2 Korintofo 8 - KYERƐW KRONKRON

Akyɛde a efi Makedonia

¹ Nanso, anuanom, yɛrema moahu Onyankopɔn adom a wɔde adom Makedonia asafo no,

² efisɛ wɔn ahohiahia sɔhwɛ kɛse mu no, wɔn anigye buu so maa wɔn wɔ wɔn hia bebrebe mu mpo, woyii wɔn ayamye kɛse adi kyerɛe,

³ na midi wɔn ho adanse sɛ, wɔde wɔn ankasa pɛ mae sɛnea wobetumi, wɔma ma no boroo wɔn ahoɔden so po,

⁴ na wɔkotow srɛɛ yɛn pii sɛ, yennye ɔsom a wɔsom ahotefo no mu adom ne ayɔnkofa.

⁵ Na ɛnyɛ sɛnea na yɛn ani daa so no, na mmom wɔnam Onyankopɔn pɛ so, dii kan de wɔn ho maa Awurade ne yɛn nso,

⁶ na ama yɛasrɛ Tito sɛ, sɛnea ofii ase kan no, onwie adom no nso saa ara wɔ mo mu.

⁷ Na sɛnea moboro so nneɛma nyinaa mu no, gyidi ne ɔkasa ne nimdeɛ ne mmɔdemmɔ nyinaa ne ɔdɔ a mode dɔ yɛn mu no, monhwɛ sɛ mobɛboro so adom yi mu nso.

Yesu nhwɛso

⁸ Menka no ɔhyɛ so, na mmom menam ebinom mmɔdemmɔ so meresɔ mo dɔ mapa ahwɛ.

⁹ Na munim yɛn Awurade Yesu Kristo adom no, sɛ ɔyɛ ɔdefo de, nanso, mo nti ɔbɛyɛɛ ohiani, sɛ monam ne hia no so abɛyɛ adefo.

¹⁰ Na m'adwen a ɛwɔ eyi ho ne sɛ, ɛfata sɛ afei muwie nea afe ni, ɛnyɛ ɔyɛ nko na mufii ase yɛe, na mmom munyaa ho pɛ no nso.

Ɔdɔ ne mmoa

¹¹ Na afei munwie ne yɛ no nso, na sɛnea mowɔ koma a ɛpɛ no, moafi nea mowɔ no mu awie ne yɛ saa ara.

¹² Na sɛ koma a ɛpɛ wɔ hɔ a, ɛsɔ ani, sɛnea onii no wɔ ade, na ɛnyɛ sɛnea onni.

¹³ Na ɛnyɛ sɛ ebinom ho dwo wɔn, na mo de mo ho hiahia mo, na mmom sɛ ɛnyɛ pɛpɛɛpɛ nti;

¹⁴ na saa bere yi mu, mo mmoroso akogu wɔn hia mu, na wɔn mmoroso nso abegu mo hia mu, na ayɛ pɛpɛɛpɛ,

¹⁵ sɛnea wɔakyerɛw sɛ: Nea ɔboaboa bebree ano no, annya ammoro so, na nea ɔboaboa ketewaa bi ano no, anhia no hwee.

Tito adwuma foforo

¹⁶ Na aseda nka Onyankopɔn a ɔde mo ho mmɔdemmɔ yi ara bi ahyɛ Tito koma mu.

¹⁷ Ɛwom sɛ yɛn afotu na otiei de, nanso ne mmɔdemmɔ boro so nti, ɔde n’ankasa ne pɛ so ɔreba mo nkyɛn.

¹⁸ Na yɛasoma no ne onua bi a woyi no ayɛ wɔ asɛmpa no ka ho wɔ asafo no nyinaa mu no,

¹⁹ na ɛnyɛ eyi nko ara, na ɔno na asafo no ayi no sɛ ɔne yɛn nnantew nkura adɔe a yɛsom ho yi mu, mma Awurade no ankasa anuonyam, na ɛnkyerɛ yɛn mmɔdemmɔ kɛse no.

²⁰ Na yɛda yɛn ho so, na obiara annya yɛn ho asɛm anka wɔ akyɛde kɛse a yɛsom ho yi ho;

²¹ na yedwen nea ɛfata, ɛnyɛ Awurade anim nko, na nnipa anim nso.

²² Na yɛresoma yɛn nua a yɛanya no asɔ no ahwɛ sɛ ɔyɛ mmɔdemmɔfo wɔ nneɛma bebree mu no aka wɔn ho, na afei nso awerɛhyɛm a ɔwɔ mu no nti, ɛma ne mmɔdemmɔ no boro so.

²³ Na Tito de, ɔyɛ me yɔnko ne me yɔnko dwumayɛfo ma mo; yɛn nuanom no de, wɔyɛ asafo horow no asomafo ne Kristo anuonyam.

²⁴ Enti munyi mo dɔ ne nhoahoa a yɛde hoahoa yɛn ho no nkyerɛ wɔn wɔ asafo horow no anim.