2 Mose 4 - KYERƐW KRONKRON

Onyankopɔn ma Mose tumi sonowonko

¹ Na Mose buaa AWURADE sɛ: Na sɛ wɔannye me anni, na wɔantie me nne, na wɔka sɛ: AWURADE nyii ne ho adi nkyerɛɛ wo ɛ!

² Na AWURADE ka kyerɛɛ no sɛ: Dɛn na ekura wo nsam yi?

³ Na ose: Poma. Na ose: Tow kyene fam! Na ɔtow kyenee fam, na ɛdan ɔwɔ. Na Mose guan fii ho.

⁴ Na AWURADE ka kyerɛɛ Mose sɛ: Teɛ wo nsa na so ne dua mu. Na ɔteɛɛ ne nsa kyeree no, na ɛdan poma wɔ ne nsam.

⁵ Nea ɛbɛyɛ na wɔagye adi sɛ Awurade, wɔn agyanom Nyankopɔn, Abraham Nyankopɔn, Isak Nyankopɔn ne Yakob Nyankopɔn no, ayi ne ho akyerɛ wo nen.

⁶ Na AWURADE ka kyerɛɛ no bio sɛ: Fa wo nsa hyɛ wo kokom! Na ɔde ne nsa hyɛɛ ne kokom, na oyii, na hwɛ, ɛho agu kwata fitaa sɛ sukyerɛma.

⁷ Na ose: Fa wo nsa san hyɛ wo kokom! Na ɔsan de ne nsa hyɛɛ ne kokom, na oyi fii ne kokom, na hwɛ, adan sɛ ne honam ara.

⁸ Na sɛ wɔannye wo anni, na wɔammu sɛnkyerɛnne a edi kan no a, wobegye sɛnkyerɛnne a ɛto so abien no adi.

⁹ Na sɛ wɔannye nsɛnkyerɛnne abien yi nso anni na wɔantie wo nne a, ɛnne kɔsaw asubɔnten no mu nsu kohwie gu asase kesee so, na nsu a wosawee, asu no mu no bɛdan mogya wɔ asase kesee no so.

¹⁰ Na Mose ka kyerɛɛ AWURADE sɛ: Mesrɛ wo, AWURADE! Me de, ɛde besi nnɛ anaa efi bere a wo ne w'akoa kasae yi, m'ano ntew; me kasa yɛ nyaa na me tɛkrɛma nso yɛ duru.

¹¹ Na AWURADE ka kyerɛɛ no sɛ: Hena na ɔyɛɛ onipa ano? Anaasɛ hena na ɔyɛ mum anaa ɔsotifo, anaa ɔdehufo anaa onifuraefo? Ɛnyɛ me AWURADE ara?

¹² Na afei kɔ, na me ara medi w'ano akyi na makyerɛ wo nea ka.

¹³ Na Mose kae sɛ: Mesrɛ wo, AWURADE! Soma onipa foforo biara a wopɛ.

¹⁴ Ɛnna AWURADE bo fuw Mose, na ose: So minnim sɛ wo nua Aaron, Lewini no, nim kasa? Na hwɛ, wafi adi rebehyia wo, na sɛ ohu wo a, ne koma bɛtɔ ne yam.

¹⁵ Na kasa kyerɛ no, na fa nsɛm no hyɛ n'anom; na me de, medi w'ano ne n'ano akyi, na makyerɛ mo nea monyɛ.

¹⁶ Na ɔnkasa w'ano nkyerɛ ɔman no, na ɔbɛdan w'ano na woadan no Onyankopɔn.

¹⁷ Na poma yi a wode bɛyɛ nsɛnkyerɛnne no, fa kura wo nsam.

Mose san kɔ Misraim

¹⁸ Na Mose kɔe, na ɔsan kɔɔ n'ase Yetro nkyɛn, na ɔkɔka kyerɛɛ no sɛ: Ma mensan menkɔ me nuanom a wɔwɔ Misraim no nkyɛn menkɔhwɛ sɛ wɔda so tete ase anaa. Na Yetro ka kyerɛɛ Mose sɛ: Fa asomdwoe kɔ.

¹⁹ Na AWURADE ka kyerɛɛ Mose wɔ Midian sɛ: San kɔ Misraim, efisɛ nnipa a wɔhwehwɛ wo akum wo no nyinaa awuwu.

²⁰ Na Mose faa ne yere ne ne mma de wɔn tenatenaa mfurum so, na ɔsan baa Misraim asase so. Na Mose faa Onyankopɔn poma no kurae.

²¹ Na AWURADE ka kyerɛɛ Mose sɛ: Sɛ wosan kɔ Misraim a, hwɛ na yɛ anwonwade a mede mahyɛ wo nsa no nyinaa Farao anim; na me de, mepirim ne koma, na ɔremma ɔman no nkɔ.

²² Na ka kyerɛ Farao sɛ: Sɛnea AWURADE se ni: M'abakan ne Israel.

²³ Na mise wo sɛ: Ma me ba nkɔ nkɔsom me. Na sɛ woampene amma wankɔ a, hwɛ, me de, mekum w'abakan.

²⁴ Na AWURADE bɛtoaa no ɔkwan so, asoɛe a wɔdaa hɔ no, pɛe sɛ okum no.

²⁵ Ɛnna Sipora faa twɛrebo de twaa ne ba no twetia, na ɔtow kyenee ne nan ase kae sɛ: Woyɛ mogya ayeforokunu ma me!

²⁶ Ɛnna ogyaa no. Ɛnna twetiatwa no nti ɔkae sɛ: Mogya ayeforokunu ne wo.

²⁷ Na AWURADE ka kyerɛɛ Aaron sɛ: Kɔ sare so kohyia Mose. Na ɔkɔe kɔtoo no wɔ Onyankopɔn bepɔw no ho, na ofew n'ano.

²⁸ Na Mose kaa AWURADE nsɛm a ɔde asoma no no nyinaa ne nsɛnkyerɛnne a ɔde ahyɛ ne nsa no nyinaa kyerɛɛ Aaron.

²⁹ Na Mose ne Aaron kɔ kɔboaboaa Israelfo mpanyimfo nyinaa ano.

³⁰ Na Aaron kaa nsɛm a AWURADE ka kyerɛɛ Mose no nyinaa kyerɛɛ wɔn, na ɔyɛɛ nsɛnkyerɛnne no wɔ ɔman no anim.

³¹ Na ɔman no gye dii. Na wɔtee sɛ AWURADE abɛhwɛ Israelfo na wahu wɔn amanehunu no, wɔbobɔɔ wɔn mu ase sɔree.