2 Mose 24 - KYERƐW KRONKRON

Wɔsɔw Apam no ano

¹ Na Mose de, ɔka kyerɛɛ no sɛ: Foro bra AWURADE nkyɛn, wo ne Aaron, Nadab ne Abihu ne Israel mpanyimfo mu aduɔsɔn, na mommɛsɔre wɔ akyirikyiri.

² Na Mose nko ntwiw mmɛn AWURADE, na wɔn de, wonntwiw mmmɛn, na ɔman no ne no mmforo mmma.

³ Na Mose bae bɛkaa AWURADE nsɛm no nyinaa ne atemmusɛm no nyinaa kyerɛɛ ɔman no. Na ɔman mu no nyinaa de nne koro gyee so sɛ: Nsɛm a Awurade aka nyinaa, yɛbɛyɛ.

⁴ Na Mose kyerɛw Awurade nsɛm no nyinaa. Na otuaa ahema sii afɔremuka bepɔw no ase, ne adum dumien, sɛ Israel mmusuakuw dumien no ano te.

⁵ Na ɔsomaa Israelfo no mu mmerante na wɔde anantwinini kɔbɔɔ ɔhyɛw afɔre ne asomdwoe afɔre maa AWURADE.

⁶ Na Mose de mogya no fa guguu nyowa mu, na mogya no fa no nso ohwie guu afɔremuka no so.

⁷ Na ɔfaa apam nhoma no, na ɔkenkan guu ɔman no asom. Ɛnna wose: Nea AWURADE aka no nyinaa, yɛbɛyɛ na yebetie.

⁸ Na Mose faa mogya no petee ɔman no so, na ose: Hwɛ, apam a AWURADE ne mo apam wɔ nsɛm yi nyinaa so no mogya ni.

⁹ Ɛnna Mose ne Aaron, Nadab ne Abihu ne Israel mpanyimfo mu aduɔsɔn foro kɔe.

¹⁰ Na wohuu Israel Nyankopɔn no; na ne nan ase te sɛ ade a wɔde hoa bo a emu tew ayɛ, na ne hanahana te sɛ ɔsoro pa ara.

¹¹ Na wanteɛ ne nsa anka Israelfo mu atitiriw no; na wɔhwɛɛ Onyankopɔn, na wodidii na wɔnomee.

¹² Na AWURADE ka kyerɛɛ Mose sɛ: Foro bra me nkyɛn bepɔw no so bɛtena ha, na mɛma wo abo pon ne mmara ne ahyɛde a makyerɛw, na woakyerɛkyerɛ wɔn.

¹³ Na Mose sɔree, ɔne n'abofra Yosua, na Mose foro kɔɔ Onyankopɔn bepɔw no so.

¹⁴ Na ɔka kyerɛɛ mpanyimfo no sɛ: Mo de, montena ha ntwɛn yɛn nkosi sɛ yɛbɛsan aba mo nkyɛn; na hwɛ, Aaron ne Hur ne mo na ɛwɔ hɔ; sɛ obi wɔ asɛm bi di a, momma ɔmmra wɔn nkyɛn.

¹⁵ Na Mose foro kɔɔ bepɔw no so, na omununkum bɛkataa bepɔw no so.

¹⁶ Na AWURADE anuonyam bɛtenaa Sinai bepɔw so, na omununkum no kataa so nnansia, na ɛda a ɛto so ason no, ofi omununkum no mu frɛɛ Mose.

¹⁷ Na wɔhwɛ AWURADE anuonyam no a, ɛte sɛ ogya a ɛhyew ade wɔ bepɔw no atifi wɔ Israelfo no anim.

¹⁸ Na Mose kɔɔ omununkum no mu, na ɔforo kɔɔ bepɔw no so; na Mose dii bepɔw no so adaduanan awia ne anadwo.