2 Mose 35 - KYERƐW KRONKRON

Homeda ho nhyehyɛe

¹ Na Mose hyiaa Israelfo asafo no nyinaa, na ɔka kyerɛɛ wɔn sɛ: Nsɛm a AWURADE ahyɛ sɛ munni so ni:

² Nnansia na wɔmfa nyɛ adwuma, na ɛda a ɛto so ason no nyɛ mo homeda kronkron a mode home ma AWURADE; obiara a ɔbɛyɛ mu adwuma no, wobekum no.

³ Monnsɔ ogya mo tenabere nyinaa homeda.

Soma afɔrebɔde

⁴ Na Mose ka kyerɛɛ Israelfo asafo no nyinaa sɛ: Asɛm a AWURADE ahyɛ ni:

⁵ Munyi soma afɔrebɔde wɔ mo mu mmrɛ AWURADE; obiara a ne koma ka no mfa soma afɔrebɔde mmrɛ AWURADE: sika ne dwetɛ ne kɔbere,

⁶ ne bibiri ne asaawa a ɛbere dum ne adidi ne asaawa fitaa ne mmirekyi nwi,

⁷ ne adwennini nhoma a wɔahyɛ no kɔkɔɔ ne sukraman nhoma ne ɔkanto nnua,

⁸ ne kanea no ho ngo ne nnuhuam a wɔde bɛyɛ ɔsra ngo ne ɔhyew aduhuam,

⁹ ne apopobibiri abo ne nsisimu abo a wɔde bɛyɛ asɔfotade ne adɛbo no.

¹⁰ Na mo mu koma mu anyansafo nyinaa mmra mmɛyɛ ade a AWURADE ahyɛ nyinaa,

¹¹ tenabea no, ne ntamadan ne ne nkataso ne nkɔtɔkoro ne ne ntaaboo a esisi ho, ne mmeamu, n'adum ne ne nnyinaso;

¹² adaka no ne ne mpoma, mpata agua no ne mmɔhɔɔ a etwa mu no,

¹³ ɔpon no ne ne mpoma ne ɛho nneɛma nyinaa ne kyerɛ abodoo no,

¹⁴ kaneadua no ne ɛho nneɛma ne n'akanea ne kanea no ho ngo,

¹⁵ ne aduhuamhyew muka no ne ne mpoma ne ɔsra ngo no ne ɔhyew aduhuam no ne tenabea no ano nkataano no;

¹⁶ ɔhyew afɔremuka no ne ne kɔbere ntontan no, ne mpoma ne ɛho nneɛma nyinaa, asankasɔn no ne ne ntaase;

¹⁷ adiwo no ho mmɔhɔɔ no, n'adum ne ne nnyinaso ne adiwo no abobow ano nkataano no,

¹⁸ tenabea no ho mmofunnua ne ɛho ntampehama;

¹⁹ ɔsom ntade a wɔde som kronkronbea hɔ, ɔsɔfo Aaron ntade kronkron no ne ne mma ntade a wɔde bedi asɔfo no.

Ɔman no afɔrebɔde

²⁰ Na Israelfo asafo no nyinaa fii Mose anim kɔe.

²¹ Na wɔbae, obiara a ne koma kanyan no, ne obiara a ne honhom kaa no, na wɔde AWURADE soma afɔrebɔde bae sɛ wɔmfa nyɛ ahyiae ntamadan no ne ɛho som nneɛma nyinaa ne ntade kronkron no.

²² Na mmarima ne mmea nyinaa, dodow a wɔn koma pɛ nyinaa bae, na wɔde nkapo ne asom nkaa ne mpɛtea ne krakyere ne sika nnwinne ahorow nyinaa bae, na obiara a ɔpɛ sɛ ɔde sika ohim afɔre brɛ AWURADE,

²³ ne obiara a ne nsam wɔ bibiri ne asaawa a ɛbere dum ne adidi ne asaawa fitaa ne mmirekyi nwi ne adwennini nhoma kɔkɔɔ ne sukraman nhoma no de bae;

²⁴ obiara a okura dwetɛ ne kɔbere mfraefrae soma afɔrebɔde ma AWURADE no de bae. Na obiara a ne nsam wɔ ɔkanto nnua a wɔde bɛyɛ ɔsom nneɛma no biara no nso de bae.

²⁵ Na mmea a wɔwɔ nyansa koma nyinaa de wɔn nsa too asaawa, na wɔde nea wɔtoe no bae, bibiri ne asaawa a ɛbere dum ne adidi ne asaawa fitaa;

²⁶ na mmea a wɔn koma kaa wɔn nyansa mu nyinaa too mmirekyi nwi asaawa.

²⁷ Na mpanyimfo no de apopobibiri abo ne nsisimu abo a wɔde bɛyɛ asɔfotade ne adɛbo no bae,

²⁸ ne nnuhuam ne ngo a wɔde bɛyɛ akanea ngo ne ɔsra ngo ne ɔhyew aduhuam no.

²⁹ Na Israelfo mu mmarima ne mmea nyinaa a wɔn koma kaa wɔn sɛ wɔmfa nnwuma a Awurade nam Mose so hyɛe sɛ wɔnyɛ no ho biribi mmra no de ayamye ayɛyɛde brɛɛ Awurade.

Ntamadan si ho adwumayɛfo Ntomadan sie ho adwumayɛfoɔ

³⁰ Na Mose ka kyerɛɛ Israelfo no sɛ: Monhwɛ, AWURADE afrɛ Hura ba Uri ba Besalel a ofi Yuda abusuakuw mu,

³¹ na ɔde Onyankopɔn honhom ahyɛ no ma, nyansa ne nhumu ne nimdeɛ ne adwinni nyinaa mu,

³² sɛ onni adwinni horow, sika ne dwetɛ ne kɔbere,

³³ ne nsisimu abo mu nkurukyerɛwee ne nnua sinsen ne adwinni ahorow,

³⁴ na ɔde ahyɛ ne komam sɛ ɔnkyerɛ ebinom nso, ɔno ne Ahisamak ba Oholiab a ofi Dan abusuakuw mu no.

³⁵ Wɔn na ɔde komam nyansa ahyɛ wɔn ma sɛ wonni adwinni horow nyinaa, sikadwumfo ne duadwumfo ne ɔnwemfo a odi bibiri ne asaawa a ɛbere dum ne adidi ne asaawa fitaa mu adwinni ne ntamanwemfo de: wɔn a wodi adwinni biara, ne wɔn a wɔbɔ wɔn tirim di adwinni horow.