ menya AWURADE anim anuonyam a, ɔde me bɛsan aba na wama mabehu no ne ne tenabea bio.

²⁶ Na sɛ ɔka sɛ: Mempɛ wo a, hwɛ, mini, ma ɔnyɛ me sɛnea eye n’ani so.

²⁷ Na ɔhene nso ka kyerɛɛ ɔsɔfo Sadok sɛ: Hwɛ woyɛ ɔdehufo? So wohu w’ani so anaa? San kɔ kurow no mu dwoodwoo, na wo ba Ahimaas ne Abiatar ba Yonatan, mo mma baanu no ne mo ntena.

²⁸ Hwɛ, mɛtwentwɛn me nan ase sare so tataw mu akosi sɛ asɛm a mobɛka akyerɛ me befi mo nkyɛn aba.

²⁹ Ɛnna Sadok ne Abiatar de Onyankopɔn adaka no san baa Yerusalem na wɔbɛtenaa hɔ.

³⁰ Na Dawid foroo Ngo-bepɔw, na ɔreforo no na ɔde su, na wakata ne ti na ɔnam anammɔn hunu mu; na nnipa a wɔne no nam no nyinaa akatakata wɔn ti na wɔreforo no na wɔresu.

³¹ Na obi ka kyerɛɛ Dawid sɛ: Ahitofel fra wɔn a wɔne Absalom apam no mu. Na Dawid kae sɛ: AWURADE, mesrɛ wo, ma Ahitofel agyinatu nnan nkwaseasɛm.

³² Na Dawid duu atifi nea wɔsɔre Onyankopɔn no, hwɛ, Arkini Husai behyiaa no, wasunsuane n’atade mu na ɔde dɔte agu n’atifi.

³³ Na Dawid ka kyerɛɛ no sɛ: Sɛ wo ne me sen kɔ a, wobɛyɛ adesoa ama me.

³⁴ Na sɛ wosan kɔ kurow no mu kɔka kyerɛ Absalom sɛ: Ɔhene, mɛyɛ w’akoa sɛnea kan no meyɛɛ w’agya akoa no, na afei de, mɛyɛ w’akoa a wobɛma Ahitofel agyinatu no ayɛ ɔkwa ama me.

³⁵ Na asɔfo Sadok ne Abiatar nni wo nkyɛn hɔ anaa? Enti asɛm biara a wobɛte ahemfi no, ka kyerɛ ɔsɔfo Sadok ne Abiatar.

³⁶ Hwɛ wɔn mma baanu no, Sadok ba Ahimaas ne Abiatar ba Yonatan wɔ wo nkyɛn hɔ na wɔn so na momma asɛm biara a mobɛte mfa nnu me nkyɛn.

³⁷ Na Dawid adamfo Husai baa kurow no mu, mmere a na Absalom rehyɛn Yerusalem no.