2 Mose 33 - KYERƐW KRONKRON

AWURADE hyɛ Israel sɛ wɔmfi Bepɔw Sinai ase nkɔ

¹ Na AWURADE ka kyerɛɛ Mose sɛ: Sim fi ha kɔ, wo ne ɔman a wukoyii wɔn fii Misraim bae no, kɔ asase a mekaa ɛho ntam mekyerɛɛ Abraham, Isak ne Yakob sɛ: w'asefo na mede mɛma wɔn, no so.

² Na mɛsoma ɔbɔfo adi wɔn anim, na matu Kanaanni ne Amorini ne Hetini ne Perisini ne Hewini ne Yebusini no,

³ kɔ asase a nufusu ne ɛwo sen so no so; na merentena wo mu ne wo nkɔ, efisɛ woyɛ ɔman a wo kɔn asen, na mammene wo ɔkwan no mu.

⁴ Na ɔman no tee asɛmmɔne yi no, wodii nkɔmmɔ, na obiara anhyɛ n'ahokekade.

⁵ Na AWURADE ka kyerɛɛ Mose sɛ: Kɔka kyerɛ Israelfo no sɛ: Moyɛ ɔman a mo kɔn asen; sɛ metena mo mu kakraa bi me ne mo kɔ a, anka mɛhyew mo; na afei munyi mo ho ahokekade, na minhu nea mɛyɛ mo.

⁶ Ɛnna Israelfo no yiyii wɔn ho ahokekade fi bepɔw Horeb ho hɔ ara.

⁷ Na Mose faa ntamadan no de kosii nsra no akyi akyirikyiri, na ɔfrɛɛ no ahyiae ntamadan. Na obiara a ɔhwehwɛ AWURADE no fi adi kɔ ahyiae ntamadan no a ɛwɔ nsra no akyi no ho.

⁸ Na sɛ Mose fi adi kɔ ntamadan no ho a, ɔman no nyinaa sɔresɔre kogyinagyina wɔn ntamadan ano, na wɔde Mose akyi hwɛ ara kosi sɛ ɔhyɛn ntamadan no mu.

⁹ Na sɛ Mose hyɛn ntamadan no mu a, omununkum dum no sian begyina ntamadan no ano, na AWURADE ne Mose kasa.

¹⁰ Na ɔman no nyinaa hu omununkum dum no sɛ egyina ntamadan no ano a, ɔman no nyinaa sɔresɔre, na obiara kotow sɔre wɔ ne ntamadan ano.

¹¹ Na AWURADE ne Mose di nhwɛanim kasa sɛ onipa ne ne yɔnko kasa. Na ɔsan ba nsra no mu a, ne somfo Nun ba Yosua a ɔyɛ abofra no de, omfi ntamadan no mu.

¹² Na Mose ka kyerɛɛ Awurade sɛ: Hwɛ wo ara na woka kyerɛ me sɛ: Fa ɔman yi kɔ, nanso womma minhu nea wobɛsoma no na ɔne me akɔ. Nanso wo ara na woaka sɛ: Mede wo din minim wo, na woanya m'anim dom nso.

¹³ Enti mesrɛ wo, sɛ manya w'anim dom a, ma minhu wo kwan ɛ, na mahu wo, na manya w'anim dom; na hu sɛ nkurɔfo yi yɛ wo man a!

¹⁴ Na AWURADE kae sɛ: M'anim ne wo bɛkɔ, na mama woakɔhome.

¹⁵ Na ɔka kyerɛɛ no sɛ: Sɛ w'anim ne yɛn renkɔ a, ɛnne mfa yɛn mfi ha nkɔ.

¹⁶ Na ɛdɛn na wɔde behu wɔ ha sɛ me ne wo man yi anya w'anim dom, ɛnyɛ wo kɔ a wo ne yɛn bɛkɔ no? Na me ne wo man yi adɛnsow wɔ aman a wɔwɔ asase ani nyinaa mu.

¹⁷ Na AWURADE ka kyerɛɛ Mose sɛ: Asɛm a woaka yi nso, mɛyɛ, efisɛ woanya m'anim adom, na mede wo din minim wo.

¹⁸ Na Mose kae sɛ: Ɛnne, ma minhu w'anuonyam.

¹⁹ Na ose: Mɛma me papa nyinaa asen w'anim, na mɛpae me din YHWH (AWURADE) wɔ w'anim; na medom nea medom no, na mihu nea mihu no mmɔbɔ no mmɔbɔ.

²⁰ Na ose: Wuntumi nhu m'anim, efisɛ onipa renhu m'anim nnya nkwa.

²¹ Na AWURADE se: Hwɛ, ɔkwan wɔ me nkyɛn ha, na gyina ɔbotan no so;

²² na sɛ m'anuonyam resen a, mede wo mɛhyɛ ɔbo tokuru mu, na mede me nsa makata wo so masen ansa,

²³ na mayi me nsa, na woahu m'akyi fam; na m'anim de, worenhu.