2 Samuel 1 - KYERƐW KRONKRON

Dawid te Saul wu

¹ Na Saul wu akyi a Dawid asan afi Amalek kum aba no, Dawid dii Siklag nnanu.

² Na da a ɛto so abiɛsa no, hwɛ, ɔbarima bi fi Saul nsra no mu bae, na n’atade asunsuan, na dɔte gu n’atifi; na oduu Dawid nkyɛn no, ɔhwee fam kotow no.

³ Na Dawid bisaa no sɛ: Ɛhe na wufi reba yi? Na ɔka kyerɛɛ no sɛ: Israel nsram na mifi miguanee yi.

⁴ Na Dawid bisaa no sɛ: Asɛm no kɔɔ dɛn? Ka kyerɛ me ɛ! Na ose: Ɔman no aguan afi ɔko no ano, na ɔman no mufo pii atotɔ na wɔawuwu, na Saul ne ne ba Yonatan nso awuwu.

⁵ Na Dawid bisaa aberante a ɔka kyerɛɛ no no sɛ: Woyɛɛ dɛn hui sɛ Saul ne ne ba Yonatan awuwu?

⁶ Na aberante a ɔka kyerɛɛ no no kae sɛ: Mikofii Gilboa Bepɔw so, na hwɛ, Saul tweri ne peaw ho, na hwɛ, nteaseɛnam ne apɔnkɔsotefo retaa no.

⁷ Na ɔhwɛɛ n’akyi no, ohuu me, na ɔfrɛɛ me. Na migyee no so sɛ: Mini.

⁸ Na obisaa me sɛ: Woyɛ hena? Na mibuaa no sɛ: Meyɛ Amalekni.

⁹ Na ɔka kyerɛɛ me sɛ: Begyina me so kum me, na nketenkete akita me, nanso me kra nyinaa da so wɔ me mu.

¹⁰ Ɛnna migyinaa no so mikum no, na minim sɛ n’asehwe akyi no, ɔrennya nkwa. Na mefaa abotiri a ɛbɔ ne ti ne kapo a ɛhyɛ ne nsa no, na mede mabrɛ me wura ha.

¹¹ Ɛnna Dawid soo n’atade mu suan mu, na mmarima a wɔka ne ho no nyinaa nso yeyɛɛ saa.

¹² Na wotwaa adwo na wosui, na wɔkyen kɔm ara koduu anadwofa maa Saul ne ne ba Yonatan ne AWURADE man ne Israel fi, sɛ wɔatotɔ nkrante ano.

¹³ Na Dawid bisaa aberante a ɔka kyerɛɛ no no sɛ: Wufi he? Na ose: Ɔhɔho Amalekni bi ba ne me.

¹⁴ Na Dawid ka kyerɛɛ no sɛ: Ɛdɛn na woansuro sɛ wobɛteɛ wo nsa akum nea AWURADE asra no ngo no?

¹⁵ Na Dawid frɛɛ ne mmerante no mu bi sɛ: Twiw bɛn no bɔ no! Na ɔbɔɔ no ma owui.

¹⁶ Na Dawid ka kyerɛɛ no sɛ: Wo mogya ngu w’atifi na w’ano na adi wo adanse sɛ: Me na makum nea AWURADE asra no no.

Dawid twa kwadwom ma Saul ne Yonatan

¹⁷ Na Dawid twaa Saul ne ne ba Yonatan ho kwadwom yi;

¹⁸ na ɔkae sɛ wɔmfa nkyerɛ Yuda mma, bɛmma dwom; hwɛ, wɔakyerɛw Yasar Nhoma no mu:

¹⁹ Israel, w’anuonyam no wo sorɔnsorɔmmea so na wɔahwirow wɔn mu. Ahoɔdenfo atotɔ dɛn ara!

²⁰ Monnka wɔ Gat, mommmɔ no kaseɛ wɔ Askelon mmɔnten so, na Filistifo mmabea ani annye, na momonotofo mmabea anni ahurusi.

²¹ Mo Gilboa mmepɔw, wɔmmma obosu ne osu nngu mo so, na nnɔbae mfuw mmma mo so, na ɛhɔ na wɔtow ɔhoɔdenfo kyɛm kyenee, nsaase a wɔbɔ so afɔre, Saul kyɛm, sɛ nea wɔnsraa no ngo de.

²² Atɔfo mogya, ahoɔdenfo srade, Yonatan bɛmma ansan amfi ho da, na Saul nkrante nso ansan amfi ho kwa.

²³ Saul ne Yonatan te ase, na wɔyɛ ahoɔfɛfo a wɔn ho yɛ anika, na wɔn wu mu nso wɔanni mpaepaemu. Wɔn ho yɛ hare sen akɔre, wɔn ho yɛ den sen agyata.

²⁴ Israel mmabea, Saul na munsu no, ɔno na ofuraa mo atankɔkɔɔ ma ɛyɛɛ fɛ, na ɔde sika ahyehyɛde guguu mo ntade so.

²⁵ Ahoɔdenfo atotɔ ɔko mu dɛn ara! Wɔahwirow Yonatan mu wo sorɔnsorɔmmea so.

²⁶ Wo nti me ho hia me, me nua Yonatan, w’asɛm yɛɛ me dɛ sɛ, wo dɔ yɛɛ me nwonwa sen mmea dɔ.

²⁷ Ahoɔdenfo atotɔ dɛn ara, na akode asɛe yi.