2 Mose 11 - KYERƐW KRONKRON

Misraim mmakan wuwu

¹ Na AWURADE ka kyerɛɛ Mose sɛ: Mɛma ɔhaw biako aba Farao ne Misraim so bio, na ɛno akyi no, ɔbɛma moafi ha akɔ; ɔbɛma moakɔ koraa, ɔpam mpo na ɔbɛpam mo afi ha.

² Afei kasa ma ɔman no nte sɛ: Mmarima ne mmea mmisabisa wɔn nnamfonom hɔ dwetɛ nnwinne ne sika nnwinne.

³ Na AWURADE maa ɔman no anim yɛɛ nyam wɔ Misraimfo anim; nso ɔbarima Mose no yɛ kɛse pa wɔ Misraim asase no so wɔ Farao nkoa ne ɔman no anim.

⁴ Na Mose kae sɛ: Sɛ Awurade se ni: Anadwo dasu mu no, mefi adi mafa Misraim,

⁵ na Misraim asase so mmakan nyinaa bewuwu, efi Farao abakan a ɔtena n'agua so, so de kosi afenaa a ɔwɔ owiyammo akyi abakan ne mmoa mmakan nyinaa so.

⁶ Na osu kɛse a ɛso bi mmae da, na ɛso bi remma bio bɛba Misraim asase nyinaa so.

⁷ Na Israel mma nyinaa de, ɔkraman po rentwe ne tɛkrɛma nhyɛ wɔn, efi nnipa so kosi mmoa so, na moahu sɛ AWURADE apae Misraim ne Israel ntam.

⁸ Na wo nkoa yi nyinaa besian aba me nkyɛn abɛkotow me aka sɛ: Fi adi kɔ, wo ne ɔman a edi w'akyi no nyinaa. Na ɛno akyi no mefi makɔ. Na ɔde abufuhyew fii Farao nkyɛn kɔe.

⁹ Na AWURADE ka kyerɛɛ Mose sɛ: Farao rentie mo, na ama m'anwonwade adɔɔso wɔ Misraim asase so.

¹⁰ Na Mose ne Aaron yɛɛ anwonwade yi nyinaa wɔ Farao anim, na AWURADE pirim Farao koma, na wamma Israelfo no amfi n'asase so ankɔ.