2 Mose 31 - KYERƐW KRONKRON

Wɔpaw Besalel ne Oholiab si ntamadan

¹ Na AWURADE ka kyerɛɛ Mose sɛ:

² Hwɛ, mabɔ Hur ba Uri ba Besalel a ofi Yuda abusuakuw mu din mafrɛ no,

³ na mede Onyankopɔn honhom mahyɛ no ma, nyansa ne nhumu ne nimdeɛ ne adwinni ahorow nyinaa mu,

⁴ sɛ ɔmfa nnwen ho ne tirim na onni sika ne dwetɛ ne kɔbere,

⁵ ne abo a wosen sisi ade mu ne nnuasen mu adwinni, na onni adwinhorow nyinaa.

⁶ Na me ara, hwɛ, mafa Ahisamak ba Oholiab a ofi Dan abusuakuw mu maka ne ho; na nnipa a wɔwɔ nyansa koma nyinaa, mede nyansa mahyɛ wɔn komam na wɔnyɛ nea mahyɛ wo yi nyinaa;

⁷ ahyiae ntamadan no ne Adanse adaka no ne mpata agua no a esi so no ne ntamadan no ho ade nyinaa,

⁸ ne ɔpon no ne ɛho nneɛma ne kaneadua a ɛho tew no ne ɛho nneɛma nyinaa ne aduhuamhyew muka no,

⁹ ne ɔhyew afɔremuka no ne ɛho nneɛma nyinaa ne asankasɔn ne ne ntaase no,

¹⁰ ne ɔsom ntade ne ɔsɔfo Aaron ntade kronkron no ne ne mma ntade a wɔde bedi asɔfo no,

¹¹ ne ɔsra ngo no ne kronkronbea aduhuam a wɔhyew no. Wɔnyɛ no sɛnea mahyɛ wo nyinaa.

Homedadi

¹² Na AWURADE ka kyerɛɛ Mose sɛ:

¹³ Na wo nso ka kyerɛ Israelfo no sɛ: Me home nna no ara na munni; na ɛyɛ me ne mo ntam sɛnkyerɛnne, mo awo ntoatoaso nyinaa mu, na moahu sɛ me AWURADE na meyɛ mo kronkron.

¹⁴ Enti munni homeda no, na ɛyɛ kronkron ma mo; obiara a obegu ho fi no, okum na wobekum no; na obiara a ɔyɛ mu adwuma no, wobetwa saa ɔkra no afi ne man mu akyene.

¹⁵ Nnansia na wɔmfa nyɛ adwuma, na da a ɛto so ason no yɛ ɔhome mu homeda a ɛyɛ kronkron ma AWURADE; obiara a ɔyɛ adwuma homeda no, okum na wobekum no.

¹⁶ Enti Israelfo no nhwɛ homeda no na wonni homeda no, wɔn awo ntoatoaso nyinaa mu, sɛ daa apam.

¹⁷ Me ne Israel ntam sɛnkyerɛnne ne no de kosi daa; na nnansia na AWURADE de yɛɛ ɔsoro ne asase, na da a ɛto so ason no ɔhomee na odwudwoo ne koma.

¹⁸ Na ɔne Mose wiee kasa Sinai bepɔw so no, ɔmaa no adanse apon abien, abopon a wɔde Nyankopɔn nsatea akyerɛw so.