2 Berɛsosɛm 12 - KYERƐW KRONKRON

Sisak di Rehoboam so nkonim

¹ Na ɛbae sɛ Rehoboam ahenni timii na ɔyɛɛ den no, ogyaw AWURADE mmara, na Israel nyinaa ka ne ho.

² Na ɔhene Rehoboam afe a ɛto so anum no, Misraim hene Sisak foro baa Yerusalem so, efisɛ Israelfo no afom AWURADE.

³ Ɔde nteaseɛnam apem, ahanu ne apɔnkɔsotefo ɔpeduosia bae, na dɔm a wɔne no bae no nni kanbea, wofi Misraim: Libiafo, Sukifo ne Etiopiafo.

⁴ Na ogyee Yuda nkurow a ɛyɛ den no, na obeduu Yerusalem.

⁵ Ɛnna odiyifo Semaia baa Rehoboam ne Yuda mmapɔmma a wɔaboa wɔn ho ano aba Yerusalem afi Sisak anim no nkyɛn, na ɔka kyerɛɛ wɔn sɛ: Sɛ AWURADE se ni: Mo de, moagyaw me, na me nso magyaw mo mahyɛ Sisak nsa.

⁶ Ɛnna Israel mmapɔmma ne ɔhene no brɛɛ wɔn ho ase, na wɔkae sɛ: Ɔtreneeni ne AWURADE.

⁷ Na AWURADE hui sɛ wɔabrɛ wɔn ho ase no, AWURADE asɛm baa Semaia nkyɛn sɛ: Wɔabrɛ wɔn ho ase nti, merensɛe wɔn, na ɛyɛ kakra a, mɛma wɔafi mu, na m’abufuw amfa Sisak so anhwie angu Yerusalem so.

⁸ Nanso wɔbɛyɛ no nkoa, na wɔahu me som ne nsaase so ahenni som no.

⁹ Na Misraim hene Sisak foro baa Yerusalem bɛfaa AWURADE fi akorade ne ɔhene fi akorade no, ne nyinaa na ɔfae, na ɔfaa sika akyɛm a Solomon yɛe no nso.

¹⁰ Na ɔhene Rehoboam yɛɛ kɔbere akyɛm sisii ananmu, na ɔde hyehyɛɛ awɛmfo a wɔwɛn ɔhene fi pon ano no asafohene no nsa.

¹¹ Na da biara a ɔhene ba AWURADE fi no, awɛmfo no bɛtase, na wɔde san kɔ awɛmfo no dan mu.

¹² Na sɛ ɔbrɛɛ ne ho ase nti, AWURADE abufuw no san fii ne ho, sɛ ɔrensɛe no nwie; na ɔmannwoe baa Yuda mu nso.

Rehoboam ahenni awiei

¹³ Na ɔhene Rehoboam hyɛɛ ne ho den Yerusalem, na odii hene. Na obedii hene no, na wadi mfe aduanan biako, na odii hene mfirihyia dunsɔn Yerusalem a ɛne kurow a AWURADE yii Israel mmusuakuw nyinaa mu sɛ ɔde ne din bɛto hɔ no. Na ne na din de Naama a ɔyɛ Amonni.

¹⁴ Na ɔyɛɛ bɔne, na wamfa ne koma anhwehwɛ AWURADE.

¹⁵ Na Rehoboam ho nsɛm, kan de ne akyiri de nso, so wɔankyerɛw odiyifo Semaia ne ɔdehwɛfo Ido nsɛm mu antoatoa so? Na dɔmdi daa Rehoboam ne Yeroboam ntam nna nyinaa.

¹⁶ Na Rehoboam wui, na wosiee no ahemfo amusie wɔ Dawid kurow no mu. Na ne ba Abigya bedii n’ade.