2 Berɛsosɛm 18 - KYERƐW KRONKRON

Yehosafat ne Ahab tu sa

¹ Na Yehosafat nyaa adedodow ne anuonyam bebree. Na ɔne Ahab bɔɔ nse.

² Na mfe bi akyi no, osian kɔɔ Ahab nkyɛn Samaria, na Ahab kunkum nguan ne anantwi bebree maa no ne nkurɔfo a wɔka ne ho no. Na ogyigyee no sɛ ɔmforo nkɔ Ramot-gilead.

³ Na Israel hene Ahab ka kyerɛɛ Yuda hene Yehosafat sɛ: So wo ne me bɛkɔ Ramot-gilead anaa? Na ɔka kyerɛɛ no sɛ: Mete sɛ wo, na me man te sɛ wo man, me ne wo bɛkɔ ɔsa no.

⁴ Na Yehosafat ka kyerɛɛ Israel hene no sɛ: Mesrɛ wo, kobisa AWURADE asɛm nnɛ.

⁵ Ɛnna Israel hene no boaboaa adiyifo no ano hyiae, nnipa ahanan, na ɔka kyerɛɛ wɔn sɛ: So yɛnkɔ Ramot-gilead nkɔko anaasɛ minnyae? Na wose: Foro kɔ, na Onyankopɔn de bɛhyɛ ɔhene nsa.

⁶ Na Yehosafat kae sɛ: So AWURADE diyifo bi nni ha bio na yenkobisa no hɔ ade?

⁷ Na Israel hene ka kyerɛɛ Yehosafat sɛ: Ɔbarima biako da so wɔ hɔ a anka yɛbɛkɔ ne nkyɛn akobisa AWURADE hɔ ade, nanso metan no, efisɛ ɔnka me ho asɛm pa bi, na daa, bɔne na ɔka; ɔno ne Imla ba Mikaia. Na Yehosafat se: Mma ɔhene nnka sa.

⁸ Ɛnna Israel hene no frɛɛ opiani bi, na ɔkae sɛ: Ma Imla ba Mikaia mmra ntɛm.

⁹ Na Israel hene ne Yuda hene Yehosafat tete wɔn agua so hyehyɛ wɔn ntade, na wɔtete Samaria pon ano mprae so; na adiyifo no nyinaa rehyehyɛ nkɔm, wɔn anim.

¹⁰ Na Kenaana ba, Sedekia yɛɛ dade mmɛn, na ɔkae sɛ: Sɛ AWURADE se ni: Eyinom na wode bɛko Siriafo no de akosi sɛ wobewie wɔn.

¹¹ Na adiyifo no nyinaa hyehyɛɛ nkɔm saa sɛ: Foro kɔ Ramot-gilead na kodi nim; na AWURADE de bɛhyɛ ɔhene nsa.

¹² Na ɔbɔfo a ɔkɔfrɛɛ Mikaia no ka kyerɛɛ no sɛ: Hwɛ, adiyifo no nsɛm yɛ pɛ na eye ma ɔhene, na ma w’asɛm nyɛ sɛ wɔn mu biako asɛm, na ka asɛmpa.

¹³ Na Mikaia se: Sɛ AWURADE te ase yi, nea me Nyankopɔn bɛka no, ɛno na mɛka.

Mikaia hyɛ nkogu ho nkɔm

¹⁴ Na ɔbaa ɔhene nkyɛn. Na ɔhene no ka kyerɛɛ no sɛ: Mikaia, so yɛnkɔ Ramot-gilead nkɔko anaasɛ yennyae? Na ose: Monkɔ na munkodi nim, na wɔde bɛhyɛ mo nsa.

¹⁵ Na ɔhene no ka kyerɛɛ no sɛ: Mpɛn ahe ara na menka wo ntam sɛ, nka me asɛm bi sɛ nokware nko, AWURADE din mu?

¹⁶ Ɛnna ose: Mahu Israel nyinaa sɛ wɔapansam mmepɔw so sɛ nguan a wonni hwɛfo. Na AWURADE se: Eyinom nni wuranom? Ma wɔnsan nkokɔ wɔn afi asomdwoe mu.

¹⁷ Ɛnna Israel hene no ka kyerɛɛ Yehosafat sɛ: So manka mankyerɛ wo sɛ ɔrenhyɛ me ho nkɔm pa bi, na mmom bɔne?

¹⁸ Na Mikaia se: Enti muntie AWURADE asɛm. Mahu AWURADE sɛ ɔte n’agua so, na ɔsoro asafo nyinaa gyinagyina ne nifa ne ne benkum.

¹⁹ Na AWURADE se: Hena na ɔbɛdaadaa Israel hene Ahab, na waforo akɔtɔ Ramot-gilead? Na oyi kaa sɛɛ, na oyi nso kaa sɛɛ.

²⁰ Na honhom bi fi begyinaa AWURADE anim, na ɔkae sɛ: Me na mɛdaadaa no. Na AWURADE ka kyerɛɛ no sɛ: Wode dɛn?

²¹ Na ose: Mefi makɔyɛ atoro honhom n’adiyifo nyinaa anom. Na ɔkae sɛ: Wobɛdaadaa no, na wubetumi nso, fi kɔ na kɔyɛ sa.

²² Na afei, hwɛ, AWURADE de atoro honhom ahyɛ w’adiyifo yi nyinaa anom, na AWURADE aka wo ho bɔne.

²³ Ɛnna Kenaana ba Sedekia twiw bɛnee bɛbɔɔ Mikaia sotɔre kae sɛ: Ɛhe na AWURADE honhom nam fii me nkyɛn bɛkasa kyerɛɛ wo yi?

²⁴ Na Mikaia se: Hwɛ, ɛda a wubefi pia mu akɔ pia mu akohintaw no na wubehu.

²⁵ Na Israel hene no kae sɛ: Momfa Mikaia nsan nkɔ kurow no safohene Amon ne ɔhene ba Yoas nkyɛn,

²⁶ na monka sɛ: Sɛ ɔhene se ni: Momfa oyi nkɔto nneduadan mu, na momma no ahohia aduan nni ne ahohia nsu nnom nkosi sɛ mɛba no dwoodwoo.

²⁷ Na Mikaia se: Ɔsan de, wosan ba dwoodwoo a, ɛnne ɛnyɛ AWURADE na ɔnam me so kasae. Na ose: Mo aman nyinaa, muntie!

Ahab wu

²⁸ Na Israel hene no ne Yuda hene Yehosafat foro kɔɔ Ramot-gilead.

²⁹ Na Israel hene no ka kyerɛɛ Yehosafat sɛ: Mɛsakra me ho na makɔ dɔm no mu, na wo de, hyɛ wo ntade. Na Israel hene no sakraa ne ho, na ɔkɔɔ dɔm no mu.

³⁰ Nso na Siria hene no ahyɛ ne nteaseɛnam a ɔwɔ no so asafohene sɛ: Mo ne akumaa anaa ɔkɛse nnko sɛ gye Israel hene no nko.

³¹ Na nteaseɛnam so asafohene no huu Yehosafat no, wɔkae sɛ: Israel hene no ni! Na wɔmanee ne no kɔkoe. Na Yehosafat teɛɛm; na AWURADE boaa no, na Onyankopɔn dan wɔn fii ne ho.

³² Na nteaseɛnam so asafohene no hui sɛ ɛnyɛ Israel hene no ne no no, wɔsan fii n’akyi.

³³ Na ɔbarima bi twee ne ta mu, n’anibiannaso so, na ɔde wuraa Israel hene no mmɔtoam nkatabo no ntam. Na ɔka kyerɛɛ ne teaseɛnamkafo no sɛ: Dan wo nsa na fa me fi dɔm yi mu, na mapira.

³⁴ Na ɔko no mu yɛɛ den da no, na Israel hene no kura mu gyina ne teaseɛnam no mu Siriafo no anim ara kosii anwummere. Na owia kɔtɔe no, owui.