2 Ahene 8 - KYERƐW KRONKRON

Elisa ne Sunemni bea no

¹ Na Elisa aka akyerɛ ɔbea a onyan ne ba ma onyaa nkwa no sɛ: Sɔre kɔ, wo ne wo fi, na kɔyɛ ɔhɔho baabiara a wubetumi, na AWURADE ama ɔkɔm, aba asase yi so na ɛbɛtena so mfe asɔn.

² Na ɔbea no sɔree yɛɛ sɛ Onyankopɔn nipa no kae no, na ɔne ne fifo siim kɔe kɔyɛɛ ahɔho Filistifo asase so mfe asɔn.

³ Na mfe ason no awiei no, ɔbea no san fii Filistifo asase so bae, na ofii adi kosu hyɛɛ ɔhene sɛ ɔregye ne fi ne n’asase.

⁴ Nso na ɔhene ne Onyankopɔn nipa no abofra Gehasi rekasa sɛ: Ka me nneɛma akɛse a Elisa ayɛ no ɛ!

⁵ Na ɔreka ɔhene sɛnea onyan awufo no, hwɛ, ɔbea a onyan ne ba ma onyaa nkwa no besu hyɛɛ ɔhene sɛ ɔregye ne fi ne n’asase. Na Gehasi kae sɛ: Me wura ɔhene, ɔbea no ni, nea ne ba a Elisa ma onyaa nkwa no ni.

⁶ Na ɔhene bisaa ɔbea no no, ɔka kyerɛɛ no. Ɛnna ɔhene yii opiani bi maa no sɛ: Dan nea ɛyɛ ne de nyinaa ne afuw no aba nyinaa fi da a ogyaw asase yi de besi sesɛɛ ma no.

Hasael di Siria so hene

⁷ Na Elisa kɔɔ Damasko; nso na Siria hene Ben-hadad yare; na wɔka kyerɛɛ no sɛ: Onyankopɔn nipa no aba ha.

⁸ Na ɔhene no ka kyerɛɛ Hasael sɛ: Fa ayɛyɛde kura, na kɔ kohyia Onyankopɔn nipa no, na kobisa AWURADE ade, ne hɔ, sɛ: So menya ɔyare yi mu nkwa anaa?

⁹ Na Hasael ba behyiaa no, na ɔfaa ayɛyɛde kurae, ɛyɛ Damasko nneɛma pa nyinaa bi, yoma aduanan na ɛsosoe. Na ɔba begyinaa n’anim sɛ: Wo ba Ben-hadad, Siria hene, na ɔsomaa me wo nkyɛn sɛ: So menya ɔyare yi mu nkwa anaa?

¹⁰ Na Elisa ka kyerɛɛ no sɛ: Kɔ kɔka kyerɛ no sɛ: Nkwa de, wubenya, nanso AWURADE akyerɛ me sɛ obewu ara.

¹¹ Na ogyen n’ani hwɛɛ no dinn kosii sɛ n’ani bui, na Onyankopɔn nipa no sui.

¹² Na Hasael kae sɛ: Ɛdɛn nti na me wura resu? Na ose: Efisɛ minim bɔne a wobɛyɛ Israelfo. Wɔn nkurow a ɛyɛ den no wobɛtoto mu gya, na wode nkrante bekunkum wɔn mmerante, na woatetew wɔn nkokoaa ahwehwe fam, na woapaapae wɔn apemfo mu.

¹³ Na Hasael kae sɛ: Hena ne w’akoa ɔkraman yi a ɔbɛyɛ ade kɛse yi? Na Elisa se: AWURADE ama mahu sɛ wo na wubedi Siria so hene.

¹⁴ Na ofii Elisa nkyɛn kɔ koduu ne wura nkyɛn. Na ɔka kyerɛɛ no sɛ: Dɛn na Elisa ka kyerɛɛ wo? Na ose: Ɔka kyerɛɛ me sɛ: Wo ho bɛyɛ wo den.

¹⁵ Na ade kyee no, ɔfaa mmuatama no bɔɔ nsu mu de kataa n’anim, na owui. Na Hasael bedii n’ade.

Yoram di Yuda so hene

¹⁶ Na Israel hene Ahab ba Yoram afe a ɛto so anum so, bere a Yehosafat dii Yuda hene no, na Yuda hene Yehosafat ba Yehoram bedii hene.

¹⁷ Odii mfirihyia aduasa abien na obedii hene, na odii hene mfe awotwe Yerusalem.

¹⁸ Na ɔfaa Israel ahene kwan so sɛnea Ahab fi yɛe; efisɛ ne yere yɛ Ahab ba. Na ɔyɛɛ AWURADE ani so bɔne.

¹⁹ Nanso n’akoa Dawid nti AWURADE ampɛ sɛ ɔsɛe Yuda, sɛnea ɔka kyerɛɛ no sɛ ɔbɛma ɔno ne ne mma kanea nna nyinaa no.

²⁰ Ne bere so na Edom tew atua fii Yuda nsa ase, na wokosii wɔn so hene.

²¹ Na Yoram twaam kɔɔ Sair a ne nteaseɛnam nyinaa ka ne ho; na ɔsɔree anadwo kokunkum Edomfo a wɔatwa ne ho ahyia ne nteaseɛnam so asafohene no; na nkurɔfo no guan kokɔɔ wɔn ntamadan mu.

²² Na Edom tew atua fii Yuda nsa ase de besi nnɛ. Ɛnna Libna nso tew atua bere no ara mu.

²³ Na Yoram ho nsɛm nkae ne nea ɔyɛe nyinaa, so wɔankyerɛw Yuda ahene beresosɛm nhoma no mu?

²⁴ Na Yoram wui, na wosiee no kaa n’agyanom ho Dawid kurow mu; na ne ba Ahasia bedii n’ade.

Ahasia di Yuda so hene

²⁵ Israel hene Ahab ba Yoram afe a ɛto so dumien so na Yuda hene Yehoram ba Ahasia bedii hene.

²⁶ Ahasia dii mfe aduonu abien na obedii hene no, na odii hene afe biako Yerusalem. Na ne na din de Atalia a ɔyɛ Israel hene Omri ba.

²⁷ Na ɔfaa Ahab fi kwan so, na ɔyɛɛ AWURADE ani so bɔne sɛ Ahab fi, efisɛ Ahab sew ne no.

²⁸ Na ɔne Ahab ba Yoram kɔe ne Siria hene Hasael kɔkoe Ramot-gilead. Na Siriafo piraa Yoram.

²⁹ Na ɔhene Yoram san baa Yesreel sɛ ɔrebɛsa opira a Siriafo piraa no Rama, bere a ɔne Siria hene Hasael reko no. Na Yuda hene Yehoram ba Ahasia san kɔe sɛ ɔkɔhwɛ Ahab ba Yoram Yesreel, efisɛ ɔyare.