2 Ahene 13 - KYERƐW KRONKRON

Yoahas di Israel so hene

¹ Yuda hene Ahasia ba Yoas afe a ɛto so aduonu abiɛsa so na Yehu ba Yoahas bedii Israel so hene Samaria mfe asɔn.

² Na ɔyɛɛ AWURADE ani so bɔne, na odii Nebat ba Yeroboam a ɔmaa Israel yɛɛ bɔne no bɔne akyi; wamfi ho.

³ Na AWURADE bo fuw hyɛɛ Israel, na ɔde wɔn hyɛɛ Siria hene Hasael nsa, ne Hasael ba Ben-hadad nsa nna nyinaa.

⁴ Na Yoahas kotɔ srɛɛ AWURADE, na AWURADE tiee no, efisɛ ohuu ɔhaw a Siria hene de rehaw Israel no.

⁵ Na AWURADE maa Israel ogyefo, na wofii Siriafo nsa ase, na Israelfo tenaa wɔn ntamadan mu sɛ kan no.

⁶ Nanso wɔamfi Yeroboam a ɔmaa Israel yɛɛ bɔne no fi bɔne ho; ɛno ara na ɔyɛe; na Asera dua no nso sii Samaria.

⁷ Na wɔannyaw dɔm bi amma Yoahas gye apɔnkɔsotefo aduonum ne nteaseɛnam du ne anammɔnmufo ɔpedu, efisɛ Siria hene asɛe wɔn, na wayɛ wɔn sɛ mfutuma a wotiatia so.

⁸ Na Yoahas ho nsɛm nkae ne nea ɔyɛe nyinaa ne ne mmaninne, so wɔankyerɛw Israel ahene beresosɛm nhoma no mu?

⁹ Na Yoahas ne n’agyanom kɔdae, na wosiee no Samaria; na ne ba Yoas bedii n’ade.

Yoas di Israel so hene

¹⁰ Yuda hene Yoas afe a ɛto so aduasa ason so na Yoahas ba Yoas bedii Israel so hene Samaria mfe dunsia.

¹¹ Na ɔyɛɛ AWURADE ani so bɔne, wamfi Nebat ba Yeroboam a ɔmaa Israel yɛɛ bɔne no bɔne nyinaa ho; ɛno ara na ɔyɛe.

¹² Na Yoas ho nsɛm nkae ne nea ɔyɛe nyinaa ne ne mmaninne, sɛ ɔne Yuda hene Amasia dii ako no, so wɔankyerɛw Israel ahene beresosɛm nhoma no mu?

¹³ Na Yoas wui, na Yeroboam bɛtenaa n’agua so; na wosiee Yoas Samaria kaa Israel ahene ho.

Elisa nkɔmhyɛ ne ne wu

¹⁴ Nso na Elisa yare ne yare a ɔde wui no. Na Israel hene Yoas san baa ne nkyɛn besui n’anim, na ɔkae sɛ: M’agya, m’agya! Israel nteaseɛnam ne n’apɔnkɔsotefo!

¹⁵ Ɛnna Elisa ka kyerɛɛ no sɛ: Kɔfa ɔta ne agyan! Na ɔde ta ne agyan brɛɛ no.

¹⁶ Na ɔka kyerɛɛ Israel hene no sɛ: Fa wo nsa so ta no mu. Na ɔde ne nsa soo mu; na Elisa de ne nsa guu ɔhene no nsa so.

¹⁷ Na ɔkae sɛ: Hiɛ apuei mfɛnsere no! Na ohiɛe. Na Elisa se: Tow! Na ɔtowee. Na ose: AWURADE nkonimdi agyan, Siria so nkonimdi agyan! Na wobɛbɔ Siria wɔ Afek akosi sɛ wobɛdwerɛw wɔn.

¹⁸ Na ɔkae sɛ: Tase agyan no! Na ɔtasee. Na ɔka kyerɛɛ Israel hene no sɛ: Tow bɔ fam! Na ɔtow bɔɔ fam mprɛnsa, na ogyinae.

¹⁹ Ɛnna Onyankopɔn nipa no bo fuw no kae sɛ: Anka ɛsɛ sɛ wotow mpɛn anum anaa asia; ɛno na anka wobɛbɔ Siria akosi sɛ wobɛdwerɛw wɔn; enti nso mprɛnsa pɛ na wobɛbɔ Siria.

²⁰ Na Elisa wui, na wosiee no. Na afe no dui no, Moabfo afowfo asafo baa asase no so.

²¹ Na da bi a wɔrekosie onipa bi no, wohuu asafokuw bi, na wɔtow onipa no kyenee Elisa da mu; na onipa no kɔkaa Elisa nnompe pɛ, na onyaa nkwa, na ɔsɔre gyinaa ne nan so.

Yoas di Ben-hadad so nkunim

²² Na Siria hene Hasael haw Israel, Yoahas nna nyinaa.

²³ Nanso AWURADE dom wɔn, na ne yam hyehyee no maa wɔn, na ɔdan ne ho kyerɛɛ wɔn, n’apam a ɔne Abraham, Isak ne Yakob pamee no nti, na wampɛ sɛ ɔsɛe wɔn, na wantow wɔn ankyene amfi n’anim de besi nnɛ.

²⁴ Na Siria hene Hasael wui; na ne ba Ben-hadad bedii n’ade.

²⁵ Na Yoahas ba Yoas san kogyee Hasael ba Ben-hadad nsam nkurow a ɔde ɔko begyee n’agya Yoahas nsam no. Mpɛn abiɛsa na Yoas bɔɔ no, na ɔdan Israel nkurow no mae.