1 Tesalonikafo 5 - KYERƐW KRONKRON

Obiara nnim da ko a Awurade bɛsan aba

¹ Na nna no ne mmere no de, anuanom, enhia mo sɛ wɔkyerɛw brɛ mo.

² Efisɛ mo ankasa munim yiye sɛ Awurade da no bɛba sɛ owifo ba anadwo.

³ Na bere a wɔbɛka se: Yɛwɔ asomdwoe ne ahotɔ, no, ɛnne mpofirim na ɔsɛe bɛba wɔn so sɛ awoko ba ɔbea a ɔyem so, na wɔrennya ɔkwan nguan.

⁴ Na mo de, anuanom, munni sum mu, na ɛda no abɛto mo sɛ owifo.

⁵ Mo nyinaa moyɛ hann mma ne adekyee mma; yɛnyɛ anadwo anaa esum dea.

⁶ Enti mommma yɛnnna sɛ wɔn a aka no, na mmom momma yɛnwɛn, na yɛn ani nna hɔ.

⁷ Efisɛ wɔn a wɔda da anadwo, na wɔn a wɔbow bow anadwo,

⁸ na yɛn a yɛyɛ adekyee de yi, momma yɛn ani nna hɔ, na yɛnhyɛ gyidi ne ɔdɔ nkatabo ne nkwagye anidaso sɛ dade kyɛw.

⁹ Efisɛ Onyankopɔn anyi yɛn amma abufuw, na mmom oyii yɛn sɛ Awurade Yesu Kristo nti yemmenya nkwagye.

¹⁰ Ɔno na owu maa yɛn sɛ yenyan oo, yɛda oo, yɛne no ntena nkwa mu.

¹¹ Enti muntutu mo ho fo na obiara mpia ne yɔnko, sɛnea moreyɛ no.

Afotu ahorow

¹² Na yɛsrɛ mo, anuanom, sɛ munhu wɔn a wɔyɛ mo mu adwuma na wodi mo so mpanyin Awurade mu na wɔkasa kyerɛ mo,

¹³ na mummu wɔn papaapa ɔdɔ mu, wɔn adwuma nti. Montena asomdwoe mu.

¹⁴ Afei yetu mo fo, anuanom, sɛ monkasa nkyerɛ wɔn a wɔnam basabasa, monkyekye wɔn a wɔn koma atu werɛ, munso wɔn a wɔyɛ mmerɛw mu, montɔ mo bo ase mma nnipa nyinaa.

¹⁵ Monhwɛ na obi amfa bɔne antua obi bɔne so ka, na mmom munni nea eye akyi daa, mo ne nnipa nyinaa ho.

¹⁶ Momma mo ani nnye daa;

¹⁷ munnnyae mpaebɔ da!

¹⁸ Monna ase ade nyinaa mu, na eyi ne nea Onyankopɔn pɛ, Kristo Yesu mu wɔ mo ho.

¹⁹ Munnnum honhom no,

²⁰ monntew adiyisɛm atua!

²¹ Monsɔ ade nyinaa nhwɛ, na munso nea eye no mu den.

²² Munyi mo ho mfi bɔne su nyinaa ho.

²³ Na ɔno asomdwoe Nyankopɔn no ara ntew mo ho koraa, na ɔnhwɛ mo honhom ne mo kra ne mo nipadua so mu a ɛho remma asɛm bi yɛn Awurade Yesu Kristo ba mu.

²⁴ Ɔnokwafo ne nea ɔfrɛ mo no, ɔno nso na ɔbɛyɛ.

Nkradi

²⁵ Anuanom, mommɔ mpae mma yɛn.

²⁶ Momfa mfewano kronkron nkyiakyia anuanom nyinaa.

²⁷ Mehyɛ mo Awurade mu sɛ momma wɔnkenkan nhoma yi nkyerɛ anuanom nyinaa.

²⁸ Yɛn Awurade Yesu Kristo adom nka mo.