2 Ahene 2 - KYERƐW KRONKRON

Elia sorokɔ

¹ Na AWURADE rebɛfa Elia ahum mu akɔ ɔsoro no, Elia ne Elisa fi Gilgal kɔe.

² Na Elia ka kyerɛɛ Elisa sɛ: Tena ha ɛ, na AWURADE asoma me Betel. Na ɔkae sɛ: Sɛ AWURADE te ase na wo kra te ase yi, merennyaw wo. Na wosian kɔɔ Betel.

³ Na adiyifo mma a wɔwɔ Betel no fii adi baa Elisa nkyɛn bɛka kyerɛɛ no sɛ: So wunim sɛ ɛnnɛ AWURADE rebɛfa wo wura afi wo nkyɛn akɔ? Na ose: Yiw minim; monyɛ komm!

⁴ Na Elia ka kyerɛɛ no sɛ: Elisa, tena ha ɛ, na AWURADE asoma me Yeriko. Na ose: Sɛ AWURADE te ase na wo kra te ase yi, merennyaw wo. Na woduu Yeriko.

⁵ Na adiyifo mma a wɔwɔ Yeriko no twiw baa Elisa nkyɛn bɛka kyerɛɛ no sɛ: So wunim sɛ ɛnnɛ AWURADE bɛfa wo wura afi wo nkyɛn akɔ? Na ose: Yiw minim; monyɛ komm!

⁶ Na Elia ka kyerɛɛ no sɛ: Tena ha ɛ, na AWURADE asoma me Yordan ano. Na ose: Sɛ AWURADE te ase na wo kra te ase yi, merennyaw wo. Na wɔn baanu no kɔe.

⁷ Na adiyifo mma no mu aduonum kɔe kogyinagyinaa wɔn ntentenso akyirikyiri, na wɔn baanu no gyinaa Yordan ano.

⁸ Na Elia faa ne nguguso bobɔw de bɔɔ nsu no mu, na ɛpae kɔɔ ha ne ha, na wɔn baanu no nam asase kesee so twae.

⁹ Na wotwae no, Elia ka kyerɛɛ Elisa se: Bisa nea menyɛ mma wo ansa na wɔafa me afi wo nkyɛn akɔ. Na Elisa sɛ: Ma wo honhom abupɛn abien mmra me so.

¹⁰ Na ɔkae sɛ: Woabisa ade a ɛyɛ den; nanso sɛ wuhu me sɛ wɔrefa me afi wo nkyɛn a, ɛbɛyɛ saa ama wo; na sɛ woanhu me de a, ɛrenyɛ.

¹¹ Na wɔnam rekɔ na wɔrekasa no, hwɛ, ogya teaseɛnam ne ogya apɔnkɔ a ɛbɛpaee wɔn baanu no ntam bae, na Elia faa ahum mu foro kɔɔ ɔsoro.

¹² Na Elisa hwɛe na ɔteɛɛm sɛ: M’agya, m’agya! Israel nteaseɛnam ne wɔn apɔnkɔsotefo na ɔrekɔ no! Na wanhu no bio. Na osoo n’atade mu suanee mu abien,

¹³ na ɔmaa Elia nguguso a efii ne ho gui no so, na ɔsan begyinaa Yordan ano.

¹⁴ Na ɔde Elia nguguso a efii ne ho gui no bɔɔ nsu no mu kae sɛ: Ɛhe na AWURADE, Elia Nyankopɔn no, wɔ? Na ɔbɔɔ nsu no mu no, ɛpae kɔɔ ha ne ha, na Elisa twae.

¹⁵ Na adiyifo mma a wɔwɔ Yeriko wɔ ne ntentenso no huu no no, wɔkae sɛ: Elia honhom abesi Elisa so. Na wɔbae behyiaa no, na wɔkotow no butuw fam.

¹⁶ Na wɔka kyerɛɛ no sɛ: Hwɛ, mmarima a wɔyɛ nnam aduonum wɔ wo nkoa mu, ma wɔnkɔ nkɔhwehwɛ wo wura; na ebia sesɛɛ AWURADE honhom ama no so kɔ, de no akɔto mmepɔw no bi so anaa abon no bi mu. Na ose: Monnsoma!

¹⁷ Na wɔhyɛɛ no ara ma ɛyɛɛ no ahometew no, ɔkae sɛ: Monsoma! Na wɔsomaa mmarima aduonum, na wɔkɔhwehwɛe nnansa, nanso wɔanhu no.

¹⁸ Na wɔsan baa ne nkyɛn, na ɔno de, ɔte Yeriko, na ɔka kyerɛɛ wɔn sɛ: So manka mankyerɛ mo sɛ monnkɔ oo?

Elisa sa yare na ɔdome

¹⁹ Na kurow no mufo no ka kyerɛɛ Elisa sɛ: Hwɛ, kurow yi dabea yɛ fɛ, sɛnea me wura hu yi; nanso nsu no nye, na asase no ma ɔpɔn.

²⁰ Na ose: Mommrɛ me asanka foforo, na momfa nkyene ngu mu. Na wɔde brɛɛ no.

²¹ Na ofii adi kɔɔ nsuaniwa no ho, na okohwiee nkyene no guu mu hɔ, na ɔkae sɛ: Sɛ AWURADE se ni: Masa nsu yi yare, owu anaa ɔpɔn bi remfi mu hɔ bio.

²² Na nsu no yɛɛ yiye de besi nnɛ da yi, sɛ Elisa kae no.

²³ Na ofii hɔ foro kɔɔ Betel; na ɔreforo akɔ ɔkwan no so no, mmofra nketewa fii kurow no mu bae begoruu ne ho ka kyerɛɛ no sɛ: Tipae, foro ɛ, tipae, foro ɛ!

²⁴ Ɛnna ɔdan ne ho, ohuu wɔn no, ɔde AWURADE din domee wɔn. Na asisibere abien fi kwae no mu bae, bɛkyeree mmofra no mu aduanan abien, tetew wɔn mu.

²⁵ Na ofii hɔ kɔɔ Karmel bepɔw ho, na ofii hɔ nso san baa Samaria.