2 Mose 5 - KYERƐW KRONKRON

Mose ne Aaron kɔ Farao anim

¹ Na ɛyɛe no, Mose ne Aaron kɔɔ Farao nkyɛn kɔka kyerɛɛ no sɛ: Sɛ AWURADE, Israel Nyankopɔn, se ni: Ma me man nkɔ na wɔnkɔhyɛ fa mma me wɔ sare so.

² Na Farao se: Hena ne AWURADE a metie ne nne na mama Israel akɔ? Minnim AWURADE no, na Israel nso, meremma wɔnkɔ.

³ Na wose: Hebrifo Nyankopɔn abehyia yɛn; enti ma yɛnkɔ sare so nnansa kwan, na yɛnkɔbɔ Awurade, yɛn Nyankopɔn, afɔre, na wamfa owuyare anaa nkrante ammetoa yɛn.

⁴ Na Misraimhene ka kyerɛɛ wɔn sɛ: Ɛdɛn nti na mo, Mose ne Aaron, muyi ɔman no fi wɔn nnwuma so? Monkɔ mo adwuma so.

⁵ Na Farao se: Monhwɛ, afei nnipa no adɔɔso wɔ asase no so, na morepɔn wɔn afi wɔn adwumayɛ mu yi!

⁶ Na da no ara Farao hyɛɛ ɔman no adwumayɛ so ahwɛfo ne wɔn aboafo sɛ:

⁷ Mommma ɔman no sare a wɔde yɛ ntayaa no bio sɛ kan no; wɔn ankasa nkɔpɛ sare no.

⁸ Na ntayaa dodow a wɔyɛ daa no, munnye wɔn, munnyi so bi, efisɛ wɔyɛ anihawfo, enti na wosu sɛ: Ma yɛnkɔ nkɔbɔ yɛn Nyankopɔn afɔre no.

⁹ Momma wɔn adwuma a emu yɛ duru, na wɔnyɛ, na wɔantie nsɛnhunu.

¹⁰ Na ɔman no adwumayɛ so ahwɛfo ne wɔn aboafo no bae bɛka kyerɛɛ ɔman no sɛ: Sɛ Farao se ni: Meremma mo sare bio.

¹¹ Mo ara monkɔ nkɔpɛ sare wɔ nea mubenya; na mo adwuma no nso, wɔrentew so hwee.

¹² Ɛnna ɔman no bɔ petee Misraim asase nyinaa so kɔboaboaa awi ntwakae ano de yɛɛ sare mesemese no.

¹³ Na adwumayɛ so ahwɛfo no piapiaa wɔn kae sɛ: Munwie mo da koro adwuma wɔ ne bere mu, sɛ bere a sare wɔ hɔ no.

¹⁴ Na wɔhwee Israelfo ahwɛfo a Farao adwumayɛ so ahwɛfo no de asisi wɔn so no kae sɛ: Ɛdɛn nti na moanwie ntayaa a wɔahyɛ mo no nnɛ ne nnɛra nyinaa, sɛ kan no?

¹⁵ Ɛnna Israelfo ahwɛfo no bae besu kyerɛɛ Farao sɛ: Ɛdɛn nti na wo ne wo nkoa di no saa?

¹⁶ Wɔmmaa wo nkoa sare bi ɛ, nso wose yɛnyɛ ntayaa; na hwɛ, wɔhwe wo nkoa, nso ɛyɛ wo ara wo nkurɔfo no mfomso.

¹⁷ Na ose: Anihawfo, anihawfo na moyɛ. Enti na moka sɛ: Ma yɛnkɔ nkɔbɔ AWURADE afɔre.

¹⁸ Enti monkɔ nkɔyɛ adwuma, na sare de, wɔremma mo, nso ntayaa no dodow de, mobɛma ara.

¹⁹ Na wɔkae sɛ: Munnyi mo da koro adwuma mu ntayaa no so ara da, no, Israelfo adwumayɛ so ahwɛfo no hui sɛ amane na ato wɔn.

²⁰ Na wofi Farao nkyɛn reba no, wɔbɛtoo Mose ne Aaron a wogyina hɔ rebehyia wɔn,

²¹ na wɔka kyerɛɛ wɔn sɛ: AWURADE nhwɛ mo mmu atɛn sɛ moama yɛn ho abɔn wɔ Farao ne ne nkoa anim, na mode nkrante ahyɛ wɔn nsa sɛ wɔmfa nkum yɛn.

Mose kasa kyerɛ AWURADE

²² Na Mose san baa AWURADE nkyɛn bɛkae sɛ: AWURADE, adɛn na woayɛ ɔman yi bɔne sɛɛ? Adɛn na wosomaa me yi?

²³ Na efi bere a mebaa Farao nkyɛn na mede wo din me ne no kasae no, wayɛ ɔman yi bɔne, na wo nso wunnyee wo man ɛ!