2 Mose 25 - KYERƐW KRONKRON

Ntamadan ho afɔrebɔde

¹ Na AWURADE kasa kyerɛɛ Mose sɛ:

² Ka kyerɛ Israelfo no na wɔmmɛma me soma afɔrebɔde. Obiara a ne koma ka no nkyɛn na munnye me soma afɔrebɔde.

³ Na eyi ne soma afɔrebɔde a munnye wɔn nkyɛn no: sika ne dwetɛ ne kɔbere mfrafrae,

⁴ ne bibiri ne asaawa a ɛbere dum ne adidi ne asaawa fufu ne mmirekyi nwi,

⁵ ne adwennini nhoma a wɔahyɛ no kɔkɔɔ ne sukraman nhoma ne ɔkanto nnua,

⁶ kanea ho ngo, ɔsra ngo ne nnuhuam a wɔhyew ho nnuru,

⁷ apopobibiri abo ne abo a wɔde besisi asɔfotade no ne adɛbo no mu no.

⁸ Na ma wɔnyɛ tenabea kronkron mma me na mentena wɔn mu.

⁹ Sɛnea me ara merebɛkyerɛ wo tenabea no tebea ne ɛho nneɛma nyinaa tebea no nyinaa no, saa ara na monyɛ no.

Apam adaka no yɛbea

¹⁰ Na wɔmfa ɔkanto nyɛ adaka a ne tenten bɛyɛ basafa biako ne fa, na ne tɛtrɛtɛ bɛyɛ anammɔn abien ne fa, na ne korɔn bɛyɛ anammɔn abien ne fa.

¹¹ Na fa sika amapa dura ho, emu ne ɛho nyinaa na dura, na yɛ sika hankare twa ho hyia.

¹² Na gu sika nkaa anan, na fa tuatua ne nan anan no ho; nkaa abien nni ɔfa ha, na nkaa abien nni ɔfa ha.

¹³ Na fa ɔkanto sinsen mpoma, na fa sika dura ho.

¹⁴ Na fa poma no wurawura nkaa no mu wɔ adaka no nkyɛn mu, na wɔmfa nsoa adaka no.

¹⁵ Mpoma no nwurawura adaka no ho nkaa no mu; wonnyiyi mmfi mu.

¹⁶ Na fa Adanse a mede mɛma wo no hyɛ adaka no mu.

¹⁷ Na fa sika amapa yɛ mpata agua, ne tenten bɛyɛ basafa biako ne fa, na ne tɛtrɛtɛ bɛyɛ anammɔn abien ne fa.

¹⁸ Na yɛ sika kerubim abien, ɔboro adwuma na fa yɛ, na fa sisi mpata agua no ti abien no so.

¹⁹ Na yɛ kerub biako wɔ ti ha ne kerub biako wɔ ti ha. Mpata agua no mu na momma kerubim no nyi adi wɔ ne ti abien no so.

²⁰ Na kerubim no ntrɛtrɛw wɔn ntaban mu ɔsoro mfa wɔn ntaban no nkata mpata agua no so, na wɔn ani nkyerɛkyerɛ wɔn ho; mpata agua no so na kerubim no ani nkyerɛkyerɛ.

²¹ Na fa mpata agua no si adaka no so, na adaka no mu na fa Adanse a mede mɛma wo no hyɛ.

²² Na ɛhɔ na me ne wo behyia, na mafi mpata agua no so wɔ kerubim abien a wɔwɔ Adanse adaka no so no ntam maka wo nneɛma a mɛhyɛ wo sɛ fa kyerɛ Israelfo no nyinaa.

Ɔpon no ho nhyehyɛe

²³ Na fa ɔkanto yɛ ɔpon, ne tenten basafa baako, na ne tɛtrɛtɛ anammɔn biako ne fa, na ne korɔn bɛyɛ anammɔn abien ne fa.

²⁴ Na fa sika amapa dura ho, na fa sika hankare twa ho hyia.

²⁵ Na yɛ ɛho mfomfamho a ne trɛw te sɛ nsam hyia, na fa sika hankare twa mfomfamho no ho hyia.

²⁶ Na yɛ sika nkaa anan, na fa nkaa no sisi ntwea anan a ɛwowɔ ne nan ho no so.

²⁷ Mfomfamho no ase pa ara na nkaa no nni, na ɛnyɛ nea wɔde mpoma bewurawura mu de asoa ɔpon no.

²⁸ Na fa ɔkanto sinsen mpoma no, na fa sika duradura ho, na wɔde asoa ɔpon no.

²⁹ Na yɛ ɛso nsanka ne nsankawa ne nkora ne nkuruwa a wɔde behwie; sika amapa na fa yɛ.

³⁰ Na fa kyerɛ abodoo sisi ɔpon no so wɔ m'anim daa yi.

Kaneadua no

³¹ Na fa sika amapa yɛ kaneadua; ɔboro adwuma na fa yɛ kaneadua no, ne nan ne ne dua; ɛho nhwiren no nkuramu, ne kukuduuduu ne ne nhwiren no mfi ɛno ara mu.

³² Na nsa asia ntuatua ho, kaneadua no nsa abiɛsa ntuatua ɔfa ha, na kaneadua no nsa abiɛsa nso ntuatua ɔfa ha.

³³ Nhwiren nkuramu abiɛsa a ɛte sɛ ɔsonkoran de wɔ nsa biako ho, ne kukuduuduu ne ne nhwiren, na nhwiren nkuramu abiɛsa a ɛte sɛ ɔsonkoran de wɔ nsa biako ho, ne kukuduuduu ne ne nhwiren. Saa ara na yɛ wɔ nsa asia a etuatua kaneadua no ho no ho.

³⁴ Na kaneadua no ho, nhwiren nkuramu a ɛte sɛ ɔsonkoran de anan, ne kukuduuduu ne ne nhwiren.

³⁵ Na kukuduuduu nsisi nsa abien abien a etuatua ho no ase, wɔ nsa asia a etuatua kaneadua no mu no ase.

³⁶ Ɛho kukuduuduu ne ɛho nsa no mfi mu ara, ne nyinaa sika amapa na wɔmfa nyɛ no ɔboro adwuma biako.

³⁷ Na yɛ ɛso akanea asɔn, na wɔmfa n'akanea no nsisi so, na ɛnnɛw wɔ anim nkyerɛ fa hɔ.

³⁸ Na ɛho adabaw ne ho nso nkukuwa nyɛ sika amapa.

³⁹ Sika amapa dwetikɛse biako na wɔmfa nyɛ, ne ɛho nneɛma yi nyinaa.

⁴⁰ Na hwɛ na yɛ no sɛnea ne nsusuwso a wɔde akyerɛ wo bepɔw no so no te no.