2 Mose 6 - KYERƐW KRONKRON

¹ Na AWURADE ka kyerɛɛ Mose sɛ: Afei ansa na worebehu nea mɛyɛ Farao, efisɛ wɔde nsa a ɛyɛ den bɛma wama wɔakɔ, na wɔde nsa a ɛyɛ den bɛma wapam wɔn afi n'asase so mpo.

² Na Onyankopɔn ne Mose kasae na ɔka kyerɛɛ no sɛ: Mene AWURADE,

³ na miyii me ho mekyerɛɛ Abraham, Isak ne Yakob sɛ Onyankopɔn Tweaduampɔn, na me din YHWH (AWURADE) no de, mamma wɔamfa anhu me.

⁴ Nanso mama m'apam a me ne wɔn pamee no agyina, sɛ mede Kanaan asase a ɛyɛ wɔn ahɔhobea asase a wɔyɛɛ so ahɔho no mɛma wɔn.

⁵ Nanso mate Israelfo a Misraimfo di wɔn nya no apinisi, na makae m'apam no.

⁶ Ɛno nti ka kyerɛ Israelfo sɛ: Mene AWURADE, na megye mo afi Misraim nkoasom no ase, na mayi mo mafi wɔn anyadi no mu, na mede basa a ateɛ ne atemmu akɛse magye mo.

⁷ Na mɛfa mo mayɛ me man, na mayɛ mo Onyankopɔn, na moahu sɛ mene AWURADE mo Nyankopɔn a ogyee mo fii Misraim nkoasom ase no.

⁸ Na mede mo mɛkɔ asase a mekaa ntam sɛ mede mɛma Abraham, Isak ne Yakob no so, na mede mɛma mo sɛ agyapade. Mene Awurade.

⁹ Na Mose kaa saa kyerɛɛ Israelfo no; nanso ahometew ne nkoasom dennen no nti wɔantie Mose.

¹⁰ Na Awurade ka kyerɛɛ Mose sɛ:

¹¹ Kɔ na kɔka kyerɛ Misraim hene Farao sɛ ɔmma Israelfo mfi n'asase so nkɔ.

¹² Na Mose ka kyerɛɛ Awurade sɛ: Hwɛ, Israelfo no ntie me, na ɛbɛyɛ dɛn na Farao betie me a meyɛ ano mu momonoto yi.

¹³ Na AWURADE ne Mose ne Aaron kasae, na ɔhyɛɛ wɔn sɛ wɔnkɔ Israelfo ne Misraim hene Farao nkyɛn nkoyi Israelfo no mfi Misraim asase so.

¹⁴ Eyinom ne wɔn agyanom afi mu atitiriw: Israel abakan Ruben mma ne: Hanok ne Palu, Hesron ne Karmi; eyinom ne Ruben mmusua.

¹⁵ Na Simeon mma ne: Yemuel ne Yamin ne Ohad ne Yakin ne Sohar ne Saul a ɔyɛ Kanaanni bea bi ba; eyinom ne Simeon mmusua.

¹⁶ Na eyinom ne Lewi mma din wɔn awo ntoatoaso mu: Gerson ne Kahat ne Merari. Na Lewi mfe a odii si mfe ɔha aduasa asɔn.

¹⁷ Gerson mma ne: Libni ne Simei wɔ wɔn mmusua horow mu:

¹⁸ Na Kohat mma ne: Amram ne Ishar ne Hebron ne Usiel. Na Kahat mfe a odii si mfe ɔha aduasa abiɛsa.

¹⁹ Na Merari mma ne Mahli ne Musi. Eyinom ne Lewi mmusua, sɛnea wɔn awo ntoatoaso te.

²⁰ Na Amram faa n'agya ne nua Yokebed waree, na ɔwoo Aaron ne Mose maa no. Na Amram mfe a odii si mfe ɔha aduasa asɔn.

²¹ Na Ishar mma ne: Kora ne Nefeg ne Sikri.

²² Na Usiel mma ne: Misael ne Elsafan ne Sitri.

²³ Na Aaron faa Aminadab babea Eliseba a ɔyɛ Nahson ne nua waree, na ɔwoo Nadab, Abihu, Eleasar ne Itamar maa no.

²⁴ Na Kora mma ne: Asir, Elkana ne Abiasaf; eyinom ne Kora mma mmusua.

²⁵ Na Aaron ba Eleasar faa Putiel mma mu bi waree, na ɔwoo Pinehas maa no. Eyinom ne Lewifo agyanom atitiriw sɛ wɔn mmusua te.

²⁶ Eyinom ne Aaron ne Mose a Awurade ka kyerɛɛ wɔn sɛ: Munyi Israelfo mfi Misraim asase so sɛ wɔn dɔm te no.

²⁷ Wɔne wɔn a wɔne Misraim hene Farao kasae sɛ wobeyi Israelfo afi Misraim akɔ no, Mose ne Aaron no ni.

²⁸ Na da a AWURADE ne Mose kasae Misraim asase so no,

²⁹ AWURADE ka kyerɛɛ Mose sɛ: Mene Awurade, ka nea mɛka makyerɛ wo nyinaa kyerɛ Misraim hene Farao.

³⁰ Na Mose ka kyerɛɛ AWURADE sɛ: Hwɛ, ano mu momonoto ne me, na ɛbɛyɛ dɛn na Farao betie me?